المدفعجية.. فرقة اسمها يعبر عما يدور داخل عقول أعضائها، وعن الرسالة التي يقدمونها من خلال كلماتهم وألحانهم في مجال "المهرجان".. الفرقة مكونة من 4 أعضاء هم (ديزل – دولسيكا – شندي – كنكة)، والدي جي "وزة"، وهم ضمن فرق فن المهرجان التي تشارك في الألبوم المجمع بـ"ستويدو 100 نسخة"، الذي تم تأجيل صدوره عقب مقتل "أحمد زؤلة" في أحداث المطرية.

ديزل..

من الأركان الأساسية لفرقة "المدفعجية"، وكان مغرم ببرامج المزيكا، وجدد في الألحان التي يضعونها على الأغاني الخاصة بهم، خصوصا من خلال دمج الغربي مع الشرقي، ليصبح له تيمة خاصة.

- ليه سميتوا نفسكم المدفعجية؟

هو اسم بيعبر عن نفسه.

- يعني عايزين تقولوا إن انتوا جامدين؟

نقول إن إحنا جامدين بس بأغانينا، وهو اسم جاي من مخزن الأسلحة.

- هل الناس في المناطق الشعبية مستقبلين المهرجان ولا مستغربينه؟

في الأول مكنوش متقبلين الموضوع أوي بما فيهم والدي ووالدتي، بس اللي كانوا بيسمعونا أطفال وشباب صغير عمره ما يزدش عن 20 أو 21 سنة، لما كان المهرجان لسه في مدينة السلام بس، لغاية ما بقى في المحافظات.

وعلى فكرة إحنا "إيه كلاس" في بلدنا، وطلعنا برة مصر، ومنتشرين في المحافظات كلها، على الرغم من الانتقادات الكتير اللي بنتعرض لها.

- زي إيه؟

يعني في نقاد بعينهم بيقولوا إن ده إسفاف

- طب مش شايف إنك لما تكون مؤثر في الشباب لازم تختار الكلام اللي بتغنيه؟

وده اللي عملناه، وده يبقي واضح جدا لو قارنا بين مهرجان 2008 ومهرجان 2015، هاتلاقي فرق كبير.

- الدول اللي برة بتقدر المهرجان للدرجة دي؟

جدا، لأنهم بيعرفوا الشخص من مزيكته.. وهناك أنا شوفت حاجات انبهرت بسببها، وكان نفسي يبقي في منها في بلدي.

- هل التعاون مع "محمد رمضان" في فيلم قلب الأسد أضاف لكم؟

طبعا، لأن إحنا كنا معروفين كأسامي بس، إنما دلوقتي إحنا وشوشنا طلعت في الميديا.

- إمتي بقى لكم مدير أعمال؟

من سنتين، لما الشغل بدأ يزيد.

- وبتختاروه علي أساس إيه؟

أولا الأمانة، ويبقى أخونا، يعرف يشغلنا صح، لبق، ومهضوم من اللي حوالينا.

إسلام شندي ..

كان صديقا لـ"المدفعجية" منذ البداية، خصوصا أنهم جميعا من مدينة السلام، وعملوا في البداية كـ دي جي قبل ظهور "المهرجان"، ومع تغير الأمر جددوا من أنفسهم، فقدموا بعض الكلمات على المايك، مصحوبة بموسيقي متطورة تعتمد بشكل أساسي على آلة "الدرامز".

- بتقدر تقيس سن الناس اللي بيسمعوا المهرجان؟

جمهور المهرجان هم الأكثر حاليا، لأنه طالع من وسطهم، فهو ثقافة شارع، ومفيش فنان كبير يقدر يوصف حالة اجتماعية، هو كبيرة يغني "مصر" لكن ميقدرش يشتغل عن شاب حالته وحشة، إحنا بقى بنعرف نعمل ده، فعندنا حرية أكتر.

- زي إيه؟

إحنا قدمنا أغنية اسمها "حلم النهضة" بتتكلم عن قضايا اجتماعية كتير بداية من البنزين، الدولار، والجنية اللي بقى تحت الأرض ومبقاش موجود.

- وإيه الجديد اللي بيضيفوه المدفعجية في المهرجان؟

بنقدم كلمات أفضل، وبنطور في المزيكا، وهندخل آلات جديدة زي البيانو – الناي – فميبقاش بس اللي بنعتمد عليه هو الدرامز.

- طب والناس اللي بتقول إن المهرجان إسفاف تقولهم إيه؟

مع احترامي لهم، لو ده إسفاف بالنسبة لهم فهو بالنسبة لنا مهم، إحنا لنا فيديو على اليوتيوب وصل لـ17 مليون مشاهدة، وبعدين كل حاجة فيها الحلو وفيها الوحش، ولو مفيش نقد يبقي مفيش نجاح.

دولسيكا..

- إيه أول حاجه غنتوها؟

كل حاجه في الأول كانت "طاخ تش"، ده اللي كنا حابينه زمان إنما دلوقتي الموضوع أتغير.

- بتغني مهرجانات من إمتي؟

من زمان جدا، يعني نقدر نقول تقريبا من 2000 أو 2002، بس كانت أغاني في الشارع، وده لأني حابب النوع ده من الفن، ولما بدأت في المهرجان من 2007 حبيته، ولغاية النهارده بنطور فيه.

- إيه اللي بتقدموه جديد في المدفعجية؟

هيبقي عندنا أغنيتين في ألبوم "ستويديو 100 نسخة"، والأغاني دي هتتكلم عن الشارع المصري.

- بتنقدوا الشارع يعني؟

مش نقد أوي إحنا بنقدم آفيهات خفيفة عادية.