كريس جيركو .. غلب الروك وأوستن في ليلة واحدة.. وكله في "اللِستة" الصفرا

كريس جيركو ..إوعى تكون مش بتحبه لحسن يكتبك في الليسته بتاعته "ليست أوف جيركو".. أو يقول عليك جملته المشهورة غبي ومعتوه "ستوبيد إيديت".. الراجل ده كسب الروك "دواين جونسون" وستون كولد "ستيف أوستن" في ليلة واحدة بعرض واحد.. وكان أول واحد ياخد حزامين الوورلد والدبليو دبليو إي في نفس الوقت.. ورغم إنه من جيل العظماء أمثال الأندرتيكر وشون مايكل وتريبل إتش وكيفين ناش لكنه لسه بيلعب لحد دلوقتي ومحافظ على نفسه وبيكسب ماتشات وبياخد بطولات عنينا عليه باردة..

الأسطورة الكندية كريس جيركو بدأ مصارعة سنة 1992 في الدبليو سي دبليو اللي خرج منه أمهر وأشهر المصارعين.. وكانت أشهر عداوة له وقتها مع ستون كولد ستيف أوستن.. اللي كان بيكرهه جدا وكان مستقصده في كل مباراة يخوضها.. لحد ما خاضوا نزال شهير كسب في أوستن بحركته الشهيرة "الاستانر"..

كريس جيركو لعب في اتحادات كتير لكن رغم كده أشهر أوقاته ولحظاته وإنجازاته كانت في الدبليو دبليو إي اللي لسه فيه لحد يومنا ده.. كسب فيه بطولة العالم 6 مرات.. وبطولة الزوجي 5 مرات.. وحقق رقم قياسي في بطولة القارات "الإنتركونتيننتال شامبيون" وكسبها 8 مرات.. وطبعا منقدرش ننسى إن هو اللي اخترع ماتشات السلم والحزام يكون متعلق فوق.. وكان له برنامجه الشهير "هاي لايت رييل".. اللي كان بيستضيف فيه المصارعين وكان ساعات بيجيبهم عشان يتريق عليهم أو تحصل بينهم خناقات جامدة ..

كريس جيركو في الأواخر اشتهر بأجندة أو ليستة بياخدها معاه في كل مكان.. "ليست أوف جيركو" وبيكتب فيها كل حاجة مش بيحبها وبيضايق منها.. من أول المصارعين لحد بتوع الكاميرات لو صوروه من زاوية هو مش بيحبها.. وكان سرقها منه قبل كده المهندس المعماري سيث رولينز في عرض من عروض الرو الأسبوعية.. لكن جيركو رجعها بعد ما وقعت في إيد العملاق برون سترومان..

واي تو جاي اشتهر في الأواخر كمان بصداقته مع كيفين أوينز.. المصارع الشهير اللي كسب جون سينا في أول ماتش له في الاتحاد.. وكونوا فريق ممتاز الناس كلها بتحبه.. يمكن عشان كانوا كنديين زي بعض.. وفضلوا أصدقاء لفترة طويلة.. وانقذوا بعض في مبارايات كتير.. وكان جيركو سبب إن أوينز ياخد بطولة اليونيفرسال شامبيون وتفضل معاه فترة طويلة.. لكن الاتنين اتخانقوا بعد كده وحصلت بينهم عداوة كبيرة أشهرها اللي كانت في آخر عرض ريسلمانيا وفاز فيها أوينز.. لكن دي مكنتش النهاية وفاز كريس جيركو على أوينز في عرض "باي باك" عن طريق حركة التسليم الشهيرة "وولز أوف جيركو".. عشان يثبت إن الكبير كبير برضه..

واي تو جيه "Y2J".. اسم الشهرة بتاع كريس جيركو اللي الناس بتهتف بيه دايما.. وهتفضل تهتف بيه طول ما هو بيلعب وبيحقق بطولات وأرقام قياسية.. وهو شكله مش ناوي يعتزل قريب.. وهيفضل قاعد على قلوب مصارعين وجماهير الدبليو دبليو إي رغم إن عمره في الحلبات عدى الـ 30 سنة.. وحتى لو اعتزل نيفرر إيييييييييييفر حد يقدر ينساه..

لو عجبك الموضوع دة وحبيت تشوف زيه ويمكن أحسن خش هنا

قط بلدي