سؤال مهم جدًا.. إزاي نختار السكن المناسب؟

سؤال يبدو صعب جدًا، لكن لو سألنا نفسنا شوية أسئلة ودورنا على أجوبة لتلك الأسئلة، هنعرف نختار السكن الصحيح والمريح لينا واللي بيلبي متطلباتنا واحتياجاتنا.

دايمًا بنلاقي لينا طلبات في البيت اللي هنسكن فيه، بنفضل ندور على الطلبات دية لحد ما نلاقيها في بيت أو على الأقل بنلاقي أغلبها.
طيب.. يلا نبتدي الأسئلة:

1- أنا عايز منطقة هادية جدًا ولا بحب الزحمة بدوشتها؟

2- عايزين نسكن في "كومباوند مقفول" ولا ممكن نسكن في حي عادي في قلب العاصمة.

3- هل أنا معايا عربية فهقدر أسكن في حتة بعيدة عن المواصلات؟ ولا لازم السكن يكون معاه مواصلات مضمونة لعدم وجود عربية؟

4- هل أنت من النوع اللي لازم يكون جنب بيته أسواق؟ ولا ممكن تعتمد على أنك تشتري احتياجات البيت من أي "هايبر ماركت" في "الويك إند" فمش فارق معاك قرب الأسواق؟

5- طيب هل حضرتك مواطن رياضي وممكن تسكن في دور عالي وبدون وجود أسانسير؟؟ ولا الأسانسير ضرورة حتى لو بيتك في الدور الثاني؟؟

6- هل مهتم أنك تكون ساكن بالقرب من مامتك وباباك؟ ولا الموضوع ده مش شرط أبدااااً ؟

7- طيب نيجي بعد كده لحاجة مهمة قوي قوي قوي.. الشقة بقى لازم تكون "هاوية" والهواء فيها يشرح القلب كده، ولا مش فارق معاك عشان أنت عاشق للتكييفات؟

8- طيب أنت لازم تختار بين اختيارين.. إمّا إن جزء الاستقبال والصالون والسفرة "الجزء الخارجي" هو اللي يبقى البحري بتاعك؟ ولا تفضل أكتر إن البحري بتاعك يكون هو غرفة "الليفنج" وغرفة النوم و"الجزء الداخلى" للبيت؟؟

9- طيب فرضًا يعني أننا استقرينا على كل احتياجاتنا اللي فاتت دي.. فيه موضوع مهم جدًا جدًا، ألا وهو عدد غرف البيت.. وده بيترتب على عدد أفراد الأسره طبعًا.. اختار المساحة المناسبة عشان متندمش من سوء التوزيع بعد كدة.

10- ناس كتيرة بتفكر تسكن في "الدوبلكس"، وهو بيكون شقتين فوق بعض وفيه سلالم بتوصل بينهم.. طيب مش بالذمة الفيلا اللي بجنينة صغيرة أحلى وأجمل وأهدى؟؟ زود شوية فلوس صغنونة وخليها فيلا عشان عيون الجنينة والخضرة والشمس والهواء.