اللعبة الحلوة بـ نقول عليها حلوة، زيها زي الضحكة الحلوة بـ الظبط .. ومعادلة نجاح مسلسل ريح المدام السنة دي بسيطة وسهلة جداً، الناس زهقت من الأكشن والقتل والجثث والسياسة، الناس حياتها كل يوم فيها أحداث أعمق بكتير وإنسانية أكتر وساسبينس أقوي من اى مسلسل وبالتالي طبيعي جدا لما يشوفوا مسلسل فيه ضحك وخفيف ومش متكلف يتلموا حواليه ويتفرجوا ويشجعوا الناس اللي حواليهم كمان تتفرج ودة اللي حصل بالضبط في ريح المدام.

المعادلة بسيطة: دويتو خفيف مش منفسن بين أحمد فهمي وأكرم حسني و معاهم ممثلة حلوة اللي هي مي عمر ليها شعبية من رمضان اللي فات والناس بتحب تتفرج عليها + إفيهات حلوة ومواقف كوميدية لفكرة خفيفة مش مهلكة عقليا = مبروك المسلسل نجح

1- الفكرة في الفكرة

رغم إن الفكرة بسيطة ومكرره واتعملت جوة مصر وبره مصر الا إنها من الأفكار الحلوة اللى كل ما هتتقدم هتنجح بس ده لو اتعملت صح وبدم خفيف زى ريح المدام ما عملوها كده، وهنا يحسب نجاح الفكرة لسيناريو تامر ابراهيم وحوار ولاء شريف .

الفكرة بتدور حوالين ست فقدت الذاكرة وعشان جوزها يفكرها بيه ويتجوزها بيتسحل معاها ووراها في قصص وحوارات وحواديت بيخرج منها من شخصيه للتانية بمنتهى السلاسة وخفة الدم وطبعا معاه صاحبة اللى بيحاول طول الوقت يساعدة  بالفتي وسبحان الله كل مرة بتعدي على خير ، حب الصحاب يا خوانا .

2- الدويتو أحمد فهمي وأكرم حسني

التحدي والإصرار على اثبات ان الدويتو ده ناجح هو اللي نجح المسلسل ده وواضح جدا إن مافيش حد منهم منفسن على التاني بدليل إن اللي يركز في مشاهد كل حلقة تقريبا إفيهات أكرم حسنى وجملة الحوارية أكبر كمساحه من أحمد فهمى ولكن لسلاسة الفكرة والأدوار. مش باين إلا إن الأتنين فعلا أبطال مافيش  واحد بطل والتاني سنيد.

3- أكرم حسني

أهو أكرم حسنى ده تحسه كده واحد من العيلة شايفه بيكبر قدامك وبتفرحله، الراجل ساب دراسته وشغله وقرر يعمل اللى بيحبة ويمثل ويذيع وإحنا بنشوف كل الخطوات دي زيه زي أخوك اللي الناس كلها شايفاه فاشل بس أثبت لهم العكس و بـ ينجح قدامهم كلهم.. وأهو الراجل ولا جان ولا حاجه  ولا عينة زرقا ولا شعرة أصفرولا اى حاجة ولا  موديل رفع الدبوس حتى ويمكن ده سر من اسرار نجاحه انه بطل شبهنا جدا ربنا انعم عليه بقبول ونبره صوت بـ تضحك خلقة .

تجربة أبو حفيظة مهمه جدا في تاريخة بس إصرارة على انه يعدى التجربه والمرحلة ويثبت للناس انه ممثل شاطر وممكن يلعب أي دور ويقنعك ده جزء من شطارته وجزء كبير من نجاح تجربة ريح المدام، أكرم بقى عنده مخزون كبير من الأفكار والإفيهات اللي يقدر يخدم بيها الفكرة وده يرجع تاني لامه بطل شبهنا مش بطل قاعد في برج عالي مش عارف الناس بتضحك على ايه وازاى ومش متابع زي ناس كتير للأسف ضحكهم بقى قديم وبايت .

قصة الحب بين بهجت ومنيرة ستخلد في التاريخ لإن مافيش واحد محبش ام صاحبة بس حب عن حب يفرق وبردوا يحسب لأحمد فهمي فرصته لأكرم حسني ، جوود لاك يا أكرم .

4- إحنا جايين نهزر

أحمد فهمى شخصيه اشبه بشخصيات الكارتون .. تضايق لو أتكلم بجد والجد أصلا مش لايق عليه، طريقته السهلة في الضحك بتخليك مش عارف هو حافظ الإفيه ولا هو إرتجال وليد الموقف واللحظة ، بس الأكيد انه تعب عشان يوصلك الضحكة بالسهولة دي وتعبوا أكترعشان كتابة الحدوته تطلع بالشكل ده ومستخفوش بعقول الناس، اه احنا جايين نهزر بس جايين نضحكوا مش تضحكواعلينا .. الناس بقت عارفه وقادرة تميز بين الافيه اللى اتكتب واللي اتنحت من على الفيسبوك وده في حد ذاته من مفاتيح  نجاح ريح المدام.

5- كريم العدل جدا

العدل فعلا إنك تتفرج على مسلسل دمه خفيف مش رخيص، اخراج ذكى وصورة حلوة، موزون بميزان ميه  لا هو طويل وممل ولا هو  قصير ومتكروت ومش لاحقين ننبسط ، كريم العدل لو ركز في الكوميدي هيقعد مخرجين كتير في بيوتهم ..

الكوميديا صعبة بس تستاهل التضحية والمجهود ،ما بالك بـ مخرج أصلا المناطق الإنسانية واضحة في شغله .

اللى بيخرج كوميدي إجتماعي زي  نوعية ريح المدام لازم  يتبسط  وهو بـ يتفرج على الناس اللي بتضحك فعلا على شغله من قلبها

ريح المدام مسلسل فيه ضحك كتير، حلو وخفيف عالقلب ، عامل وسط  مسلسلات السنه دي زي البطيخه الحمرا الحلوة فيوم صيف حر صهد نار ويحسب للمنتج طارق الجنايني كل مجازفة بيجازفها بقلب جامد لأجل يعدل الحال المايل في الدراما شوية .