نبيلة عبيد تفض خناقة بين الريحاني وماري منيب!
الخميس، 22 يناير 2015 10:38 ص
بينما تبحث نبيلة عبيد عن موهوبات جديدات يشبهنها، من خلال برنامج سيذاع على فضائية خليجية، تساءلت لماذا لم نبحث عن نجيب الريحاني جديد، وحين نامت شاهدت حلما ملئ بالتناقضات بسبب الريحاني، سأحكيه لكم في السطور التالية.
دخل الريحاني غرفة قديمة بسيطة ولكنها مرتبة أنيقة، فإذا بالفنانة ماري منيب تقابله قائلة: انت جيت ياوش المصايب، مش كفاية يوم ولادتك كان مشؤوم؛ في ذكرى يوم ميلادك اللي كان يوم 21 يناير 1889 جه عزرائيل وقبض روووحيّ سنة 1969.
الريحاني: يعني انتي فضلتي عايشة لحد سنة 69، طيب كان كفاية عليكي قوي لحد كدا، انتي هتخلدي فيها ياوليه، انتي على حسب ما سمعت كنتي مابتعمليش غير أدوار الحموات يعني كنتي كبرتي.. دا انتي كبيرة من أيام ما عملتي معايا "سي عمر"... أما أنا اتخطفت سنة 49 وأنا يادوب 60 سنة.
أفحمت ماري منيب من كلام الريحاني وخففت من لهجتها وقالت: بس تعرف يا سي نجيب إحنا زي بعض، أصولنا مش مصرية، بس بقينا مصريين أكتر من مصر نفسها، صحيح أنا أساسي من بيروت وانت ياخويا اسمالله عليك من العراق، لكن انت اتولدت وعشت في باب الشعرية وأنا سكنت في شبرا لما جيت من لبنان وأنا في اللفة، وانطبخنا من جديد في الفرن المصري، لحد ماقدرنا نوصل للناس شخصيات من قعر المجتمع، ولا إيه يا كشكش بيه، ولا يا سي حمام، ولا بلاش حمام دي لا تفتكرني ليلى مراد ولا حاجة وتحبني.
الريحاني: أحبك إيه، بس يا وليه اسكتي، انتي كان لازم تنكدي علينا وتموتي النهارده، انتي ما تعرفيش إن النهارده ربنا أنعم علينا بنعمة كبيرة قوي... شمس وطلعت على الدنيا نورتها، دش بارد نزل على الناس الحرانة في بؤونة وأنعشهم، طبق مهلبية عليه قشطة ومكسرات وراح للجعانين وشبعهم؛ زي النهارده ياوليه 21 يناير، اتولدت نبيلة عبيد سنة 1945.
ماري منيب: ومالك كدا ياخويا هتعيط وانت بتتكلم، دي زي ولادك ولا أقولك دي قد أحفادك، دا انت لما مت كانت لسه في حجر أمها، على الأقل أنا شفتها في أواخر أيامي لما عملت "رابعة العدوية" واتجوزت المخرج سي عاطف سالم بعده على طول، وبيقولو انها بقت نجمة مصر الأولى من نص السبعينيات كدا لحد نهاية التسعينيات، وعملت ياخويا "الراقصة والسياسي" و"حارة برجوان" و"العذراء والشعر الأبيض" وأدوار كتيرة كانت متألقة فيها.
الريحاني: خليني في عيد ميلادي، انتي عارفة إن في اليوم دا، اتولد كريستيان ديور، مصمم الأزياء الفرنسي الأشهر في العالم ودا سنة 1905، واللي أسس الشركة اللي شالت اسمه وبقت من أشهر الماركات في العالم، دا حتى بيقولوا بقت تعمل برفانات وكرافتات... شفتي عيد ميلادي مليان شياكة وجمال ازاي، يعني نبيلة عبيد وكمان كريستيان ديور.
ماري منيب: أنا ياخويا ناس كتيرة حزنت عليا وماتت ورايا وفي نفس اليوم اللي مت فيه؛ يعني الممثلة القديرة زوزو ماضي، ماتت زي النهارده سنة 1982، وكانت دايما بتقوم بدور الهانم الأرستقراطية، مش البلدي اللي زيك.
نجيب الريحاني: أنا اللي بلدي برده يامدوباهم اتنين، دا أنا يوم ما اتولدت اتولد الأمير سطام بن عبد العزيز آل سعود سنة 1949، عارفه يعني إيه سطام ياوليه، يعني أمير منطقة الرياض، يعني من العيلة المالكة في السعودية.
ماري منيب: أنا بقه لما مت اتقهر عليا سي أحمد الصباحي، رئيس حزب الأمة اللي كان مترشح للرياسة، ومات ياعيني زي النهارده سنة 2009.
الريحاني يبتسم من الغيظ: والنبي إيه، مش دا الرجل أبوطربوش، اللي راح رشح نفسه في الانتخابات قدام حسني مبارك سنة 2005، ومع ذلك انتخبه، وطلع قال للناس انتخبوه.. أمال كان مرشح نفسه قصاده ليه، افتكريلنا حاجة تانية ياشيخة والنبي.
ماري منيب: المرة دي ما تتكلمش... من الناس ياعيني اللي حزنت على فراقي وماتت زي النهارده 21 يناير سنة 2014، كان سي الأستاذ الممثل فاروق نجيب، وانت عارف إن دمه كان خفيف زيي تمام.
وهنا دخلت نبيلة عبيد إلى الغرفة التي يجلس بها نجيب وماري، فقال الريحاني: إيه القمر اللي نور ليلتنا دا، إيه الدفا اللي ضيع البرد من جتتنا دا، يادي الورد اللي فتح يادي... يادي الـ... فقاطعته ماري قائلة "مالك هتاكل البنية بعنيك، حابس حابس، تعالي ياحبيبتي اعدي جنبي، بسم الله ماشاء الله...تعالي أنا زي والدتك تمام، قوليلي بقه إيه اللي جابك عندنااااا.
نبيلة عبيد: أبدا سمعت نقيركم وأنا معدية ولقيتكوا واحشنّي قولت ازوركم... أنا عاوزة أقولكو إن اليوم اللي اتولد فيه الأستاذ نجيب واللي حضرتك اتوفيتي فيه، شاف أحداث سياسية مهمة، أو نقدر نقول ليها تأثير على الواقع السياسي، لأن فيه مات باسل ابن الرئيس السوري حافظ الأسد سنة 1994، والناس كانت بتقول إنه كان هيكون خليفة أبوه في حكم سوريا لو فضل عايش، وزي النهارده كان الملك الانجليزي ريتشارد قلب الأسد والفرنسي فيليب الثاني بيحشدوا جيوشهم ورايحين على بيت المقدس، لاسترداده من صلاح الدين، واللي قالوا عليها الحملة الصليبية الثالثة.
الريحاني: شوفي عشان يبقى فال حلو عليكي، بما إننا أموات لازم نديكي حاجة عشان عمرك يطول، خدي المفتاح دا بتاع عربية أوبل أحدث موديل، ولعلمك النهارده ذكرى تأسيس شركة أوبل اللي اتنشأت في 21 يناير 1899.
إلى هنا انتهى حلم نبيلة عبيد الوهمي، والذي رأيته بالنيابة عنها، أتمنى ألا يزعجها.
