إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

ممكن تكون معظم مشاكلك ناتجة عن ان جسمك ضيق على روحك ومحتاج مقاس أكبر نمرة او نمرتين.   

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الأحد 11/2/2018 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

محتاج تلعب وترسم وتغني براحتك النهاردة.. محتاج تزقطط وتفرفش وتفكك من النكد ومن التفكير ف النكد.. محتاج تركز ف روحك مش ف افعال الأرواح التايهة التانية خالص..

برج الحمل عملياً

( الشغل والمذاكرة والتخطيط لبكرة ):

جواك شوية هيستيريا صغنتتين.. لو ركزت معاهم النهاردة هيكبروا ويبقوا قد الاوضة وهيبلعوك.. اما لو بصتلهم كل شوية كدة وانتا قاعد بتلعب وعملتلهم باي باي هتنبسط وهتكمل اليوم على خير وسعادة وراحة نفسية..

برج الحمل صحياً

( نفسيا وجسمانيا وكل مايخص طاسة المزاج ):

صحيا النهاردة انتا زي الفل.. حاول بس تاكل كويس وتلعب كويس وتغني برضة كويس جدا..

إعرف توافق برج الحمل مع باقي الأبراج النهاردة:

متوافق مع الابراج الحسواكية والفرفورية والحنتوسية والبرمائية والترابية والهوائية..

إعرف حظك اليوم برج الثور بالتفصيل الأحد 11/2/2018 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

من حقك توفر طاقتك الحُبية (جاية من حُب) للي يستاهلها طبعا.. امال هتمشي تحب ف الناس عمال على بطال ولا ايه.. مش اصول ابدا..

برج الثور عملياً

( الشغل والمذاكرة والتخطيط لبكرة ): 

من حقك برضة توفر طاقتك العملية للحاجات اللي تستاهلها وبس سواء ف الشغل او ف المذاكرة بدون احساس ايا كان بالذنب تجاه الناس او الزمكان..

برج الثور صحياً 

( نفسيا وجسمانيا وكل مايخص طاسة المزاج ):

صحيا النهاردة انتا محتاج تستوعب انك لازم تبقى مستريح ومبسوط عشان تعرف تذاكر وتشتغل وتحب برضة بشكل مبسوط وجميل.. ومحتاج تقتنع انك اهم من اي حاجة بتعملها ف التلات حاجات دول برضة على فكرة..

إعرف توافق برج الثور مع باقي الأبراج النهاردة:

متوافق مع الابراج البسكوتية والبربوشية والكتكوتية والترابية والنارية والبرمائية..

إعرف حظك اليوم برج الجوزاء بالتفصيل الأحد 11/2/2018 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

صوتك حلو ودي حاجة محدش يقدر او يجروء حتى انه يختلف عليها بس معلش.. عشان خاطر الكوكب ومستقبله كله متغنيش النهاردة قدام اي حد خالص..

برج الجوزاء عملياً 

( الشغل والمذاكرة والتخطيط لبكرة ):

محدش بيمنعك تغني او بيتهمك لا سمح الله ان صوتك وحش ولا حاجة.. المسألة كلها ان في فضائيين فاضيين وماشيين ف الفراغ مابين الكواكب بيدوروا على اي حد صوته حلو عشان يخطفوه.. عشان كدة لازم متغنيش النهاردة لأن الكوكب مينفعش يكمل حياة من غير صوتك لو لا قدر الله إتخطف الليلة..

برج الجوزاء صحياً 

( نفسيا وجسمانيا وكل مايخص طاسة المزاج ):

صحيا النهاردة انتا زي الفل بس ياريت متقعدش على سطوح أي مبنى بالليل خالص..

تعرف على توافق برج الجوزاء مع باقي الأبراج النهاردة:

متوافق مع الابراج البرجماتية والحنكوشية والنباتية والنارية والهوائية..

إعرف حظك اليوم برج السرطان بالتفصيل الأحد 11/2/2018 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

جميل ومتوحش النهاردة ماشاء الله.. ياريت تفيد الكوكب بجمالك وتحتفظ لنفسك بالتوحش عشان في متوحشين كتير غيرك وممكن يحطوا عليك من غير ماتلحق تجري..

برج السرطان عملياً 

( الشغل والمذاكرة والتخطيط لبكرة ):

متستسلمش لليآس مهما حصل وثق ف نفسك وف شطارتك.. مسيرك هتلاقي دايما فرص افضل ف الحياة بشكل عام

برج السرطان صحياً 

(نفسيا وجسمانيا وكل مايخص طاسة المزاج ):

صحتك النهاردة محتاجة حبة عناية استباقية احتياطية ومساج..

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والبرمائية والترابية والهوائية والنارية..

إعرف حظك اليوم برج الأسد بالتفصيل الأحد 11/2/2018 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

هتفضل لإمتى مدعي العقل وانتا من جواك متشحتف على الحاجات الغلط دايما؟..

