أفلام عملت "قتالين قتلة" ف الواقع.. خش وشوف بنفسك 

كلنا دايمًا نسمع عن الأفلام اللي ممكن تدي للواحد طاقة إيجابية أو أفلام تضحكك وتخليك مبسوط.. أفلام رعب تخضك وترعبك.. أو أفلام أكشن ملهاش قصة حتى.. أفلام دراما بتتعمل عشان تعيط بس مش أكتر.. بس عمرنا ما سمعنا عن فيلم بيخلي اللي يتفرج عليه يرتكب جرايم قتل..

من كام يوم حصلت جريمة قتل في أمريكا راح ضحيتها 59 واحد واتصاب أكتر من 500 بني آدم..

واللي عمل كده انتحر قبل ما الشرطة تقبض عليه.. ده مش موضوعنا.. المهم الناس قالت على الراجل إنه مجنون وفي ناس قالت ده تبع داعش خاصةً أن داعش اتبنت عملية القتل دي.. اللي ناس كتير متعرفوش أن ممكن يكون السبب أتفه من كدا وهو أنه اتفرج على فيلم وخلاه يعمل كدا..

في سوابق في التاريخ أكدتلنا أن مجرد فرجة على فيلم ممكن يؤدي لجريمة قتل.. أو حتى محاولة اغتيال رئيس زي ما هنشرحلكم في السطور الجاية دي..

1 - Scream:

90% من اللي اتفرجوا على فيلم Scream كانوا مسخسخين على نفسهم من الضحك وهم بيتفرجوا - وأنا كنت منهم الصراحة عشان هو فيلم حلو جدًا -.. يعني واحد أهبل لابس ماسك لشبح وبيجري ورا الناس وبيقتلهم بس بيتضرب منهم عادي.. يعني مش منظر قاتل محترم يعني...

في سنة 2001.. شاب من بلجيكا عنده 21 سنة قتل جارته اللي عندها 15 سنة عشان رفضت تنام معاه.. فالراجل رجع بيته وكان عنده بالصدفة لبس وماسك زي اللي في الفيلم.. فقام لبسهم وجر البنت على بيته وقتلها بـ 30 ضربة سكينة.. ولما ماتت حط وردة في ايدها.. وقال للشرطة إن اللي عمله كان بسبب ثلاثية أفلام Scream.

2- Taxi Driver:

طبعًا كلنا - أو أغلبنا - اتفرج على فيلم Taxi Driver بتاع سنة 1976.. ومن بطولة روبرت دي نيرو وجودي فوستر - اللي كان عندها 14 سنة في الفيلم -.. الفيلم ده يعتبر من كلاسيكيات السينما.. عشان بيبيّن الأمريكيين في عصر السبعينات وبداية الدعارة بين البنات الصغيرة والمراهقة وغيرها.

المهم في واحد اسمه جون هينكلي جونيور كان معجب بجودي فوستر في الفيلم.. زي ما كان روبرت دي نيرو معجب بشخصيتها في الفيلم.. وفي سنة 1981 حاول يقتل الرئيس الأمريكي..أنتم متخيلين واحد حاول يقتل رئيس أقوى دولة في العالم عشان فيلم شافه.. وكان الرئيس الأمريكي في الوقت ده رونالد ريجان - اللي كان ممثل سابق بالمناسبة - بس المحاولة فشلت.. ومقدرش بس غير أنه يجرحه في بطنه جمب القلب ببوصة واحدة.. وقال للشرطة ف اعترتافاته إن محاولة الاغتيال دي كانت تعبيرًا عن حبه لجودي فوستر.

3- The Dark Knight:

طبعًا مفيش حد - تقريبًا - ما اتفرجش على فيلم The Dark Knight سنة 2008 - واللي ما اتفرجش عليه ياريت يتفرج عشان هيفوته كتير - بطولة كريستيان بيل وهيث ليدجر.. اللي أدوا دور أكتر من رائع تسبب في انتحار هيث ليدجر بعد الدور وقبل فوزه بالأوسكار..

