حلم "طاقية الإخفاء" إتحول لحقيقة.. شوف بنفسك

حلم عبد المنعم إبراهيم هيتحول لحقيقة.. طاقية الإخفاء هتبقى موجودة في المتناول والناس هتستخدمها عادي.. بس مع تعديل بسيط وهو إنها هتبقى "ملاية إخفاء".. وطبعا صاحب الاختراع ده صيني.. وهو لو مش الصين اللي هتخترعها هيكون مين يعني؟.. كمل واعرف إيه الحوار بالتفصيل..

الناس على مواقع التواصل الاجتماعي في الصين تداولوا فيديو عجيب لراجل معاه عباية وبيقول إنها بتقدر تخفي جسم الشخص اللي لابسها.. ووسائل إعلام محلية قالت إن ده أحدث ابتكارات الصين.. وطبعا 21 مليون صيني شيروا الفيديو واندهشوا جدا من الموضوع ده وقالوا عنه إنه اختراع العصر.. ووسائل الإعلام هناك قالت إن العباية دي مصنوعة من مواد شفافة وبتعكس موجات الضوء اللي بتتسلط على الشخص اللي لابسها فبالتالي بتخليه مش ظاهر للناس اللي حواليه.. والحاجة العلمية اللي استندوا عليها في الموضوع ده هي "التقنية الكمومية".. اللي مرتبطة لحد ما بالنظرية النسبية بتاعة الحاج أينشتاين.. بس مالوش لازمة نخوض في الكلام المكلكع ده..

نيجي للفيديو بقى.. الراجل ظاهر فيه وهو ماسك طاقية الإخفاء أو العباية وسط جنينه كبيرة.. وأول ما فردها على جسمه اختفى قدام الكاميرا.. لدرجة إن الأشجار اللي ورا جسمه كانت باينة وكأنه مش موجود أصلا.. وطبعا الناس قامت وقعدت واتكلموا كتير عن الحوار ده.. واللي انبهر واللي شتم واللي قال خدعة وشغل برامج.. ومسؤول صيني متحمس قال إن العباية دي هتفيد الجيش الصيني في عملياته.. لأن لما الجنود يلبسوها كاميرات الرؤية الليلية "النايت فيجن" مش هتقدر ترصدهم..

ووسط كل الكلام ده.. واحد اسمه تشو زينسونج شغال منتج في شركة أفلام صينية قال إن العباية دي بلح ومفيش حاجة اسمها كده أصلا.. ووصف التخفي في الفيديو بإنه حيلة من برامج تحرير الفيديوهات اللي بتعرف تلعب في الخلفية.. وإن دي حاجة عادية وبتحصل فـ كل أفلام الأكشن ..

عموما مع كل الكلام ده أدينا مستنيين نشوف التطورات إيه.. وطبعا نفسنا يكون طاقية الإخفاء اختراع بحق وحقيقي.. ده الفنان الكبير عبد المنعم إبراهيم هيفرح جدا في تربته.. تخيل كده إنك معاك حاجة تخفيك عن الناس وإنت في الشارع.. ممكن تعمل إيه ساعتها؟.. طبعا الأفكار اللي فـ دماغك كلها هتبقى سودة ومعفنة وسادية لأنها نفس اللي في دماغي بالظبط ..

لو عجبك الموضوع ده وعاوز تقرا مواضيع زيه أو أحسن خش هنا

قط بلدي

بالصور..ناس ملهاش ف السواقة أساسا.. الجزء التاني

انتحار أب في بث مباشر على الفيس بسبب جوازة بنته

حكومة بولندا لرعاياها: إنتوا مبتخلفوش ليه؟.. خليكم زي الأرانب"

فيسبوك تعترف: 270 مليون "أكونت فيك" على الموقع