نجيب محفوظ كتب روايات وقصص قصيرة كتير جدا، وكتير منها اتحول أفلام، عندنا 27 فيلم مصري متاخدين عن روايات وقصص لـ نجيب محفوظ. وزي ما كتب روايات كتب السيناريو والحوار (أو شارك في كتابتهم) لـ أفلام كتر (حوالي 26 فيلم)، لكن ولا مرة نجيب محفوظ كتب السيناريو والحوار أو حتى شارك فيهم لـ فيلم متاخد عن رواية ليه أو قصة قصيرة.

كان يكتب الرواية، واللي عايز يحولها سينما أو بعد كده تلفزيون أو حتى مسرح هو حر، بس بعيد عنه. لما يختاروه لـ كتابة سيناريو عن قصة مش بتاعته كان يوافق وينفذ، لـ درجة إنه كاتب سيناريوهات أفلام متاخدة عن روائي كبير تاني زي إحسان عبد القدوس.

واضح الله يرحمه كان حساس، حتى لما تولى منصب الرقيب على المصنفات الفنية، ما كتبش ولا فيلم طول الخمس سنين اللي تولى فيهم المنصب. راجل منضبط جدا الله يرحمه.

اللص والكلاب كانت واحدة من الروايات اللي كاتبها عن الحاديثة اللي حكينا عنها، واتحولت لـ فيلم، وكالعادة ما شاركش هو في كتابة الفيلم، اللي كتبه هو صبري عزت بمشاركة من مخرج الفيلم كمال الشيخ، وفيه اتفاق على إن صبري كتب السيناريو في حين اللي كتب الحوار هو علي الزرقاني، مع إن تتر الفيلم مفيهوش الزرقاني نوهائي، ومكتوب بـ وضوح إن السيناريو لـ صبري عزت وكمال الشيخ، والحوار صبري عزت منفردا.

مش عارف بـ صراحة جت منين حكاية إن الزرقاني هو اللي كتب الحوار، بس دي نعرفها من وإحنا صغيرين، حاجة من الثوابت والكلاسيكيات، زي ما تقول كده إن أسامة أنور عكاشة هو اللي كاتب "الشهد والدموع".

عموما، صبري عزت هو كاتب سيناريو محترف، كان بـ يكتب اللي يطلبوه منه، ينفذه بـ الظبط زي المخرج ما عايز، كتب أفلام على مدار 25 سنة، صعب تتخيل إن اللي كاتبها هو نفس الشخص، يعني ازاي اللي كاتب "اللص والكلاب" و"شيء من الخوف" و"الليلة الأخيرة" و"لن أعترف" و"ملاك وشيطان"، يبقى هو اللي كاتب "شنبو في المصيدة" و"من أجل حنفي" و"هي والشياطين"؟

تخصص صبري في السيناريو، بـ يدعم فكرة إن الحوار كاتبه الزرقاني، خصوصا إن مستوى الحوار فعلا أعلى بـ كتير من صبري عزت مع احترامي ليه، والزرقاني كاتب عملاق، قائمة أفلامه تخض، هو أخو عبد الرحيم الزرقاني، وكان له قصة حب مضرب المثل مع عزيزة حلمي (وريثة فردوس محمد في دور الأم) واتجوزوا وخلفوا وعاشوا مع بعض لـ حد ما اتوفى هو الأول وبعدين هي، سبحان الله!

كان الزرقاني عمدة كتاب السيناريو والحوار، ويتولى أي حاجة ليها علاقة بـ المجال ده، يعني، رئيس قسم السيناريو في المعهد، رئيس جمعية مؤلفي الدراما، وهكذا، فـ كان لازم يسيب التمثيل بدري بدري ويركز مع الكتابة لـ حسن حظنا الوفير.

منتج "اللص والكلاب" هو جمال الليثي، أخو ممدوح الليثي، وعم عمرو الليثي، والتلاتة ظباط، جمال كان ظابط جيش، وكان عضو في تنظيم الظباط الأحرار، وبعد يوليو عبد الناصر اداله الشئون المعنوية، وإدارة شركة السينما، فـ راح فاتح شركة خاصة ليه أنتجت مئات الأفلام (مئات بجد)، وممدوح الليثي زي ما إحنا عارفين كان ظابط شرطة في الأول، واشتغل في البوليس فترة لـ حد ما اتجه للسينما مع أخوه، ووصل إنه بقى مدير قطاع الإنتاج في التلفزيون. أما عمرو، فـ دخل كلية الشرطة، بس خرج منها من غير ما يتخرج وبقى إعلامي وصحفي.

طب إيه؟ 
الفيلم نفسه فين؟

المرة الجاية بقى