برج الأسد عملياً 

( الشغل والمذاكرة والتخطيط لبكرة ):

حاول تنقي احلام غير الاحلام المستحيلة للي بتحلم بيها دايما دي.. ليه مصر تصعب على نفسك كل حاجة ولا انتا من جواك بتفضل المستحيل عشان تريح نفسك من الصراع على الممكن والمحتمل والسهل المنال ولا عاوز تبان مختلف ولا ايه بالظبط حكايتك جننتنا معاك والله..

برج الأسد صحياً 

( نفسيا وجسمانيا وكل مايخص طاسة المزاج ):

صحتك النهاردة مجنونة زيك ماشاء الله.. ودة طبيعي طبعا.. لما تنبسط هتحس ان صحتك كويسة ولما ترازي نفسك صحتك رخرى هتترازى معاك.. دة طبيعي جدا جدا

تعرف على توافق برج الأسد مع باقي الأبراج النهاردة:

متوافق مع الابراج الفشكولية والباراكودية والسمكمكية والترابية والنارية..

إعرف حظك اليوم برج العذراء بالتفصيل الأحد 11/2/2018 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

قلبك وعقلك متفقين عليك خد بالك.. الحل الوحيد عشان تعرف ترازيهم هو انك ترشيهم هما الاتنين بالاكل والخروج والفسح والزقططة وبس

برج العذراء عملياً 

( الشغل والمذاكرة والتخطيط لبكرة ):

عمليا انتا كويس وحالك ماشي.. محدش يعرف ازاي وليه بس اهو.. حالك ماشي بشكل غامض بس المهم انه ماشي وخلاص وانتا مش عاوز اكتر من كدة اساسا..

برج العذراء صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها وكويسة بس ياريت نراعي القولون حبة ف الاكل ونراعي اننا كل ماسكتنا وفضلنا نفكر ونفكر ونفكر اكيد ف الاخر هنصدع والتفكير الكتير دة مش هيفيدنا ف حاجة ف ياريت تفك دماغك حبة وتخرج تشوف اصحابك ولا تخش سينما ولا تعمل اي حاجة

تعرف على توافق برج العذراء مع باقي الأبراج النهاردة:

متوافق مع الابراج البرطمانية والكستبانية والبرمائية والنارية..

إعرف حظك اليوم برج الميزان بالتفصيل الأحد 11/2/2018 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حاول متجاملش الناس بزيادة وترجع تندم بعدين انك اديتهم اكتر من مساحتهم ف حياتك عشان يتبقالك على الاقل حتة ليك تبقى مساحتك المنطقية الخاصة بدل ما انتا بتديهم كل حاجة وترجع تختفي منهم وتهرب عشان مش قادر تواجه مسألة كونك انتا اللي متبرع بكل حاجة عشان تسعدهم وبس

برج الميزان عملياً 

( الشغل والمذاكرة والتخطيط لبكرة ):

انتا مش محتاج ف حياتك النهاردة اكتر من شوية تشجيع.. مش أكتر.. محتاج تشجع حد وتاخد بايده مش انتا اللي محتاج يشجعك.. وان كان تحت فعل تشجيع الآخر دة تشجيع مستتر ليك انتا برضة بس مش منه.. من الحياة ذات نفسها ومن إحساسك الكويس ناحية نفسك ف الاخر خالص بعد ما تشجعه وتقف تقول لنفسك.. يااه دانا جامد اهو وبعرف اقوم الناس على رجليها واشجعهم يعيشوا وينبسطوا.. ف تقدر تعتبر النهاردة ان اي تشجيع لأي حد هتعمله هو ف الاساس تشجيع لنفسك..

برج الميزان صحياً 

( نفسيا وجسمانيا وكل مايخص طاسة المزاج ):

صحتك النهاردة زي الفل.. حاول بس تاخد شاور طويل وتحط برفان عشان احتمال تتباس النهاردة ولا حاجة محدش ضامن الظروف..

تعرف على توافق برج الميزان مع باقي الأبراج النهاردة:

متوافق مع الابراج الدرامية والبحرية والبرميلية والسمكمكية والنيلية والفضية والنارية والبرمائية..

إعرف حظك اليوم برج العقرب بالتفصيل الأحد 11/2/2018 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

انفراجة هتحصل ف اساريرك النفسية بشكل اكيد.. خصوصا لو حصلت على دعم عاطفي ناجح ما.. بقالي كتير بقولك كل فترة نفس الكلام وانتا متخيل ان الانبساط هيجري ويرمي نفسه ف حجرك وانتا قاعد كدة مبتعملش حاجة مش فاهم ازاي.. قوم اتحرك وإتصرف وإنبسط..

برج العقرب عملياً 

( الشغل والمذاكرة والتخطيط لبكرة ):

مهم لما تغلط تعترف انك انتا اللي غلطان مش تستكبر وتهتم بس انك ترازي اللي قدامك لمجرد انك مش عاوز تعترف.. كدة هتقعد لوحدك ف الاخر تعد ف غلطاتك وتنكرها برضة بينك وبين نفسك..

