بداية من السبت 27 ديسمبر الجاري، سيتم بدء سحب طلبات الالتحاق للعمل بوظيفة "معاون أمن" وهي الفئة الجديدة اللي تم استحداثها في وزارة الداخلية، بعد قرار رئيس الجمهورية بتعديل بعض أحكام قانون هيئة الشرطة.

كتير سألوا .. إزاي أقدر أقدم في الوظيفة، وأكون "معاون أمن" أد الدنيا.. لو عاوز تعرف.. تعالى وأنا أقولك إزاي...

في البداية لازم يتوافر فيك عدد من الشروط الأساسية مثلا، سنك ميقلش عن 19 سنة وميزدش عن 23 سنة، وأنك تكون مصري، أيضا الوالد والوالدة لازم يكونوا مصريين، وأنك تكون حاصل على الشهادة الإعدادية، وطولك ميقلش عن 170 سم، وعرض صدرك ميقلش عن 85 سم، وغيرها من الشروط اللي تقدر تعرفها من "هنا".

شوفت الشروط كلها؟ متوافره فيك؟ متأكد؟.. يبقى توكل على الله، واستعد لسحب الملف. التقدم بداية من يوم السبت 27 ديسمبر، وحتى يوم السبت 17 يناير 2015.

تقدر تسحب الملف من الأماكن دي:
1- معهد تأهيل ضباط الصف وجنود الشرطة بالقاهرة بشارع جسر السويس.
2- معهد مندوبي الشرطة بالقاهرة بمنطقة عين شمس.
3- معهد التدريب الراقي بمنطقة زهراء المعادي.
4- معهد مندوبي الشرطة بالبحيرة- مدخل مدينة وادي النطرون.
5- معهد تأهيل ضباط الصف وجنود الشرطة بسوهاج.
 

المرحلة الأولى: هيبدأ فيها التدريب العسكري، واستخدام كافة الأسلحة والتحول من رجل مدني إلى رجل نظامي يقدر يقوم بالمهام المكلف بيها.
المرحلة الثانية: مخصصة للدراسات القانونية والإجراءات الجنائية.
المرحلة الثالثة: سيتم تقييم الشخص خلال هذا العام ليتم تصنيفه وتخصصة، بمعنى. البعض سيتجه إلى رجال الحماية المدنية والمفرقعات، والبعض سيتجه للعمل في مجال التأمين، والبعض سيتجه للأمن الوطني بكل مجالاته، وجوازات وتأمين المطارات والمواني المصرية، والمرور، وغيرها من قطاعات وزارة الداخلية.

بعد ما تتخرج سيتم وضعك تحت الاختبار لمدة سنة، ودا للتأكد من صلاحيتك للعمل في الوظيفة، يعني ايه؟! بعد الـ18 شهر اختبارات ودراسة، مش متأكدين من صلاحيتي؟!.. الإجابة: أه.. لأننا لما سألنا رئيس المجلس الأعلى للشرطة اللواء عادل رفعت عن النقطة دي، كانت إجابته " بعد الدراسة والعمل الأكاديمي، وبدء نزل الفرد للعمل الميداني، والتعامل مع المواطنين، قد ينحرف سلوكه، ويظهر بعض العوار فيه، ولهذا سيتم وضعه تحت الاختبار لمدة سنة ميدانيا".

**أول ما هيتم تعينك هتكون بدرجة معاون أمن ثالث، وبعدين تترقي، والتدرج الوظيفي هو:
-معاون أمن ممتاز أول.
-معاون امن ممتاز ثان.
-معاون امن ممتاز.
-معاون أمن أول.
-معاون أمن ثان.
-معاون أمن ثالت.

**وده كشف بالماهية والعلاوة السنوية:

"ابسط ياعم" D:

**أيضا هتتمتع بمجموعة من المزايا:
-مكافأة شهرية أثناء الدراسة.
-صرف الملابس الأميرية مجانا.
-الاستفادة من العلاج المجاني وفقا لقواعد العلاج بهيئة الشرطة.
-الاستفادة من الخدمات الاجتماعية لك ولأسرتك وصندوق الزمالة والحج والعمرة وكافة المميزات الخاصة برجال هيئة الشرطة.

لكن خد بالك.. زي ما فيه مزايا ومرتب كويس.. في جزاءات وعقوبات تصل للفصل في حالة الخطأ.. تقدر تعرفها من "هنا"

**مهم انك تعرف المعلومات دي:

-1500 واحد فقط اللي هيتم قبولهم في الدفعة الأولى.
-ليك صفة الضبطية القضائية، لكنها "مكانية". بمعنى، في مكان خدمتك فقط، يعني لو حصل أي واقعة في مكان خدمتك تقدر تقبض على المتهم، لكن بمجرد الانتهاء من عملك، مبقاش ليك الصفة دي.
-من حقك حمل السلاح، لكن استخدامه له شروط معينة، وتدرج في استخدامه، تقدر تسمع الكلام دا مساعد وزير الداخلية لقطاع الشئون القانونية اللواء الدكتور علي عبد المولى.

مبروك للي هيفوز.. وربنا يعوض عليك ياللي ملكش نصيب.

**في الآخر البنات لازم يكونوا عارفين "الشغلانة دي مش معمول حسابكم فيها".. لكن اللواء عادل رفعت قال أنه "ربما سيتم السماح للفتيات بالإلتحاق بهذه الوظيفة في الدفعات المقبلة".