إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

المشكلة مش ف انك تحاول وتفشل أبدا على الفكرة.. الأزمة الحقيقية ف الناس اللي معتبرة نجاحها هو انها تفشلك بالعافية وخلاص.   

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الخميس 8/3/2018 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

متخليش ذكائك المفرط يقف مابينك وبين الحب بكل اشكاله.. الحب عاوز دماغ اوقات متخلية عن ذكائها عشان الايام تعدي والتفاصيل تدوب.. انما هتركز بزيادة محدش هيعجبك ولا هتعجب حد.. روعى للكلام وصحصح وإفهم بليز

برج الحمل عملياً

( الشغل والمذاكرة والتخطيط لبكرة ):

متضحكش على نفسك بكلام عامل زي يفط النيون بتاعة اعلانات الشوارع.. مبهر من بعيد ولما تقربله متلاقيش حاجة غير دعاية لمنتج ف الاغلب مش موجود.. بلاش عشان انتا كدة عامل زي اللي عيان وبياخد مسكنات وبس بدل مايتعالج بدوا حقيقي مخصوص للحاجة اللي بيشتكي منها

برج الحمل صحياً

( نفسيا وجسمانيا وكل مايخص طاسة المزاج ):

صحيا النهاردة محتاج تنام حبة ف امان ومحتاج برضة مساج بس انتا مطنش متفهمش ليه

إعرف توافق برج الحمل مع باقي الأبراج النهاردة:

متوافق مع الابراج الحسواكية والفرفورية والحنتوسية والنارية والهوائية..

إعرف حظك اليوم برج الثور بالتفصيل الخميس 8/3/2018 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

النهاردة انتا محتاج ف حياتك بطاطس كتير ومعاملة واهتمام ودلع اكتر واكتر.. ع الله دة يخليك تنبط حبة

برج الثور عملياً

( الشغل والمذاكرة والتخطيط لبكرة ): 

محتاج حب ومكسوف وطايح ف الكوكب كله ليه كدة.. اهدى على نفسك ياحبيبي مش كدة.. اهدى لتزعل بالجامد

برج الثور صحياً 

( نفسيا وجسمانيا وكل مايخص طاسة المزاج ):

صحيا النهاردة ف الاغلب انتا عندك مشاكل ف السباكة الجسمانية او النفسية.. روح إكشف

إعرف توافق برج الثور مع باقي الأبراج النهاردة:

متوافق مع الابراج البسكوتية والبربوشية والكتكوتية والبرمائية والهوائية والمائية والترابية..

إعرف حظك اليوم برج الجوزاء بالتفصيل الخميس 8/3/2018 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

مشاعرك محتاجة حد يسمعها وانتا مش فاضي ف الاغلب او خايف تستفرد بيك وتخلص منك حساب القديم والجديد مرة واحدة ولا حاجة

برج الجوزاء عملياً 

( الشغل والمذاكرة والتخطيط لبكرة ):

هتحقق نجاح النهاردة ف حاجة بسيطة بس هتبسطك جدا بإن الله ودة المهم اساسا بصراحة

برج الجوزاء صحياً 

( نفسيا وجسمانيا وكل مايخص طاسة المزاج ):

صحيا النهاردة كل حاجة ماشي حالها بس ممكن تبقى افضل خصوصا لو اهتميت حبة بشكل عام وبطلت اهمال

تعرف على توافق برج الجوزاء مع باقي الأبراج النهاردة:

متوافق مع الابراج البرجماتية والحنكوشية والنباتية والسمكمكية والترابية والمائية والهوائية..

إعرف حظك اليوم برج السرطان بالتفصيل الخميس 8/3/2018 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

اقرا علامات الحياة النهاردة كويس وخد بالك وخليك مفتح حبة عشان تعرف تنبسط

برج السرطان عملياً 

( الشغل والمذاكرة والتخطيط لبكرة ):

حبة بواخة من الحياة ويعدوا بإذن الله.. متضايقش نفسك

برج السرطان صحياً 

(نفسيا وجسمانيا وكل مايخص طاسة المزاج ):

صحتك النهاردة تمام.. خد بالك من التراب بس مش اكتر

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والبرمائية والكتكوتية والمائية والنارية والبهوائية ( اخت الهوائية بس مبهوئة حبة).

