فاكر المرة اللي حاولت تخرج حاجة دخلت في عينك أو إيدك وفجأة لاقيت جسمك طردها لوحده ومبقيتش حاسس أنها موجودة.. أهو التصرف دة جسمك بيعمله تلقائي مع أي جسم غريب يحس بيه.. ومش جسم الإنسان بس اللي بيعمل كدة دة كل الكائنات الحية بتاخد نفس التصرف مع الأجسام الغريبة حتى المحار

بس جسم المحار بيتعامل بطريقة مختلفة مع الأجسام الغريبة إللي بتدخل جواه.. ف مثلا لو دخلت حبة رمل أو حتة أكل صغيرة جسم المحار بيقوم جسم المحار مستعد لحماية نفسه منهم وبيفرز مادة أسمها عرق اللؤلؤ وهي عبارة عن مجموعة من المواد العضوية والغير عضوية.. ومع تكرار الموضوع بيدأ عرق اللؤلؤ في التراكم ومع الوقت بتكون لؤلؤ..

الطريقة دي خلت الناس تفكر إنها تحول الموضوع لصناعة.. ف يجيبوا مجموعة من المحار المنتج للؤلؤ  وبيدخلوا جواها رمل وبيحطوها ف أقفاص في البحر ويرجعلوها بعد 4 سنين تكون كونت اللؤلؤ 

شكل اللؤلؤ وهو جوه المحارة بيختلف عن الشكل اللي بنشوفه في المجوهرات.. لإنه في المحار مبيكونش متساوي ولا كله لون واحد ف ممكن المحارة الواحدة يكون فيها أكتر من لون.. وبتدرج ألوانه من الأبيض الناصع للوردي الشاحب حتى الأسود الغامق.. والأسود منه هو أغلى الأنواع لأنه نادر جدا 

ممكن تلاقي المحار في المية المالحة أو العذبة.. وأكبر أماكن بتستخرجه هي الخليج العربي والهند والصين واليابان وأستراليا.. وزمان كان البحر الأحمر مليان بيه لكن دلوقتي للأسف مش موجود.. أحسن ناس ناجحين في زراعته هما اليابانين طبعا اللي بيفضلوا زراعته ف المية المالحة

الخلاصة..

المحار كان كل هدفه أنه يبعد عنه الكائنات الغريبة مش أكتر.. لكن الفعل البسيط دة قامت عليه صناعات وأقتصاد دول.. ودة اللي نقدر نقول عليه تصرف بسيط إتسبب ف حدوث ضجة كبيرة.