بداية العنوان غير مضلل، لو ركزت فعلًا هتكتشف إن برنامج "البرنامج" مستمر رغم توقفه، وإن باسم يوسف مستمر في إضحاكنا، صحيح هو مش في مصر، وعلاقته بالإعلام تم اختصارها على السوشيال ميديا، ومفيش معلنين، ومسرح وسط البلد استولت عليه "أبلة فاهتيا"، لكن كل القرائن بتثبت إن باسم يوسف في مصر، بيقدم كل اللي هو عايزه، والجمهور بيصقف من كتر الضحك، طب إزاي قدر يرجع تاني، كلمة السر "توني ستارك" أو الرجل الحديدي .

 
استرجع مشهد الفيلم الهوليودي لما "روبرت داوني جونير"، يقرر يتحول للبطل الخارق  iron man، هتلاقيه واقف في مكانه وكل جزء بيطير من مكانه عشان يتجمع في جسد المخترع العظيم "توني ستارك"، طب إيه علاقة درس الميكانيكا ده بباسم يوسف، مع متابعة كل أسباب الضحك اللي في البرامج الكوميدية اللي نجحت مع المصريين في الفترة الأخيرة هتعرف إن باسم يوسف تحول إلى "توني ستارك" شرق أوسطي، وأجزاء بدلة البطل الخارق بتتجسد في أبناءه أو تلامذته، أو فريقه، أحمد الجارحي، وشادي ألفونس، وخالد منصور.


خلطة برنامج "البرنامج" معروفة للجميع، أغنية شهيرة يعاد تقديمها مع اختلاف الكلمات، إفيهات طازجة شقية تتناسب مع شعب ابن نكتة،  نقد لاذع للأحداث الجارية، طبعا كل مقومات النجاح كانت  تتطلب ظرف زمان مناسب، وفي وقت الأزمات السياسية كان الدكتور باسم يوسف بيدخل الأزمة السياسة من ناحية ويطلعها نكتة من الناحية التانية، حاجة كده أشبه بمشروع "كفتة الإيدز". 


طيب بما إن الخلطة الكوميدية معروفة للجميع، ليه مظبطتتش مع اللي كل أعادوا التجربة، زي محمد صبحي ومعتز الدمرداش، السر في النفس، طعم الحلقة بيطلع مختلف، الجمهور ريقه جري على أكلة  كوميدية في المطعم اللي بيحبه أبو سقف عالي، طب إزاي الفرسان التلاتة (جارحي – شادي – خالد)، قدروا يكملوا الخط اللي بدأه باسم يوسف، هنا بقى الزتونة في الحكاية.

أحمد الجارحي

 
أهم فقرات برنامج "البرنامج" كانت محاولته تقديم المواهب الشابة اللي مش واخدة حقها في الإعلام، وكانت فاتحة خير على اللي يطلع مع باسم في حلقة، زي أبلة فاهيتا، والمطرب محمد محسن، وفريق مسار إجباري، وغيرهم من المبدعين اللي كان ناقصهم حد يقرب المسافات بينهم وبين الناس، بعيدًا عن عوالم السوشيال ميديا وحفلات الساقية.

لو خدنا بالنا من اللي بيقدمه الجارحي هنلاقيه بيكمل مشروع البرنامج في تقديم مواهب شابة، مع خصوصية مشروع "ذيع موهبتك"، اللي تحول لكشك مواهب يلف على جميع محافظات مصر، ومن خلاله بنعرف إن الشارع المصري فيه مواهب قوية، الجارحي بخفة دم مش مفتعله بيقدم ضيوفه، وباسم أشاد بتجربته في بداية الموسم الأول للبرنامج.

الغريب إن جارحي في بداية علاقته بباسم يوسف، مكنش عايز يشتغل معاه، لسبب مكنش عارفه، لكن باسم أداله الورق وقاله "أنت اللي هتعمل الدور"، ومن وقتها كمل مع باسم لآخر حلقة في البرنامج يونيو 2014.

شادي ألفونس و خالد منصور 


مكنش ينفع نتكلم عن كل واحد لوحده، هما تحولوا لثنائي، كان ليهم صولات وجولات في أهم اسكتشات اتكتبت في البرنامج، النجاح اللي حققوه مع باسم يوسف، خلاهم ماركة مسجلة في الإفيهات اللي بتحمل إيحاء جنسي لكن بخفة دم، بيكسروا التابوه بروقان من غير زعيق، أول تجاربهم كانت مع برنامج رمضاني اسمه "رمضان جالك"، وفي رمضان 2016  قدموا برنامج "التجربة الخفية"، لكن العودة للملعب الأول اللي تميزوا فيه، كان مع النسخة العربية من Saturday Night Live، اللي بيعرض على شبكة OSN المشفرة.

ورغم التشفير إلا إن الاسكتشات الكوميدية بتحقق نسب مشاهدة عالية على مواقع التواصل الاجتماعي موصلش ليها برنامج كوميدي، من ساعة توقف برنامج "البرنامج"، وده مش استنتاج دي دراسة مديرين النشاط الالكتروني لبرنامج Saturday Night Live بالعربي، واللي أكدها مخرج العمل عمرو سلامة.

أيمن وتار

"باسم يوسف هيقدم البرنامج".. كانت اشتغالة من الفنان القدير سامي مغاوري، في برومو إعلان البرنامج "أشرف يقدمه أيمن".. طب مين هو أيمن؟.. الكلام والعهدة على الراوي "سامي مغاوري": "باسم يوسف المذيع المشهور، كان معه 3، 2 منهم قرع وراحوا برنامج آخر لا علاقة لنا بهما، أخذنا الثالث"، يظهر في المشهد أيمن وتار، ثالث أعضاء ورشة تأليف برنامج "البرنامج"، وأثقلهم وزنًا لكن لايقل عنهم خفة دم.


فريق "البرنامج" كمل رحلة السخرية بطريقة iron man، لأنهم لو كانوا مجددوش كانوا هيبقوا زي الصحفي "كلارك كنت"، كان يكفيه يقلع النضارة عشان يتحول لـ"سوبر مان"، قال يعني كده مخدناش بالنا، إن فيه حاجة اتغيرت.