فيديو| شيماء بتنشد وماري ترنم في حضرة الشيخ زين
الخميس، 11 يونيو 2015 12:20 م
قليلات هن من يقدمن الإنشاد والابتهالات في مجتمعنا الشرقي، إلا أن شيماء النوبي حاربت منذ وقت طويل، لتفعل ذلك، وها هي الآن تقيم العديد من الحفلات، وانضمت أيضا لفرقة الشيخ زين محمود لتصبح فردا أساسيا فيها، وكان لنا حوار معها حول الإنشاد والمديح الذي تقدمه.
- إمتى بالظبط قررتي تقدمي إنشاد؟
من وأنا صغيرة كنت بحب الأناشيد والتواشيح جدا، وكنت بقلدهم، لغاية ما ابتديت أروح المسرح والأوبرا، وفي البيت كمان كنت بنشد.
- مين أكتر شيوخ بتحبي تسمعيهم؟
كتير، بس الأكتر بحب مضمون التواشيح نفسها.
- إيه أكتر ابتهال بتحبيه؟
"يارب" لـ نصر الدين طبار.
يارب ..
- البيت عندك شاف إزاي قرارك إنك تنشدي؟
كانوا مقتنعين إني هقدم أغاني دينة عادية، لكن أنا متأثرة جدا بالابتهالات والتواشيح، وبدأت تكبر جوايا الرغبة في إني أتعمل أكتر، وبالتالي اتعرفت على الشيخ زين وهو في مارسليا، وبعتله حاجه بصوتي عشان يقولي رأيه فيها، وبعدها علمني المديح، مربعات ابن عروس، الموال القصصي، التواشيح، وحاجات تانية كتير.
- هل حد من البيت بيحضروا حفلاتك؟
دايما بيحضروا طبعا، وكان ظهوري الأول في الحفلات مع الشيخ زين، وخاصة والدتي معايا في كل الحفلات.
استمع إلى إنشاد شيماء النوبي
- ورد فعلها إيه؟
بتبقى مبسوطة.
- حد اتضايقك إنك بتقدمي تواشيح وابتهالات، خاصة إننا في مجتمع شرقي ممكن يستغرب ده؟
آه زمان كتير، كانوا بيقولوا إني بقدم ده عشان أشهِر نفسي وخلاص، قبل كده مكنتش بعرف أرد، لكن بعد ما بقيت في فرقة الشيخ زين مبقاش حد يقدر يقول حاجة.
"أتمنى أكون ابن ليسوع .. ويكون ليا أبويا الحنون.. تملي في حضنه موجود.. وما دمت له كله يهون"، ترنمها ماري المجتهدة، تعمل دائما على تدريب صوتها ليصبح أفضل وأفضل، إلى أن وصلت لما عليه الآن من أداء جيد تقدم به الترنيمات القبطية للمصريين.
- بدأتي تقدمي ترانيم من إمتى؟
من وأنا صغيرة، كنت بدخل كورالات في الكنيسة، وكانوا أهلي بيشجعوني على ده، وإنهم مبسوطين، فحسيت إن صوتي حلو، وبدأت أهتم علشان صوتي يبقي أحلي، وروحت أماكن تدريب أمرن صوتي.
شاهد ترنيمة ألمس حياتي
- فين مثلا؟
في الأوبرا، وأسقفية الشباب، وبعد كده بدأت أحس إني ممكن أكون مرنمة، فاتعرفت على مرنمين ومخرجين وموزعين، وأخد كلمات من كتاب عجباني ورنّمتها.
- أول ترنيمة ليكي كانت إمتي؟
من 4 سنين، وكان اسمها "المس حياتي"، نزلتها ع يوتيوب الأول، وبعد كده نزلت على قناة "أغابي" القبطية، وده خلاني أدخل في المجال شوية شوية، وأعمل ترانيم أكتر، وبعد كدا ابتديت أعمل حفلات.
