حلمك تجيب "آيفون 8"؟.. خش يمكن تغير رأيك

إنت ياأستاذ وإنتي ياأنسة.. نفسكم تجيبوا " آيفون 8 "؟.. طبعا مين فينا مبيحلمش إن الاختراع الخرافي ده يكون معاه ويتمتع بمميزاته الغريبة والعجيبة.. غير طبعا الفشخرة والقنعرة بيه قدام الناس ونتصور بيه وإحنا قدام المراية والشغل ده.. بس قبل ما تريل عليه.. هل تعرف إن فيه عيوب ومشاكل خطيرة.. إعرفها يمكن تغير رأيك..

البطارية بتاعته بتخلص بسرعة

العيب المزمن بتاعه اللي قارف كل اللي بيستخدموه.. و"أبل" نفسها معترفة بده وقالت ما باليد حيلة.. ومش "آيفون 8" بس.. لأ ده كل إصداراته فيها الموضوع ده.. وده لأن سعة البطارية ليها حد طاقة معين مش عارفين يتخطوه.. وكمان عشان المميزات والتطبيقات الكتييير جدا اللي في التليفون.. آه ياعم الحج مهو إنت مش عاوز أوبشنات خزعبلية وكمان بطارية تقعدلك 3 أيام.. في النهاية هو تليفون محمول مش معجزة كونية سيادتك..

ممكن ينفجر في وشك

تخيل بقى؟ حصلت فعلا في تايوان.. واحدة ست اسمها "وو" من مدينة اسمها تايتشونج معاها فلوس وقالت أريد آيفونًا.. ونزلت وكلها حماس وفرحة واشترته.. وجابت النسخة الذهبية لـ"الآيفون 8" والبلس كمان مش العادي.. وهو يدوبك أسبوعين بس ياعم الحج والتليفون انفجر منها وهي بتشحنه.. وشركة "أبل" عوضتها.. والموضوع ده كان حصل قبل كده مع كزا مستخدم في "آيفون 7".. طب افرض بقى أشتريته وانفجر في وشك؟

هتسمع ساعات صوت غريب في المكالمة

ناس كتير جابو "آيفون 8" واشتكوا من الحوار ده.. و"أبل" نفسها اعترفت بده برضه.. وهي عبارة عن مشكلة في السماعات.. صوت غريب كده هتسمعه وانت بتتكلم مكالمات شبكة أو نت.. زي غروشة أو طقطقة كأن فيه حد بينفخ في السماعة.. والشركة قالت إنها هتعمل حاجة في التحديث بتاع نظام التليفون عشان يحلوا الحوار ده.. ولو مفيش فايدة هيبقوا يشوفوا حل ليها في الإصدارات الجاية.. هع.. مين يعيش بقا..

شاشته بتتكسر بسرعة

مشكلة كبيرة بعاني منها ناس كتير.. وخصوصا الشباب عشان بيتنططوا كتير.. كل واحد فينا عنده صاحبه اللي معاه آيفون شاشته مكسورة.. متفهمش بقى ده إهمال ولا حسد.. المهم إنه بيحصل كتير.. وطبعا إنك تبدلها أو تصلحها شغلانة وهتكع فلوس كتير.. خد بقى التقيلة.. شركة "أبل" بتقولك إن كسر الشاشة ده من ضمن عيوب الاستخدام.. يعني مش في الضمان ياأمور.. شفت الخبث والصياعة؟

جسمه بينفصل عن بعضه "إزاي ياجدع"؟

تقارير كتير نشرتها مواقع أجنبية بتقول إن تليفونات "آيفون 8" بتتفك من نفسها.. وإن جسم التليفون نفسه مش متثبت بالشاشة.. ومن الحالات اللي اتعرفت كان واحد من تايوان بيشحن تليفونه ولقى مرة واحدة الفون انفصل عن بعضه.. وحالة تانية في اليابان واحد فتح علبة التليفون وكله بهجة وأمل وعفاف وهوب ياعيني لقى التليفون مفكوك عن بعضه.. كان نفسي أشوف شكله ساعتها.. أبل بقى بتحقق في الموضوع ده ولسه مجبتش أخره.. المهم لو انت مصمم تشتري ابقى اتأكد بس إنه متثبت في بعضه ياخويا.. عشان متتخزوقش زي صاحبنا..

في النهاية سعيد جدا إني كرهتك في "الآيفون 8" وخليتك متفكرش تشتريه أو تعيد النظر.. وبعدين إتنيل قال يعني خلاص الواد كان نازل يجيبه بكره..

لو عجبك الموضوع ده وعاوز تقرا مواضيع زيه أو أحسن خش هنا

قط بلدي

سي إم بانك.. "معدي الناس" بشهرته.. ومدي الـ"WWE" على قفاه