برج العقرب صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة منك ماسك خيار وزبادي وحاول متاكلش الخيار والزبادي زي كل مرة..

تعرف على توافق برج العقرب مع باقي الأبراج النهاردة:

صحتك النهاردة محتاجة منك ماسك خيار وزبادي وحاول متاكلش الخيار والزبادي زي كل مرة..

إعرف حظك اليوم برج القوس بالتفصيل الأحد 11/2/2018 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متنزلقش لأي صراعات النهاردة مع أي حد مهما بدا الامر مغري.. خليك كبير ف نفسك كدة ورقدلهم من تحت لتحت لحد مايحين الاوان..

برج القوس عملياً 

( الشغل والمذاكرة والتخطيط لبكرة ):

هتنبسط اليومين دول جدا جدا لو ركزت كدة وروقت وفكرت كويس واتصرفت صح.. طول مانتا بعيد عن الخناق كل حاجة هتمشي كويسة.. اهم حاجة تريلاكس خالص مالص..

برج القوس صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة تتغذى كويس جدا وتسترخي كدة ومتشيلش هم اي حاجة..

تعرف على توافق برج القوس مع باقي الأبراج النهاردة:

متوافق مع الابراج الفركتوزية والحبشتكانية والحنجورية والمائية والنارية..

إعرف حظك اليوم برج الجدي بالتفصيل الأحد 11/2/2018 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متهريش وتنكت ف نفسك على الفاضي.. محدش حاسس بحد بجد ف الكوكب الازرق ف اخضر دة خالص.. روق كدة وكبر دماغك احسن وقوم شوف اللي وراك..

برج الجدي عملياً 

( الشغل والمذاكرة والتخطيط لبكرة ):

وفيها ايه لما نلبس ف الحيطة مرة واتنين وعشرة طالما بنطلع من كل مرة لا ناقصين ايد ولا ناقصين ورك.. ايه المشكلة يعني لما تفشل.. امال فاكر هتتعلم ازاي يعني تنجح وتفضل محافظ على نجاحك دة لأطول وقت ممكن.. ماهو لازم تفشل وتزعل وتتقهر عشان تعرف قيمة النجاح لما يعدي من قدامك تاني.. ومسيره هيعدي وتقفشه وتعتقله ف حياتك وهافكرك..

برج الجدي صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة مزيكا كتير وفرفشة وضحك كدة وتكبير دماغ من اللي بجد.. الكوكب بيلف ومفيش حاجة هتفضل على حالها.. ديل ويز إيت يابرنس..

تعرف على توافق برج الجدي مع باقي الأبراج النهاردة:

متوافق مع الابراج البربئية والمونوكرومية والحنتوسية والحلبسية والهوائية والكشرية والبرمائية والترابية

إعرف حظك اليوم برج الدلو بالتفصيل الأحد 11/2/2018 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متضايقش نفسك يابرنس.. مش مهم حد يفهمك قد ماهو مهم فعلا انتا نفسك تفهم نفسك وتعرفها كويس وبس..

برج الدلو عملياً 

( الشغل والمذاكرة والتخطيط لبكرة ):

محدش هيريحك ف الحياة قد نفسك لأنها غالبا الوحيدة اللي هتهتم فعلا بيك اذا كنت مبسوط او لأ.. غير كدة هيبقى اهتمام عابر ومؤقت من ناس عابرة ومؤقتة مش عاوزة اكتر من انها تقف تعدل هدومها النفسية ف مراية عينيك وبس..

برج الدلو صحياً 

( نفسيا وجسمانيا وكل مايخص طاسة المزاج ):

صحتك اليوم محتاجة منك تهدي دماغك حبة من التفكير وتنشغل ف اي حاجة بتعملها وتستغرق فيها كدة وتتوه زي زمان وبس

تعرف على توافق برج الدلو مع باقي الأبراج النهاردة:

متوافق مع نفسك وبس

إعرف حظك اليوم برج الحوت بالتفصيل الأحد 11/2/2018 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

اليوم جميل ومنعش فعلا.. ثق انتا بس ف قدرتك على الانبساط والبهجة.. ودور على مصادر السعادة ف الحاجات البسيطة النهاردة مش ف الناس اللي حواليك..

برج الحوت عملياً 

( الشغل والمذاكرة والتخطيط لبكرة ):

ثق ف جمالك.. وحاول تخرج حبة من حالة "لما كنت طيب زمان عاملوني وحش.. عشان كدة لازم دلوقتي اعامل كل واحد طيب أقابله وحش".. انتا كدة بتعترف انك متعقد من جواك على فكرة بالطريقة..

برج الحوت صحياً 

( نفسيا وجسمانيا وكل مايخص طاسة المزاج ):

متشغلش بالك بأي حاجة طول ما تعمل كل مصايبك الخفية بثقة..

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والكتكوتية والمستحية والترابية.