عايش في مجتمع شرقي وسطي محافظ جميل متدين بطبعه؟! أكيد الكلام دا هيمسّك بشكل أو بآخر:

* مفيش كهنوت في الإسلام.. بس مش أي حد يتكلم في الدين!

* الحجاب حرية شخصية.. بس أنا هبقى ديوث لو سبتك تخلعيه!

* أهم حاجة تكوني مقتنعة بالحجاب.. يعني إيه مش مقتنعة؟ دا فرض غصب عنك هتعمليه!

* ربنا اللي هيحاسب الناس.. بس إحنا هنصورهم ونفضحهم لو حضنوا بعض عشان نمنع الفاحشة.

* التشبه باليهود والنصارى حرام .. بس شفتوا حتى السيدة مريم كانت محجبة إزاي؟!

* كل واحد حر يؤمن أو يكفر.. بس الملحدين دول مرتدين لازم يقام عليهم الحد!

* حرية الفكر والتعبير مكفولة.. بس لا تجاهر بفكرك عشان الفتنة، فكر جوا مخك.

* داعش مفسدين في الأرض وإرهابيين.. بس اللي هينكر التراث العنيف اللي بتستند ليه داعش يبقى خارج عن الدين.

* الإسلام كرّم المرأة.. بس من حق أبوها يجوزها طفلة لو مربربة، ومن حق أخوها يضربها عشان خلعت الحجاب، ومن حق جوزها يأدبها لو امتنعت عن العلاقة الجنسية معاه، ومن حق المجتمع كله يختارلها تلبس إيه ويعاقبها بالتحرش والنبذ والوصم لو ما لبستش اللي على مزاجه.

* طبعًا إنتي حرة وما حدش منعك تسافري وتدرسي.. بس لما تتجوزي وتبقي "فى ذمة" راجل "يحكمك".

* الراجل اللي بقيتي في ذمته بيمنعك من الشغل والدراسة؟.. لازم تطيعي زوجك.

* الختان عفة.. بس النمص تغيير في خلق الله.

* اللي بيطالب بتنقية التراث من النصوص العنيفة خارج عن الإجماع وبالتالي عن الإسلام.. بس اللي بيطلع يجاهد تبعا للنصوص دي ويقتل أبرياء اجتهد فأخطأ فله أجر.

* ربنا يهديكم.. ياولاد $^#%^#.

* عمري ما بفرق بين ولادي في المعاملة.. إنتي بنت يعني إنتي اللي تنضفي وتعملي شغل البيت.

* طبعا البنت زي الولد.. بس أنت هتسافر مع أصحابك تتفسح وإنتي لأ.

* طبعا لازم تختاري شريك حياتك وتتعرفي عليه كويس!.. بس هتشوفيه مرتين قبل الخطوبة وأخوكي الصغير هيقعد في النص.

* الخطوبة فترة تعارف وتجربة.. بس إحنا ماعندناش بنات تفسخ خطوبتها، الناس تقول علينا إيه بعد ما دخل البيت!

* الحب بييجي بعد الجواز/ هتتعودوا على بعض بعد أول سنة/ العيال هتقرب بينكم.. ماعندناش بنات تتطلق، ربي عيالك!

* الغرب حول المرأة لسلعة.. بس إحنا كمجتمع محافظ هنغطيكي عشان إنتي مصاصة/ جوهرة/ عربية/ سكوتر/ موبايل بشريحتين.

* أنا فنان/ فنانة/ إعلامي/ إعلامية بلبس كل اللي عايز/ عايزة ألبسه وبعمل كل اللي عايز أعمله.. بس إحنا هندافع عن قيم مجتمعنا اللي بتمنع أن واحدة مغصوبة على لبس الحجاب تخلعه وبتحجر على حرية الناس في أجسامهم.

* أنت حر مالم تضر.. بس الدولة لازم تمنع الناس تشرب/ تصاحب/ تتجوز مدني/ ترقص/ تتكلم في الدين/ تكح بصوت عالي/ تاكل خس.

* مصر بلد الأمن والأمان/ إحنا شعب متدين بطبعه.. بس البسي الحجاب عشان ماحدش يتحرش بيكي في الشارع.

* لابسة حجاب وبيتحرشوا؟.. البسي نقاب.

* لابسة نقاب وبيتحرشوا؟.. خارجة من بيتك ليه؟ أول حفرة على إيدك اليمين وادفنى نفسك.

* إحنا بنحارب الإرهاب وكل شوية يحصل تفجير في كمين.. بس أول حاجة بندور عليها في الكماين إذا كانت اللي مسافرة معاك دي مراتك ولا لأ.

أنت حر.. بس عليك واحد.