من المصارعة للتمثيل ف الافلام..تفتكر تفرق كتير؟..

الاستادات اللي بتتلعب فيها ماتشات المصارعة بيكون عدد الجمهور فيها 40-70 ألف وأقصى حاجة 90 ألف تقريبًا.. ولو حسبنا نسبة الناس اللي بتتفرج على التلفزيون وتدفع اشتراك مش هيكملوا 10-15 مليون بالكتير.. كل الحسابات دي خلتني أسأل ليه المصارعين ميمثلوش في هوليوود ويخلوا ملايين يشوفوهم حول العالم مش في أمريكا بس.. يعني بدل ما يمثلوا قدام آلاف الجماهير.. لأ يمثلوا قدام ملايين.. وأهو كله تمثيل في الأول والآخر.

الأسئلة دي خلتني أفكر وأشوف يا ترى هل فيه حد من المصارعين سواء السابقين أو الحاليين فكّر فعلًا يتجه لهوليوود ويسيب الـ WWE.. أو حتى يجمع بين الاتنين؟ وده هيكون موضوعنا النهاردة في حلقة جديدة من "حدوتة مصارعة".

من فترة مش كبيرة وقع تحت إيدي فيلم The Scorpion King من إنتاج سنة 2002.. ولما اتفرجت عليه.. عجبني دور المصارع The Rock في الفيلم وقررت أتفرج على أفلام كتير ليه.. عشان أفهم إزاي مصارع يتحول للتمثيل ويقدر يبدع أكتر ما كان بيعمل في المصارعة.

أول ظهور تمثيلي للروك - بخلاف المصارعة عشان إحنا عرفنا أنها تمثيل خلاص - كان في فيلم The Scorpion King اللي اتكلمنا عليه فوق.. بس أول ظهور حقيقي ليه في بطولة تقريبًا كان في فيلم Race to witch mountain سنة 2009.. وبعد كدا ظهر في مسلسلات وأفلام كتير زي مثلًا Family Guy و The Other Guys و Faster.. بعد كده دخل الروك في سلسلة أفلام Fast & Furious ومثل دور ضابط الشرطة اللي بيطارد عائلة Dominic اللي بيقوم بدوره Vin Diesel.

ظهور الروك في أفلام Fast & Furious كان بداية انطلاقة الحقيقية في عالم السينما.. ومثل في 4 أجزاء من السلسلة لحد دلوقتي.. ده غير مشاركته في فيلم G.I. Joe: Retaliation وEmpire State و Pain & Gain مع نجوم زي Channing Tatum و Mark Wahlberg.. وفيلم San Andreas سنة 2015 مع النجمة الجميلة Alexandra Daddario وفيلم Baywatch السنة دي مع Alexandra بردو.

الميزة اللي ميزت الروك عن أي مصارع تاني دخل في مجال السينما.. أنه قدر يمثل في أفلام متنوعة.. مش بس أكشن.. مثّل في أفلام كوميدي ودراما وغيره.. وقدر يقنع الناس بتمثيله في فيلم Central Intelligence سنة 2016 مع كيفن هارت.

في شهر 8 سنة 2016.. مجلة فوربس العالمية عملت تقرير عن أكثر الممثلين اللي اتدفعلهم أجور في عام 2016.. واللي كان مسيطر على رأس القائمة Robert Downey Jr.. عشان ييجي الروك ياخد مكانه في السنة دي.. الروك قدر يحقق في 2016 أرباح وصلت لـ 64.5 مليون دولار.. وده كان أكتر من ضعف الأرباح اللي حققها في 2015.. وده بيظهرلنا قد ايه المصارعين ممكن ينجحوا في مجال السينما والتلفزيون زي الممثلين وأحسن منهم كمان.

تاني واحد عندنا النهاردة هو المصارع والممثل Dave Bautista

في حلقة عرض الراو يوم 2 يونيو 2014.. كان فريق Evolution القديم متجمع ما عدا Rick Flair.. يعني كان فيه تريبل إتش وراندي أورتن وديف باتيستا.. وكان اليوم ده تاني يوم لهزيمتهم على يد فريق Shield المكون من Roman Reigns, Seth Rollins & Dean Ambrose.

المهم حصل خلاف بين تريبل إتش وباتيستا.. وباتيستا ساب الميكروفون وقالهم I Quit ومشي وسابهم.. تريبل إتش حاول يرجعه بس موافقش.. تقريبًا في اللحظة دي كان باتيسيتا واخد القرار أنه مش هيرجع المصارعة تاني وهيروح يمثل بجد في هوليوود.

قبل 2014... لو سألت على اسم باتيستا في هوليوود محدش هيقدر يفيدك بحاجة.. عشان ممثلش غير في أفلام قليلة وغير مذكورة.. إلا لو حد افتكر دوره في فيلم The Man with the Iron Fists سنة 2012 وفيلم Riddick 2013.. بس في 2014 لما ظهر في دور Drax في فيلم Guardians of the Galaxy ده كان البداية الحقيقية ليه في السينما الأمريكية.

