بلاي ليست..الهضبة 1996 وذكريات كليب راجعين ونور العين

ودنك هي حلقة الوصل بينك وبين العالم.. يعني لازم تهتم بيها وتقدرها أكتر من كدة على فكرة وهي مطالبها سهلة وبسيطة.. يعني مش هتطلب منك تخرجها ولا تأكلها ف مطعم غالي كل اللي هي محتاجاه إنها تتسلطن وتسمع حاجات تنعشها وتفرفشها من فترة للتانية.. وبما إن مهمتنا هي إسعاد ودان كوكب الأرض.. ف قررنا نفضي نفسنا كل يوم حبة عشان بس ننقيلك الحاجات اللي تفرفشها وتنعشها..

وكل المزيكا الجميلة دي هتلاقوها بكل الأذواق والمقاسات ف أكتر من بلاي ليست ف قسم المزيكا عندنا.. وأكيد هتلاقي اللي يناسب ودنك ومزاجك

النهاردة هناخد ودانكم ف مشوار صغير لعالم الهضبة عمرو دياب.. هنرجع معاه بالزمن للبدايات وتحديدا لسنة 1995 و1996 اللي قدم فيهم عمرو دياب ألبومين "راجعين" و"نور العين"

ولو عايزين تجيبوا المشوار من أوله يبقى ميفوتكوش:

بلاي ليست..الهضبة 1988 لما كان بيشرب الس?ن ف إزازة

بلاي ليست.. الهضبة 1990

بلاي ليست.. الهضبة 1992 لما كان بياكل آيس كريم ف جليم

بلاي ليست.. الهضبة 1994 وذكرياته مع أفريقيا

1995 و1996 قدم فيها عمرو دياب كلبين مميزين لأغنينة راجعين وأغنية حبيبي يانور العين وخلينا نشوف ليه كل أغنية منهم كانت مميزة جدا

كليب راجعين هو من إخراج طارق العريان وواضح فيه الاسلوب السينمائي في التصوير دة غير ظهور عدد كبير من الفنانين مع عمرودياب ف الكليب.. ودة يخليك تحس إنك بتتفرج على كليب تقيل وغني وكانه فيلم سينما.. الكليب بيبدأ بظهور طلعت زين بيغني جزء من أغنية "تعالى" ومعاه حسين الإمام بيعزف على الجيتار..شوية ونلاقي علاء ولي الدين بيظهر وعزت أبو عوف بيلعب على البيانو.. ودة طبعا غير الديكور وطريقة التصوير اللي على ستايل الأربعينات..كل دة خلى مود الكليب كله مميز ومختلف..

"نور العين" ف هو النقلة التانية في كليبات عمرو دياب.. والتعاون الأول مابينه وبين محسن جابر صاحب شركة عالم الفن.. وهنا بنلاقي كمية كبيرة من الألوان والإستايل الإسباني ف الإستعراض والإزياء .. حركة وهيصة ومود حلو يخلي صورة الكليب من الحاجات اللي صعب تتنسي من ذاكرتك.. كفاية كلام ونسيبكم مع البلاي ليست.. إستمتعوا