حكومة بولندا لرعاياها: إنتوا مبتخلفوش ليه؟.. خليكم زي الأرانب"

"لازم نتعاون مع بعض كلنا عشان نحل أزمة انخفاض معدلات المواليد.. ولازم وزارة الصحة تعمل حملة تشجع الناس إنها تخلف.. إنتوا مبتخلفوش ليه؟.. لازم تبقوا زي الأرانب".. ده كان بيان لحكومة بولندا بسبب إن الناس هناك قربت تنقرض بسبب قلة الخلفة..

تخيل يامؤمن إن دولة تقول لرعاياها خلفوا.. عمرك سمعت عنها دي؟.. المفروض تقولهم العكس.. لكن بولندا عاوزه الناس تخلف.. وفعلا وزارة الصحة هناك عملت حملة طالبت فيها الناس هناك إنهم يتعاملوا مع الخلفة زي الأرانب بالظبط... الوزارة كمان نشرت مقطع فيديو ظهر فيه أرنب بيتكلم.. حركة يعني.. وبيقولك إيه سر إنك تكون عيلة كبيرة.. واتكلم هنا عن الأكل الكويس والرياضة وعدم التوتر.. وقال الفيديو بالنص: عاوز تبقى أب يازميلي يبقى لازم الأرانب مثال وقدوة.. أنا فاهم ده كويس لأن أبويا عنده 63 عيل".. اللي هو المفروض أبو الأرنب الخيالي ده يعني.. مفهومة طبعا..

وزارة الصحة في بولندا قالت إن الحملة موجهة للي عندهم 18 سنة لحد 45 سنة.. واللي عنده مشاكل الحكومة هتوفرله الحبه الزرقا كمان.. يعني محدش له حجة خالص..  وسبب إنهم حطو الأرنب في الحملة دي إنه أكتر حيوان عنده خصوبة واسمه بس بيدل على الخلفة الكتير ..

الفكرة إن عدد سكان بولندا في وقتنا الحالي أكتر من 39 مليون واحد.. يعني عددهم مش قليل برضه.. إيه لزومها التفاصة بقى.. وبعدين لو عاوزين يخلفوا كتير ممكن يستعينوا بخبرات الشعب المصري.. وهمه بعون الله يبقوا 100 مليون في سنة.. أو نسفرلهم طيارة عليها شباب مصري زي الورد من نبت الأرض الخضرا.. وهما هيقوموا بالواجب وزيادة..

لو عجبك الموضوع ده وعاوز تقرا مواضيع زيه أو أحسن خش هنا

قط بلدي

فيسبوك تعترف: 270 مليون "أكونت فيك" على الموقع

انتحار أب في بث مباشر على الفيس بسبب جوازة بنته

شرطة بريطانيا سابت تأمين الملاهي وراحت تلعب عربيات.. وحصلت حادثة

دولة المكروباص المستقلة.. السواق متشعوذ وماشي ببطاقة ابن اخته

ستيفن بادوك.. المليونير المجنون اللي قتل 58 واحد وإنتحر في "فيجاس"