مَحضَر نُص الليل
السبت، 25 أبريل 2015 06:26 ص
أكثر الناس إزعاجًا هم المصابون بمرض الفضول تجاه حياتك الشخصية.. الناس دي اللي مفرَّغة وقتها ومجهودها لمتابعةمين؟ فين؟ عمل إيه؟ إمتى؟... من أمثلة الناس دي الجيران اللي دابين عينهم في خصوصياتك عمَّال على بطَّال.. وحاشرين مناخيرهم في أخبارك بمناسبة وبدون مناسبة.. صحيح إن الجار للجار وصحيح إن الوِد والاجتماعيات مهمة لصحة البني آدم النفسية.. لكن الاجتماعيات لما بتزيد عن حدها بتتحول إلى عبء على جهازك العصبي.. وخصوصًا لما بتتفِرض عليك في وقت مش مناسب لموودك.
يعني مثلاً أول ساعة في النهار دي أهم ساعة في ضَبط إيقاع اليوم.. عشان كده اللت والعجن فيها بيشتِت التفكير ويضيق الخُلق.. كمان آخر ساعة في الليل دي أهم ساعة في ضَبط إيقاع النوم.. يعني مش مطلوب فيها هايبرة وحكايات وأخد ورَد.. وعشان كده باعتبر دي ساعات حَظر الاجتماعيات واللجوء إلى الهدوء والصمت التام.. وحيث إني مش مطافي ولا إسعاف يعني وكده ف بقفل أجراس التليفونات بأنواعها والفيس بوك وبرامج التوك شو وكل وسائل العَكننة والتوتر.
أكتر حاجة بقى بتعكر موودي لما حد يحاول بمنتهى التَباتَة إنه يخترق ساعة الحظر دي.. زي مثلا لما جرس التليفون يرن بتكرار هستيري.. فأضطر أرد غَصب عني لحسن يكون في حاجة مهمة.. فإذا بها الجارة الحِشَرية على الطرف الآخر:
أيوه يا ميرا... أنا "ديدي"
أهلا "ديدي".
مش بتردي على التليفون ليه؟
أبدًا بس عشان نُص الليل وبحاول أنام يعني وكده!
هو إنتي نازلة الصبح بدري؟
أيوة ليه؟
إنتي اللي راكنة ناحية المترو؟
أيوة ليه؟
العربية اللي نمرتها معووجة؟
أيوة أيوة لييييه؟!!!
هي المسَّاحة اللي ورا اتسرقت تاني؟
بقالها ميت سنة مسروقة أصلاً..
معقولة من ساعتها ماشتريتيش واحدة جديدة؟
ألو.. ألو...
ماشتريتش واحدة جديدة يا "ديدي".
لازم تجيبيها يا ميرا عشان الشبورة.
حاضر..
ولا إنتي مش بتسوقى في الشبورة؟
(في سري: يادي الليلة الكوبيا).. مابسوقش.
الله أومال بتركبي إيه الصبح بدري؟
بركَب المراجيح.
ههههههههههه لأ بجد سكِّتِك إيه الصُبح؟
ألو... ميرا إنتى نمتى ولا إيه؟
نِفسى والله يا "ديدي"... لو ماعندكيش أسئلة تانية يعني!!
طب حاتيجى اجتماع اتحاد المُلاك؟
لأ..
لييييه؟؟
(فى سرى: يخرب بيت حشَرِيتِك يا شيخة).. مش فاضية.
عندك إيه؟
عندي صُداع!!
ههههههه لأ بجد عندك إيه؟
"ديدي" هو انتي مابتناميش ولا إيه؟!
أصلي زهقانة.
بس أنا عندي شغل الصُبح بدري.
وانتوا بتعملوا إيه بقى فى الشغل؟
بنعمل مَحشى..
دمك تقيل على فكرة
شكراً.. ممكن أروح أنام بقى ولا المَحضَر لسة فيه أسئلة تانية؟!
قال يعني رديتي على أي سؤال...
قال يعني فهمتي إني مش عايزة أرُد..
خلاص روحي نامي ونكمل بُكرة...
ما احنا بقينا بكرة على فكرة!!
قصدي لما ترجعي من الشغل يعني... هو إنتي مش راجعة على البيت على طول؟
لأ...
عندك مشوار؟... رايحة فين؟
بفكر أروح اقدِّم على طَلَب هِجرة!!
