تحولت الجمعيات الاستهلاكية بمحافظة المنوفية، إلى "خرابة" ينهش فيها أعضاء مجلس الإدارة، وأصحاب المصالح الخاصة، مع إهدار حقوق ما يزيد على 85 عاملا بسبب تفاوت المرتبات بين العمال وأعضاء مجلس الإدارة، حسب قول العاملين بها.

"دوت مصر" التقى بعدد من العاملين في فروع الجمعيات الاستهلاكية بالمنوفية، الذين اشتكوا من قيام مجلس الإدارة ببيع العديد من الفروع الخاصة بالجمعية في مراكز المحافظة، بحجة الحاجة إلى المال لتسديد مرتبات الموظفين والعمال، وأشار العمال إلى رفض مجلس الإدارة الحالي الرقابة من وزارة التموين والهيئات الرقابية المختلفة، مما جعل الجمعيات الاستهلاكية تدخل في العديد من القضايا التي رفعتها "التموين".

يقول حماد عفيفي: "إحنا مش لاقيين نقبض، أنا متعين بقالي 27 سنة، وبآخد مرتب كامل 900 جنيه ومفيش أي حوافز أو بدلات، ومش راضيين يزودونا، وبيقولولنا إنهم بيبيعوا فروع الجمعية علشان يقبضونا، ومفيش بضاعة في الفروع، كتبنا شكاوى لرئاسة الجمهورية ورئيس الوزراء والمحافظة، ومحدش سأل فينا، وإحنا بنناشد المسؤولين لأننا كنا جمعية محترمة، وكان عندنا رصيد فلوس، ولكن دلوقتي أصبح رصيدنا صفر".

وأضاف: "عاوزين أي جهة تساعدنا وتتولى الإدارة، وإحنا عندنا الفروع والعمال، مش عاوزين نتسول، إحنا عاوزين حد يقبضنا، وإحنا على أتم الاستعداد للشغل من جديد، مجلس الإدارة ما اجتمعش بينا من أكثر من ثلاث سنين".

ويقول محمد عماد، محاسب في الجمعية الاستهلاكية: "أنا بشتغل من أربع سنين ومرتبي 330 جنيها، وأنا عندي بيت وأسرة، والدولة شالت الدعم، وكل حاجة غليت، إلا إحنا، وعندنا فروع المفروض إننا نشغلهم، لكن الإدارة مش عاوزة كدا، وبتستسهل وبتبيع الفروع، علشان على آخر السنة ما نلاقيش لينا أي فرع".

وأضاف: "مجلس الإدارة رفض الرقابة من التموين، ومن أي جهة، مما جعل التموين يقوم بتحرير محاضر ضدنا، وكل مطالبنا هي لقاء محافظ المنوفية، وعاوزين ننضم لأي جهة قطاع حكومي، مثل التموين، أو نتبع المحافظة، بحيث تأتي الجهة دي وتاخد الفروع وتشغلنا وتقبضنا".

وقال هاني بدوي، أحد العمال: "لما التموين أو أي جهة تيجي علشان تشوف الدفاتر، الإدارة بتقولهم أنتم مش بتراقبوا علينا، والمفروض إننا يتراقب علينا، التموين جه واتمنع، ورفع علينا قضايا، لأن الإدارة مش راضية تديله ورق وتساعده، وأنا بقالي 7 سنين وقبض 300 جنيه، ودا مرتب ما يجيبش عيش حاف، عاوزين نقابل المحافظ وعاوزينه يشوف لنا حل، وعلى أتم الاستعداد إننا نروح لحد السيسي، وفين الحد الأدنى بتاعنا".

كان مجلس إدارة الجمعيات التعاونية الاستهلاكية بالمنوفية، قد قام خلال الفترة الماضية، ببيع ما يزيد على 12 فرعا من فروع الجمعية، في مراكز أشمون والباجور وتلا ومنوف، مما دفع الموظفين إلى الثورة على المجلس، مطالبين المحافظ بالتدخل السريع لحل الأزمة.