شرطة بريطانيا سابت تأمين الملاهي وراحت تلعب عربيات.. حصلت حادثة

كل واحد بييجي عليه وقت ويضِغط عليه في شغله وبيبقى محتاج يفك عن نفسه شويتين.. حتى شرطة بريطانيا برضه بيحتاجوا ده في وقت من الأوقات.. أُمااااال؟ دول بني آدمين برضه وحقهم يرفهوا عن نفسهم.. غير إنهم حماة الوطن ياجدع..

18 من قسم هامبرسايد من شرطة بريطانيا بيأمنوا مدينة ملاهي كبيرة.. بيشتكوا من الضغط والشغل الكتير اللي تعبهم جدا.. قاموا لموا بعضهم كده زي الشطار.. وقالوا يالا بينا نركب العربيات ونتسلى شوية.. وكانوا بيضحكوا وبيهيصوا وكأنهم عيال صغيرة.. تخيل لما الشرطي يطلع الطفل اللي جواه..

المفتش بـ شرطة بريطانيا سكوت سنودن اللي هو المفروض رئيسهم.. شافهم وهما بيلعبوا على العربيات.. طبعا هتقول اتضايق وعاقبهم وكدة وعمل معاهم السليمة.. لأ الراجل شير صورهم على حسابه بموقع "تويتر" وقال : " كنتوا خدوني معاكم ياولاد.. شرطة بريطانيا الهمامة بتتسلى شوية مع الناس في الملاهي.. أهوا بيفكوا عن نفسهم".. إندي ماكدير نائب رئيس شرطة بريطانيا علق برضه على تصرفاتهم وقال: "من حقهم ياخدوا استراحة ويمتعوا نفسهم.. ومش هيقعدوا كتير عموما"..

طبعا الصور والفيديوهات اللي نزلت على مواقع التواصل الاجتماعي عجبت الناس كلها واستغربت أوي بسببها.. ونزلتها أكبر الصحف العالمية والكبيرة زي "ميرور" و"التايمز" وقالوا إزاي ياجدع!؟.. ومنهم اللي قال مش بيحصل ليه في بلدنا الكلام ده؟.. عمرك شفت الكلام ده عندنا في دريم بارك ؟..

ووسط ما شرطة بريطانيا بتلعب وبتخمس وبخبط في العيال الصغيرة وبيقولوا هييييييه.. حصلت في المعرض حادثة كبيرة فشخ كانت هيموت فيها ركاب كتير وكانت هتبقى كارثة ومصيبة.. بسبب إن لعبة خطيرة وحيوية في الملاهي اتعطلت.. وطبعا فين الشرطة؟.. بتلعب وبتهيص وبترقص وآخر روقان..

ست من اللي نجيوا من الحادثة اللي حصلت دي علقت على اللي حصل وقالت: "الشرطة موصلتش في الوقت المناسب وقت وقوع الحادثة.. والركاب كانوا متعلقين في الهوا أكتر من 7 ساعات لحد ما أنقذونا أخيرا.. الظاهر إنهم كانوا مشغولين في حاجة أهم".. شفت تلاقيح الكلام.. عاوزه تقولهم خلوا عندكم شوية دم ياخوانا..

لو عجبك الموضوع ده وعاوز تقرا مواضيع زيه أو أحسن خش هنا

قط بلدي

"EWR" أول اتحاد مصري للمصارعة الحرة.. خاف يا"WWE"

سي إم بانك.. "معدي الناس" بشهرته.. ومدي الـ"WWE" على قفاه

ستيفن بادوك.. المليونير المجنون اللي قتل 58 واحد وإنتحر في "فيجاس"