الفيلم ده اتسبب في كارثة كبيرة جدًا بسبب دور الجوكر - اللي كان معتمد بشكل كبير على الفوضى - ف جيمس هولمز وده راجل أمريكي اتولد في سان دييجو بولاية كاليفورنيا.. اتفرج على الفيلم وأقنع نفسه أن هو الجوكر الجديد.. وبعد كده بدأ يجمع أسلحة ومتفجرات عشان يعمل اللي الجوكر عمله.. ف ايه أحسن مكان ووقت ينفذ فيهم عملية من عمليات الجوكر.. أثناء عرض فيلم باتمان الجديد The Dark Knight Rises سنة 2012..

هولمز اختار سينما أورورا بولاية كولورادو الأمريكية.. ودخل عليهم في العرض الأول لفيلم باتمان الجديد.. وضرب قنابل مسيلة للدموع وفتح عليهم النار.. واتسبب في مقتل 12 واحد وإصابة 70.. ولما الشرطة قبضت عليه قالهم: "أنا الجوكر الجديد".

4- The Purge

ثلاثية جديدة في عالم السينما يعني أول فيلم سنة 2013 وآخرهم كان 2016.. - واللي بالمناسبة كانت ثلاثية حلوة جدًا لأي حد بيحب يتفرج أفلام التشويق والقتل - وفكرتها باختصار أن الحكومة الأمريكية حددت يوم في السنة تقدر تعمل فيه أي جرايم أنت عاوز تعملها.. قتل سرقة اغتصاب كله مسموح عشان تنفس عن غضبك.. وقدرت الطريقة دي تخفض معدلات الجريمة في أمريكا فعلًا.. - الفيلم غير حقيقي عشان محدش يفتكر أن بيحصل كدا فعلًا -..

المهم في شاب عنده 19 سنة اسمه جوناثان كروز من ولاية أنديانا.. جت في دماغه فكرة أنه يقتل شوية ناس.. فقعد يقتل الناس في الشارع.. ناس عشوائية من غير أي تخطيط ولا ترتيب.. وقدر في خلال 4 أيام يقتل 3 أشخاص ويقوم بعملية سطو مسلح على محل.. ولما اتحقق معاه تفتكروا قال ايه: "فيلم The Purge كان هو السبب في أنه يقتل الناس دي وهو اللي اداله الدافع لكده".

5- Saw:

مين فينا ميعرفش فيلم Saw - اللي من أحسن أفلام الثريلر اللي ممكن تشوفها في حياتك.. بس متتفرجش عليه وأنت بتاكل أو مع حد قلبه ضعيف - الفيلم مبني على لعبة بيلعبها Jigsaw مع الناس أنه يحبسهم في مكان ولازم يضحوا بحاجة عشان يقدروا يعيشوا أو لو مقدروش يموتوا..

المهم في واحد في أمريكا اسمه بينجامين سكوت.. خرج من السجن في 2012.. بس واضح أنه حب القعدة جوا لدرجة أنه ضرب جاره بسكينة في عينه ووشه وراسه وضهره وكل حتة في جسمه وتقريبًا طلع عينه من مكانها عشان يرجع للسجن تاني.. ولما صاحبته سألته كدا أنت بتقلد أفلام Saw.. قالها "اها ما أنا بحبها".. والمشكلة أنه قالها تستناه لما يخرج من السجن.. باعتبار أنه هيخرج يعني.

لو عاوز تقرا مواضيع أكتر زي دي خش هنا:

للكبار فقط | أكل لحوم البشر.. بين الحقيقة والتمثيل

حلمك تجيب "آيفون 8"؟.. خش يمكن تغير رأيك

زا بانشر بتاع الأفلام vs زا بانشر بتاع المسلسلات.. مين يكسب؟

قط بلدي