حدوتة مصارعة.. أندرتيكر "الحانوتي"

لما الأندرتيكر خسر من رومان رينز في ريسلمانيا 33 السنة دي.. ناس كتير افتكرت أن ده آخر ماتش للحانوتي.. وغالبًا عندهم حق في الموضوع ده.

الأندرتيكر طول مسيرته في عالم المصارعة.. كان أشهر واحد مبيخسرش في الريسلمانيا خالص.

بس للأسف.. كل شيء بينتهي.. حتى الـ Streak اللي كان بيميز الأندرتيكر.. بس مكانتش نهايته السنة دي.. كانت نهايته من 3 سنين في ريسلمانيا 30.. واللي كانت من أقوى بطولات الريسلمانيا في تاريخها.. لما خسر من الدبابة البشرية أو الوحش بروك ليزنر.

بعد ما الأندرتيكر خسر الماتش ده.. كلنا توقعنا أنه خلاص إنتهى ومش هيرجع يلعب مرة تانية.. بس رجع ولعب في ريسلمانيا مرتين تانيين قبل خسارته الأخيرة.

المرة الأولى كانت ضد براي وايت.. في ريسلمانيا 31 سنة 2015.. والمرة التانية كانت ضد شين مكمان - أيوة ابن فينس مكمان صاحب اتحاد الـ WWE - في ريسلمانيا 32 سنة 2016.

والمدهش في الموضوع.. ان الأندرتيكر لعب الماتشين دول وكسبهم كمان.. وكان في ماتش منهم من نوعية Hell In A Cell - يعني ماتش في قفص حديدي وكل حاجة مسموح بيها -.

بعد كده في بطولة الـ Royal Rumble السنة دي - واللي بيفوز فيها لازم يطّلع المصارعين كلهم برا الحلبة.. وبيكون قدامه فرصة يلعب على حزام بطولة الـ WWE في ريسلمانيا -.. رومان رينز كان هو الشخص اللي طلع أندرتيكر من الحلبة.

طبعًا ده جنن الأندرتيكر وصمم يواجه رينز في بطولة ريسلمانيا - اللي هي ملعبه الأساسي -.. وكمان في ماتش من نوعية No Holds Barred.. يعني أي حاجة مسموح باستخدامها في الماتش في أي مكان سواء داخل الحلبة أو خارجها.

أثناء الماتش - واللي استمر لمدة 23 دقيقة تقريبًا - رومان رينز عمل "حركة الفينش" بتاعه 5 مرات ضد تيكر.

الطبيعي في أي ماتش أن الشخص اللي بيتلقى ضربة Spear واحدة من رينز بيخسر.. تيكر أخد 5 ضربات لحد ما خلاص مبقاش قادر يقف.. مع مراعاة أن الأندرتيكر عنده 52 سنة .

خلص الماتش وفاز فيه رومان رينز.. وبقى هو تاني شخص يكسب الأندرتيكر في ريسلمانيا بعد بروك ليزنر.. وغالبًا هيكون آخر شخص يعمل كدا.

بعد الماتش ما خلص.. الأندرتيكر وقف في وسط الحلبة.. وخلع المعطف الطويل اللي بيلبسه والجوانتي الشهير بتاعه وسابهم في وسط الحلبة.. ونزل باس مراته - المصارعة ميشيل مكول - اللي كانت من ضمن الجمهور جمب الحلبة.. ومشي.

الحركة الأخيرة دي.. هي اللي خلت ناس كتير تقول إن دي آخر مرة أندرتيكر يلعب فيها في ريسلمانيا.. وفي المصارعة بشكل عام.. ف هل ممكن ييجي اليوم اللي نشوف الأندرتيكر مرة تانية في الحلبة؟.. الأيام هي بس اللي تقدر تجاوبلنا على السؤال ده.. أو فينس مكمان..مسيرنا نشوف..

في النهاية.. متاخدوش الموضوع ده على صدركم.. عشان في الأول والآخر ده تمثيل.. وكل الحركات ونتايج الماتشات بتكون معروفة للطرفين قبل الماتش أصلًا.. عشان الـ WWE أصلًا معناها "متعة المصارعة العالمية".. يعني هي أصلًا "شو" واستعراض وسيناريو مكتوب من وحدة الإبداع في الشركة.. مش أكتر.

لو عجبك الموضوع دة وحبيت تشوف زيه ويمكن أحسن خش هنا

قط بلدي