ف الوقت اللي بتحاول دول كتير تقلل فيه عدد قطط الشوارع .. في جزيرة يابانية قررت أنها تكون "الجنة الآمنة" للقطط.. ف لو إنتا من الكات لافرز يبقى دة أنسب مكان تقضي فيه أجازة لطيفة مع أصحابك المفضلين من القطط.. 

تاشيروجيما هي جزيرة في ولاية مياجي اليابانية أسمها الحركي "جزيرة القطط " ودة لإن عدد القطط فيها أكتر من عدد السكان.. ف في الوقت اللي عدد القطط فيه بيوصل لأكتر من 100 قطة.. عدد السكان مبيعديش ال100 شخص.. 

خلال القرن ال19 كانت تاشيروجيما مشهورة بالصياديين اللي بيجوا يباتوا فيها ليلة قبل ما يرجعوا لبيوتهم.. وكانت القطط بتستنى الوقت دة عشان تتلم حواليهم وتاكل سمك.. وبصراحة الصيادين مكنوش بيتضايقوا لأن عندهم إعتقاد أن أكل القطط دة بيجيب الثروة والحظ.. أهتمام الصيادين بالقطط موقفش بس عند السمك.. دول كمان بيكرموهم بعد موتهم .. يعني مثلا ف مرة صياد خبط بالخطأ دماغ قطة وموتها..طبعا الصياد ضميره آنبه جدا وقرر إنه يدفنها ويعمل شاهد للقبر بتاعها.. ودلوقتي في أكتر من 10 شواهد للقطط موجودة في ولاية مياجي 

حب الناس للقطط واضح في كل مكان على الجزيرة.. المباني هناك هتلاقيها على شكل قطط دة غير المعارض والمهرجانات اللي بتتعمل ليهم.. 

بس للأسف الجزيرة ممنوع فيها إصطحاب الكلاب بكل أنواعهم وأشكالهم.. ودة طبعا عشان الكلاب والقطط مبيتفقوش والكلب لو شاف قطة هيبقى يومها مش فايت..

السياح بيحبوا يزورا الجزيرة عشان يتفرجوا على القطط ويتصوروا معاهم وخصوصا أن القطط هناك متدلعة جدا ومفيش منها أي ضرر على البشر.