"فيلو" اسمه الحقيقي أحمد، أنهى دراسته في معهد فني صناعي في الإسكندرية، ويبلغ من العمر 25 عاما، كان يغني راب فقط إلى أن التقى حودة ناصر "شاعر الغية"، الذي كتب له كلمات أغنية عن فلسطين في وقت الانتفاضة.

لم تخرج هذه الأغنية إلى النور، حيث ترك "فيلو" الراب، واقتحم عالم موسيقى وأغاني المهرجانات. وكان لنا هذا الحوار مع مؤسس فريق "الدخلاوية" السكندري لموسيقى وأغاني المهرجانات.

- ليه قررت تغني مهرجانات بالذات؟
المهرجان فكرته جت لي من أخويا، من أغنية "سمكة على بلطية"، ولأنه كان بيسمع شعبي، فقال لي إن في أغاني نازلة جديدة تعرف تعمل زيها، سمعت فعلا وبقيت بوزع بإستايل غربي، وأول مهرجان عملناه كان اسمه "مولد العفاريت".

- تفتكر كلماته؟
"عزيزي المشاهد.. عزيزي المستمع.. لنا ولكم لقاء مع العفاريت الخماسية"، دي كانت الداخلة، لأننا كنا 5 أفراد، وكان اسمه "العفاريت"، لأن ده كان اسم الفرقة زمان، ولما نزلت الأغنية سمّعت جدا، أكتر من أغاني الراب اللي كنت بعملها، فجيبت جهاز كمبيوتر جديد، وبدأت أتحمس وأشتغل.

استمع إلى مهرجان "العفاريت"

- كنت بتوّزع الأغاني فين؟
عندنا أوضة في بيتنا في الدور الأرضي، كنت بشتغل فيها.

- البيت كان شايف اللي بتعمله إزاي؟
محدش كان فاهم في الأول أنا بعمل إيه، وكله كان رافض، والجيران كانوا بيشتكوا ويقولوا مش عارفين ننام، بس لما الأغاني بقت في الشارع، فهموا بقى لما لاقوا الناس بتسمع.

استمع إلى مهرجان "الدخلاوية"

- إمتى سميتوا الفرقة "الدخلاوية"؟
لما عملت أنا وأخويا مهرجان بنفس الاسم، وساعتها لسه مكانش انضم لنا حودة ولا التوني، وكان موضوع المهرجان عن الصحاب، اللي بياخدوا الشاب من دول للإدمان، وبالصدفة بنعمل أغنية للتوني في بيته لمجموعة صحاب، لأن كان في ناس بتطلب مننا نعمل أغاني مخصوص عشان نفرحهم، وحودة شارك في كتابة كلمات المهرجان، والتوني غنى فيه بالصدفة، ومن هنا بقى الفريق اتكون.

- إيه الفرق بين المهرجان اللي "الدخلاوية" بتقدمه والمهرجانات اللي في القاهرة؟
الناس في القاهرة بترص، إحنا بقى بنغني في المهرجان، وأكتر حاجة بنهتم بيها هي اللحن، وده اللي بقى بيميزنا لغاية ما بقينا القمة الدخلاوية.

استمع إلى مهرجان "خمسة باب"

- اتعاونتوا مع فرق في القاهرة مش كده؟
آه اتعاوننا مع سادات وفيفتي من سنتين تقريبا، وأنا أعرف أصلا سادات من زمان، وعملنا كذا مهرجان منهم: "خمسة باب، دقينا مسمار، خط النار، أنا"، وكمان "دنيا" في ألبوم حيطة لها ودان، وهما أكتر من إخواتي.

- إيه المشاكل اللي بتواجه المهرجان في إسكندرية؟
في ناس مكانتش قابله الموضوع، لكن بعد شوية تقبلوه، وفي ناس كانت بتداري إنها بتسمعنا، بس كنت بعرف إنهم بيسمعوه بينهم وبين نفسهم، مش عارف ليه، ومنها مثلا مهرجان "فرتكة".

- الغُنا أسهل في إسكندرية ولا في القاهرة؟
في إسكندرية عشان منطقتنا والناس بتحبنا، بس برضه أغانينا انتشرت في القاهرة.

استمع إلى مهرجان "القمة"

- شايف الإقبال على مهرجان القمة إزاي؟ وهتقدموا إيه جديد؟
الحمد لله مبسوط بده جدا، وهنقدم أغنية اسمها "لسه هنذيع"، وفي العموم إحنا بنقدم رسالة في كل مهرجان زي الراب بالظبط.

- إيه رأيك في حفلتكم اللي عملتوها في "دي كاف"؟
دي أول مرة نشارك، وإن شاء الله مش هتبقى آخر مرة، ده غير إن التذاكر كانت خلصانة كلها.