خمس العاب فيديو قديمة.. كنا فاكرينها حلوة

ذكريات الطفولة ساعات بتضحك علينا وتخلينا شايفين أفلام معينة أو العاب فيديو معينة أحسن بكتير من الحقيقة خصوصا لو الزمن عدى عليها واتعمل لها أجزاء كتير تخلي من الصعب تفتكر شكل اللعبة الاصلية كان ازاي اول ما لعبتها

tomb raider 1

الجزء الاول من لعبة لارا كروفت واللي اتعملت فيلم بعد كدة كانت من اسوأ اللعب في وقتها كفاية بسبب حركة الكاميرا الغريبة المربكة والالغاز الكتير اللي مكنش ممكن تتحل بشكل طبيعي زي باقي الفيديو جيمز سنة 1996 دة طبعا غير البطء اللي مش طبيعي لدرجة انك بتسمع خطوات لارا كروفت وهي بتمشي في اللعبة طول الوقت حتى بعد ما تقف!!.

pokemon red blue and yellow

لو كنت فاكر البوكيمون طول عمره ألوان.. ارجع شوية بالذاكرة وهتلاقيه ابيض وأسود واسخف جرافيك اتعمل للعبة في التسعينات ومع ذلك نينتيندو استثمرت فيها كتير جدا جدا وعملت الكارتون والنسخ الديجيتال وال 3D بعد كدة ودة طبعا يعتبر تحسن من الشكل الأصلي في الصورة اللي تحت وكفاية ان مفيش اي شخصية في اللعبة كانت تشبه شكلها في الكارتون او حتى ف الإعلان بتاع اللعبة نفسه.

Mass Effect

اللعبة اللي ظهرت سنة 2007 وكانت تقريبا موضة خصوصا ف التصنيف الخاص بال RPG في العاب الفيديو وأوبشن اللعب بالشخصية اللي انت بتبنيها من اولها لأخرها .. ومع ذلك اللعبة دي كانت مضروبة في حاجات كتير محدش يحب يفتكرها دلوقتي زي الاعطال اللي بتخليها تهنج وطبعا الأسلحة الضعيفة اللي كانت بتخلي اللاعب يشد شعره من الزهق وكأنك بتشتري السلاح دة بفلوس حقيقية..دة بجانب انها كانت بتخلي الاجهزة تسخن وانتا بتلعب لدرجة مش طبيعية..ومازالت للأسف.

star wars battlefront 2

احسن حاجة في اللعبة دي هي القصة بتاعتها غير كدة اللي لعبها هيلاقي انها تقريبا كانت قص ولزق من الجزء الأول .. واكتر من كدة الجرافيك كان اقل من الجزء الاول بتاعها ومش مختلفة عن العاب فيديو كتير وقتها، أما نشوف هيعملو ايه في الجزء بتاع 2017.

Sonic 1998

صحيح كانت لعبة شعبية ومسلية .. أو دة اللي احنا فاكرينه.. اما الجزء اللي احنا مش عايزين نفتكره هو ان اللعبة كانت فيها مشاكل ف التحكم لدرجة انك تحس ان مش انت اللي بتلعب أصلا دة في حد تاني هو اللي بيحرك الشخصية.. كمان كان فيها جزء كامل مخصوص عشان القطة الكبيرة الرخمة وهي بتصطاد ضفدع ومتسألش ليه..محدش يعرف السبب.. بس طبعا احنا مسامحين اللعبة دي بعد ما شوفنا الاجزاء الجديدة منها على الموبايلات واللي استحقت اي هجوم خدته بسبب الجرافيك العجيب وحركة الكاميرا المزعجة.