ساعات بيعجبك فيلم أو أغنية فتلاقي نفسك بتقول.. "يا خسارة أغنية حلوة بس ملهاش حظ" .. مع إن ف نفس الوقت ممكن تلاقي أفلام وأغاني تانية مليانة سف كتير وبالرغم من كدة مشهورة ومسمعة جدا مع الناس .. دة اللي خلانا نسأل هل الشهرة هي الدليل الوحيد على النجاح ..وياترى الشهرة إنجازة ولا مجرد حظ وبيع دماغ هوا ف إزازة؟.. طيب أنهي أحسن نعمل شغل حلو بس ميشتهرش .. ولا نعبيله ونديله ونشتهر؟

سؤال صعب .. ومحدش ينكر إن الشهرة حلوة وبتجيب بعدها فلوس ونجومية وحاجات حلوة كتير ..

بس برضو الحياة ممكن تاخد منك كل دة ف ثانية لو حبت ..ف لازم تخلي بالك إنها دحلابة وملهاش ماسكة .. عشان كدة قولنا نمشي وراها ونعرف ياترى لو الواحد عايز يشتهر ممكن يعمل ايه .. ماتيجوا نشوف.. 

زمن العشرينات والتلاتينات ..

لو انتا من الجيل دة وحابب تشتهر .. يبقى مبدأياً كدة لازم تكون من بلد ريفي .. وغالبا برضة هتكون من أسرة محافظة  .. وطبعا هتكون عندك موهبة يا إما في الغنا أو التمثيل ولو بنت ممكن تضيفي عليهم كمان موهبة الرقص .. هتمارس هوايتك شوية في بلدكم ..  وهتلاقي راجل كبير طيب كدة  يطلع يقول إنه هـيبقالك مستقبل كبير - كلهم بيقولوا كده راجع مسلسلات السيرة الذاتية - ف انتا بقى إكمنك بتتلكك ونفسك تتشهر وتنجح .. ماهتصدق كلام الراجل .. وهتهرب من بلدكم وتيجي على مصر وتحديدا على شارع عماد الدين .. هتتكحرت شوية في الأول وهتغير اسمك عشان محدش من اهلك يقفشك .. وبعدها ربنا هيكرمك وهتبقى من المشاهير ..خصوصا لو إكتشفك حد من مكتشفي المواهب بتوع الزمن دة.. ألف مبروك 

زمن الأربعينات والخمسينات ..

دي فترة حروب ونزاعات سياسية كتير .. إشي حرب عالمية .. وإشي ثورات  .. فترة طحن جامدة جدا .. واللي كانوا أولريدي مشاهير ف الوقت دة .. كانوا بيحاولوا يكونوا موجودين من خلال المشاركة في الأعمال الوطنية والسياسية على قد مايقدروا .. ودة طبعا زود نجاحهم ونجوميتهم وشهرتهم عند جمهورهم بشكل كبير

زمن الستينات ..

إنضم للمشاهير ..فئة جديدة اسمهم مذيعين ومذيعات التليفزيون .. وبقوا هما الفاكهة  اللي بتدخل  كل بيت .. و الكبير والصغير بيتفرج عليهم .. فلو انت من الجيل دة .. واتعلقت بمشاهير التليفزيون هتلاقي نفسك بتمسك فرشاة الشعر .. قال يعني مايك .. وتقعد قدام المرايا تقلد مذيعين نشرة الأخبار.. أما لو انتي بنت هتلاقيكي كنتي بتلبسي باروكة ماما وبتقلدي نجوى إبراهيم و ليلى رستم 

زمن السبعينات ..

يعتبر أكتر فترة ملونة ف تاريخ مصر ..يمكن إحنا معشيناهاش .. لكن بسبب الإفلام وحكاوي أهالينا عنها ..  الواحد بيحس إنها فترة مبهجة كلها حرية وفن تحس إنها شبه  قوس قزح أوي ..  وف الفترة دي إنضمت مجموعة جديدة للمشاهير .. ف لو انتا حابب تكون منهم .. غالبا برضو هتكون من بيت محافظ  وعندك موهبة .. لكن المرة دي مش هتجري على عماد الدين .. انتا هتلم صحابك وتعلموا فرقة موسيقية ..  وتغنوا أغاني عربي وغربي وتثبتوا نفسكم بقى وتبقوا نجوم شواطئ ميامي والعجمي .. أما لو انتي بنت فهتبقى أكيد عاملة دايت دلوقتي .. عشان بتستعدي للمشاركة في مسابقة ملكة جمال شاطئ ميامي ..

