بالتزامن مع محاولات الحكومة الكتيرة لحل مشكلة القمامة وتراكم المخلفات بالشوارع، كان عند شحاتة المقدس نقيب الزبالين حل اقترحه عليها، وهو تنمية تربية الخنازير من جديد، وده مكنش مجرد اقتراح خيالى، لكن نقابة الزبالين قدمت اقتراح كامل ودلائل تثبت إن الحل فى الخنازير.

والأكيد دلوقتى إنك هتسأل طب ليه وإزاى الخنازير هتحل مشكلة القمامة؟ هو ده اللى هنجاوبك عليه فى التقرير ده:

1- الخنازير فى مصر بتعتمد بشكل أساسى فى تغذيتها على بواقى الأكل اللى الزبالين بيجمعوه من القمامة.

2- الخنازير لوحدها تقدر تاكل يوميا ما يزيد عن 40% من المخلفات أو بمعدل 6 آلاف طن.

3- عدد الخنازير الموجودة فى مصر حاليا مليون و200ألف راس بس.

4- واحنا محتاجين عشان نحل مشكلة القمامة 2 مليون و500 ألف راس.

5- الخنازير بتولد مرتين سنويا، بمعدل كل 5 شهور، وفى كل مرة بتولد من 10 إلى 12 خنزير، وبكده العدد اللى محتاجينه نقدر نوصله خلال سنة من دلوقتى.

6- فى 6 مناطق بتتربى فيها الخنازير هى: أرض اللواء- المحور، منشية ناصر- جبل المقطم، الوحدة الوطنية – سجن طرة، حلوان خلف مدافن مايو، البراجيل – إمبابة، الخصوص – القليوبية.

7- الحكومة حاليا بدأت تفكر فى تنمية تربية الخنازير وعمل مزارع ليها بشكل يضمن عدم انتشار أى أمراض بينها، زى إنفلونزا الخنازير مثلا، واللى أدت إلى إعدام أكثر من 2 مليون راس فى 2009.