إعرف حظك اليوم برج الأسد بالتفصيل الخميس 8/3/2018 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متشحتف وبتجري دايما ليه على الحاجات الغلط.. مليون مرة نقول خليك واقعي خليك واقعي.. كدة هتتعب فعلا ومش هتحس بالرضا الحقيقي عن نفسك

برج الأسد عملياً 

( الشغل والمذاكرة والتخطيط لبكرة ):

نقي احلام تعرف تحققها مش يدوبك تعدي من جنبها ومتلحقش تقف تسلم عليها ولا تاخدها حضن يكسر ضلوعها حتي.. نقي وسهل علي نفسك حبة

برج الأسد صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة تعتني بركبك حبة وبكعوب رجليك

تعرف على توافق برج الأسد مع باقي الأبراج النهاردة:

متوافق مع الابراج الفشكولية والباراكودية والسمكمكية والكرِيبّية والإستحواذية والهوائية والترابية والنارية..

إعرف حظك اليوم برج العذراء بالتفصيل الخميس 8/3/2018 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محتاج تشرب حلبسة كتير الليلة باستمتاع وتقول "لسة.. لسة قدامي كتير عقبال ما احس اني راضي عن نفسي وعن اللي بعمله عشان انا لسة معملتش اي حاجة اساسا والمفروض ابطل غرور على الفاضي".

برج العذراء عملياً 

( الشغل والمذاكرة والتخطيط لبكرة ):

متتخانقش عشان تثبت وجهة نظرك لمجرد انك مش قادر تقنع اللي قدامك بالمنطق البسيط

برج العذراء صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة اهتمام بودانك وسنانك وضهرك زي امبارح بالظبط وزود عليهم الجيوب الانفية برضة بالمرة

تعرف على توافق برج العذراء مع باقي الأبراج النهاردة:

متوافق مع الابراج البرطمانية والكستبانية والبرمائية والكتكوتية والكهربائية والنارية والبرمائية..

إعرف حظك اليوم برج الميزان بالتفصيل الخميس 8/3/2018 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حاول تزقطط النهاردة بالعند ف وش اي مشكلة واي حد بيحاول ينكد عليك.. متستسلمش وقاوم وقاوم وقاوم لحد ما تزهقه ف عيشته.. اياك يشوف دموعك ولا كسرة نفسك.. اياك

برج الميزان عملياً 

( الشغل والمذاكرة والتخطيط لبكرة ):

انتا مش ضعيف ابدا.. متنفعش تبقى ضعيف مهما اتهيألك عن نفسك لأنك ياما عديت من حاجات تجيب لأي حد تاني انهيار عصبي واديك اهو زي الفل وحتة واحدة.. مستني اثبات اكتر من كدة ايه بالظبط؟.. انتا مش ضعيف

برج الميزان صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة متخرجش ف التراب والجو المقرف دة الا للضروري وبس

تعرف على توافق برج الميزان مع باقي الأبراج النهاردة:

متوافق مع الابراج الدرامية والبحرية والبرميلية والسمكمكية والنيلية والفضية والبربئية والفرفورية والنارية والهوائية..

إعرف حظك اليوم برج العقرب بالتفصيل الخميس 8/3/2018 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

صفي نيتك النهاردة على قد ماتقدر وافتكر دايما ان اللي بيصفي نيته بيفلح ف دنيته

برج العقرب عملياً 

( الشغل والمذاكرة والتخطيط لبكرة ):

من حقك تختار تتعامل مع الناس اللي ف نفس مستوى ذكائك على قد ماتقدر بس حاول متتعمدش تتعامل مع غباء وتلوم عليه ف حين انك انتا اللي روحتله برجليك

برج العقرب صحياً 

( نفسيا وجسمانيا وكل مايخص طاسة المزاج ):

صحتك النهاردة مزقططة حبة بس خلي بالك الجو فيه تراب.. خد بالك من صدرك حبة احتياطي

تعرف على توافق برج العقرب مع باقي الأبراج النهاردة:

متوافق مع الابراج الحنكوشية والكهربائية والبرطمانية والكهرمانية والترابية والمائية والنارية..