الطاقة الفنية في الوقت دة كانت رهيبة بجد .. وطلّعت فرق كسرت الدنيا زي فرقة "لي بيتيشاه"  اللي كان من بين أعضائها عمر خيرت وعزت أبوعوف .. ويكفي إن السبعيانت خرّجت  لنا ميرفت أمين ونجلاء فتحي .. وده كفاية الحقيقة 

زمن التمانينات والتسعينات 

على عكس فترة السبيعنات اللي شبه الرينبوه .. فترة التمانينات بالنسبالي .. بتفكرني بالنور الأبيض بتاع اللمبة الفلورسينت الدراع .. هي فترة الأوبليتات بلا منازع .. لكن منقدرش ننكر برضو إنه في الفترة دي مجال الشهرة ظهر فيه نجوم الإعلانات وموديلز الفيديو كليب .. دة غير لعيبة الكورة اللي أغلبهم بقوا نجوم سينما وإعلانات .. ف انتا لو ابن التمانينات اجري العب كورة أو غني ولا حتى مثل .. اما البنانيت ف ياريت تضربي أوبلتاتك .. وتجري على أقرب شركة اعلانات .. وربنا يكرمك زي ما كرم داليا البحيري ف كليب "تجيش نعيش".. ولو ركزتي شوية هتلاقي رانيا يوسف كانت معاهم

أول الألفينات 

زمن الفضائيات بقى .. وبداية ماسورة القنوات اللي حدفت علينا من كل صنف ولون .. والعملية بهوئت أوي .. عشان كده كانت الجرءة كانت هي أساس الشهرة وبعدها تيجي الموهبة .. ودة طبعا عشان يقدروا يلفتوا النظر ف وسط الكم الكبير من القنوات اللي فتحت فجأة على النايل سات وغيره.. ف تلاقي كليب ساخن هنا .. فنانة إغراء هناك .. مغني يحط رقمه في فيديو كليب وبيطلب من الناس تتصل بيه .. وغيرهم كتير .. وبعد كدة الصحافة تكتب والقنوات تستضيفهم .. ويطلعوا يقولوا معلش مش هنعمل كدة تاني .. ف يشتهروا أكتر واللي موهوب منهم بيكمل واللي مش موهوب بيتنسي .. 

 2011 .. زمن الأنستا والفاشونيستا 

طبعا الحياة ف الفترة دي كانت فري فري  هوت في مصر .. بسبب بداية ظهور السوشيال ميديا .. اللي خلت حياة الناس مكشوفة بزيادة على العالم .. عشان كدة تلاقي مشاهير الزمن دة فكوهم خالص من التليفزيون والجرايد .. وركزوا  ف الفيسبوك و تويتر وغيرهم .. وقالوا بس  هو دة المستقبل .. أي نعم ف الأول مكنش حد معبرهم وفاكرينهم شوية عيال بيتسلوا على النت  ..لكن بعد فترة بقت في مفتايح اللعبة كلها ف إيديهم .. ومحدش يقدر يقف قصادهم

ف دلوقتي اللي أمه دعياله هيكون ببليك فيجر واللي باباها دعيلها هتكون فاشونيستا قد الدنيا .. وإذا كان الناس زمان بيحددوا قيمتك من ساعتك ولا عربيتك .. دلوقتي قيمتك بتحدد بعدد الفلورز بتوعك .. بس لو حاولت تدخل ف السكة دي .. اعرف إنه ملهاش وساطة .. و الميزة الوحيدة اللي ف العالم ده إنه مبيعرفش يطبل لحد فـ خلي بالك 

الخلاصة ..

مش مهم تكون مشهور .. المهم تكون مشهور بايه .. العالم اللي احنا فيه ده يا تكون بشهرة الخليل كوميدي أو تكون بشهرة مجدي يعقوب .. انتا اللي لازم تختار .. محدش هيختارلك خلاص .. أوريفوار