في 2015.. باتيستا مثل في فيلم Spectre قدام الممثل العبقري Daniel Craig.. وفي نفس السنة مثل قدام روبرت دي نيرو في فيلم Heist.. وعلى الرغم من دوره الصغير في الفيلم.. بس لفت أنظار الناس ليه.. وبعد كدا في 2017 ظهر في الجزء الثاني من فيلم Guardians of the Galaxy.. ولسه ليه فيلم Blade Runner 2049 قدام هاريسون فورد وريان جوسلينج.. وماضي على عقود أفلام Avengers Infinity War و Escape Plan 2 سنة 2018.

طبعًا لو حبينا نتكلم على الممثلين اللي مثلوا أفلام.. مينفعش ننسى فتى الـ WWE المدلل.. جون سينا.. اللي الـ WWE لمعته وخليته يقدر يكسب نجوم وأبطال كبار من وهو صغير.. ومشهور بالشعار بتاع Never Give Up يعني "لا أستسلم أبدًا".. واللي بالمناسبة الكلام ده كدب.. عشان جون سينا استسلم قبل كدا في ماتشات المصارعة 3 مرات.

أول فيلم سينمائي لجون سينا.. واللي كان تمثيله غير متقن إلى حد كبير واعتمد على شهرته في المصارعة في الوقت ده كان فيلم The Marine سنة 2006.. وبعد كده ظهر في فيلم 12 Rounds سنة 2009.. وبنسبة كبيرة الدورين متشابهين.. يعني واحد مراته اتخطفت ومفروض ينقذها.. والتاني حبيبته اتخطفت ومفروض ينقذها.. نفس اللي بيعمله جون سينا في المصارعة بيكرر نفس الحركات ونفس الأسلوب طول عمره من غير أي تجديد.

بعد الفيلمين دول جون سينا عمل فيلم Trainwreck سنة 2015.. اللي يعتبر أنجح الأفلام اللي مثل فيها.. وده بسبب أنه كان فيه نجوم تانيين زي Amy Schumer وColin Quinn وBrie Larson وغيرهم.

طبعًا في أفلام تانية أو ظهور تاني ليه في أفلام غير الأفلام اللي فوق دي.. بس كلها أفلام فاشلة ومنجحتش ولا نقديًا ولا جماهيريًا ولا في البوكس أوفيس حتى.

تريبل إتش لما بدأ يمثل خارج مجال المصارعة.. بدأ في فيلم مصاصي الدماء المعروف Blade وبالتحديد في الجزء التالت والأخير اللي جه باسم Blade: Trinity سنة 2004.

بعد كده عمل فيلمين بالظبط في سنة واحدة اللي هي 2011 يعني بعد 7 سنين من فيلمه الأول.. أولهم كان فيلم اسمه Vengence وده كان فيلم تلفزيوني يعني اتذاع على التلفزيون منزلش السينما حتى.. والتاني كان فيلم The Chaperone والفيلم فشل فشل ذريع.

لما الفيلمين فشلوا.. تريبل إتش قرر يبعد عن مجال التمثيل السينمائي ويركز أكتر على التمثيل في المصارعة.. ودي حاجة تحسبله.. التمثيل السينمائي محتاج موهبة أكبر بكتير من التمثيل في المصارعة.. عشان كدا تريبل إتش قرر يكتفي بإدارة المصارعة والظهور فيها بشكل متقطع أحسن من أنه يمثل في أفلام تجارية غير ناجحة.

لما الـ WWE حبت تدخل في مجال الأفلام السينمائية.. عملت شركة إنتاج اسمها WWE Studios.. الشركة دي عملت أكتر من فيلم لأكتر من مصارع.. يعني مثلًا فيلم The Scorpion King بتاع الروك كان من إنتاجها.. فيلم The Marine بتاع جون سينا كان من إنتاجها.. وبالمناسبة فيلم The Marine اتعمله 4 أجزاء تانيين آخرها كان السنة دي.. وما شاء الله يعني البطل الأساسي اتغير 3 مرات.. بعد ما كان جون سينا بقى في الجزء التاني Ted DiBiase Jr. وفي التالت The Miz.

WWE Studios عملت أفلام كتير اتعرضت في السينما.. زي مثلًا See No Evil اللي كان البطل فيه Kane.

وفيلم The Condemned بطولة ستيف أوستن في الجزء الأول وراندي أورتن في الجزء التاني.

فيلم 12 Rounds الجزء الأول بطولة جون سينا.. التاني بطولة راندي أورتن.. التالت بطولة Dean Ambrose..

في أفلام تانية كتير.. بس مفيش أفلام حققت نجاحات سواء جماهيرية أو نقدية لأن أغلب أو كل الأفلام دي بتعتمد على الأكشن والحركة من غير قصة حقيقية أو هدف أو حتى تمثيل كويس.

يعني من الآخر.. عاوز تتفرج على مصارعين مثّلوا كويس.. عليك وعلى أفلام الروك أو باتيستا.. غير كده الباقي كله ف الكلتش.

لو عجبك الموضوع دة وحابب تقرا حاجات زيه او أحسن خش ع اللينكات دي وإستمتع..

أندرتيكر "الحانوتي".. حدوتة مصارعة

كريس جيركو.. غلب الروك وأوستن في ليلة واحدة.. وكله في "اللِستة" الصفرا

بروك ليسنر.. "الوحش" ملك المصارعة والفنون القتالية المختلطة

ليه تتفرج على المصارعة مع انها تمثيل؟

حدوتة مصارعة.. "Brothers Of Destruction" مش إخوات أصلًا