إعرف حظك اليوم برج القوس بالتفصيل الخميس 8/3/2018 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

المضمون دايما اهم من الغلاف.. اظن انتا فاهم الكلام دة كويس وعارف قيمته ايه ومعناه ومش محتاج شرح او تفصيص او تسييح اكتر من كدة

برج القوس عملياً 

( الشغل والمذاكرة والتخطيط لبكرة ):

هتقول كلام شكله حلو النهاردة ومبهر وملون من برة بس

برج القوس صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة عناية خصوصا ببشرتك وجيوبك الانفية عشان الجو فيه تراب كتير

تعرف على توافق برج القوس مع باقي الأبراج النهاردة:

متوافق مع الابراج الفركتوزية والحبشتكانية والحنجورية والهوائية والبرمائية والمائية

إعرف حظك اليوم برج الجدي بالتفصيل الخميس 8/3/2018 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متتكسفش تعمل الصح طالما باينك وواضحلك بالدليل وبالاحساس.. دي نعمة مش سهلة والله.. استغل الفرصة ومتخافش احسن دلوقتي وان شاء الله خير

برج الجدي عملياً 

( الشغل والمذاكرة والتخطيط لبكرة ):

مستني ليه حد يقولك ايه الصح وايه الغلط.. هو انتا صغير مثلا ولا ايه.. بلاش فرهدة ف الناس الي بتحبك.. بلاش

برج الجدي صحياً 

( نفسيا وجسمانيا وكل مايخص طاسة المزاج ):

صحتك النهاردة فل.. انزل اتفسح ولا خش سينما ولا اقعد ع القهوة.. انزل واتحرك وانبسط

تعرف على توافق برج الجدي مع باقي الأبراج النهاردة:

متوافق مع الابراج البربئية والمونوكرومية والحنتوسية والحلبسية والكشرية والترابية والهوائية والنارية..

إعرف حظك اليوم برج الدلو بالتفصيل الخميس 8/3/2018 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حيران تفرح وتزقطط ولا تتنكد وتكتئب.. عموما لو مهتم فعلا بالموضوع دة متقلقش ابدا لأنك لو قسمت وقتك صح النهاردة هتعرف تعمل الحاجتين وبنجاح كمان.. ياللا ياعم

برج الدلو عملياً 

( الشغل والمذاكرة والتخطيط لبكرة ):

متسقيش ف شوربة النكد مهما حصل النهاردة.. الكبير كبير بنفسه وف نفسه وانتا عارف كويس جدا قيمة نفسك وقيمة دماغك.. مش انتا اللي تقع وتزهق وتتهد.. انتا قطر اللي يقف قدامه صدفة او عن عمد لازم يتفرم

برج الدلو صحياً 

( نفسيا وجسمانيا وكل مايخص طاسة المزاج ):

صحتك اليوم كويسة وماشي حالها.. روق بالك انتا بس النهاردة ومتديش فرصة لحد ميسواش ضفرك اللي بتطيره بالمقص يضايقك.. إوعى

تعرف على توافق برج الدلو مع باقي الأبراج النهاردة:

متوافق مع الابراج الكستبانية والدخانية والمونوكرومية والكتكوتية والبرمائية والكبريتية والجنية والترابية والهوائية والخيالية..

إعرف حظك اليوم برج الحوت بالتفصيل الخميس 8/3/2018 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

جميل النهاردة وزي القمر.. جاهز تتحب سواء من بشر او من سكان كواكب تانية اجمل واصفى وميعرفوش لا كدب ولا لوع ولا خداع ولا كلام مذوق سام

برج الحوت عملياً 

( الشغل والمذاكرة والتخطيط لبكرة ):

إتسرح الليلة وحط برفان احتياطي وفكك من اي حد نكد ايا كان

برج الحوت صحياً 

( نفسيا وجسمانيا وكل مايخص طاسة المزاج ):

صحيا انتا محتاج متسمعش نصايح من اي حد ولا حتى انا

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والكتكوتية والمستحية والنارية والترابية والمائية والهوائية