إمتى تعرف ان الشتا دخل.. علامات شتوية محدش يقدر ينكرها

الإثنين، 25 ديسمبر 2017 03:26 ص

إمتى تعرف ان الشتا دخل.. علامات شتوية محدش يقدر ينكرها..

ناس كتير بتحب الشتا وناس اكتر بتكرهه ومتقدرش تلاقي أسباب منطقية للحب أو للكره عند دول ولا عند دول.. هي مسألة ف الأغلب بتتعلق بالإحساس الوقتي العاجل اكتر منها حاجة محسوبة ممكن تختصر ف أسباب واضحة خصوصا وان اغلبها اسباب شخصية او بتتعلق بذكريات محددة عن فترات ف الطفولة بشكل محدد برضة.. هنا هنحاول نعرف شوية من العلامات اللي جايز تكون مشتركة مابين البشر وبعضهم هنا ف الإحساس بدخلة الشتا..

1- لما تلاقي ناس فرحانة..

وبتتكلم عن القهوة وفيروز والمشي تحت المطر كأننا ف أوروبا مثلا وكأن ف الشتا التلج بينزل وبننزل احنا كمان نلعب فيه وبيتناسوا ان الشتا هنا مآساة لمكان زي اسكندرية مثلا وشوية مطرة ف القاهرة ممكن يقفلوا شوارع وشوية ضباب بيلبسوا عربيات ف بعض.. معلش.. ناس رومانسية وجميلة برضة ولازم نستحملهم يمكن حلمهم يتحقق وننبسط معاهم او نغرقهم ف ساعة مطرة وهما بيشربوا قهوة على انغام فيروز.

2- لما تبتدي تسمع كلام كتير عن إكتئاب الشتا..

وحزن الشتا ودراما ليالي الشتا الطويلة.. دة طبعا بيبقى ف الأغلب بسبب الجوع الزيادة اللي بيسببه الشتا واللي بيبقى سببه ف الاساس ان الجسم بيقولك انه محتاج شوية كالوريز زيادة عشان يعرف يدفيك.. مش أكتر.

3- لما تحس انك عندك حنين مابتعرف لمين..

أظن الجملة واضحة والسبب واضح ومش محتاج تفسير أكتر من كدة.

4- لما تسمع قلش كتير عن بابا نويل ف كل حتة..

ماهو اصله مفيش ف مصر بابا نويل غير ف المولات بتاعة الاغنيا بس تقريبا وبالنسبة لباقي الشعب يعتبر اسطورة شعبية غربية ملناش دعوة بيها لا من قريب ولا من بعيد ودة طبعا بجانب اننا مش هنشجع ابدا راجل عجوز لابس احمر وماشي ف كل حتة بيقول انه بيوزع هدايا على العيال الصغننة.. الموضوع بالنسبالنا هيبقى قلق ومالوش لازمة اساسا.

5- لما تعرف من الأرصاد الجوية..

طبعا خصوصا وان دة أكتر شيئ بديهي ممكن تعرف منه حالة الجو او وقت تغيير الفصول..

6- لما تشوف كلام الناس اللي بيحبوا الشتا على الفيسبوك..

خصوصا الناس اللي بتبين حبها للشتا كنوع من انواع الكيد ف اللي بيحبوا الصيف.. مش أكتر.

7- لما الشمس اللي كانت بتلسع قفاك ف الصيف فجأة توحشك أوي..

لما فجأة تلاقي نفسك بتقفش نفسك وهي واقفة ف نص الشارع مش مهتمة للعربيات ولا المتوسيكلات ولا للطريق اللي وقف عشان سيادتك قررت تدفي نفسك حبة بالشمس اللي بانت من بين السحاب بعد ماكانت مكسوفة تطلع.