"EWR" أول اتحاد مصري للمصارعة الحرة.. خاف يا"WWE"

وصل وصل وصل.. قرب يابيه وقربي يامدام.. لأول مرة في مصر والوطن العربي.. EWR أول اتحاد للمصارعة الحرة.. أيوه زي ما بقولك كده.. حلبة وأحزمة وبطولات وسوبلكسات وكروزلاينات.. زي بره بالظبط.. اتحاد الـWWE أعلن حالة الطوارىء بسبب الموضوع ده.. وفينس ماكمان انزعج جدا.. يالا كمل قراية واعرف الحكاية..

"EWR".. الاتحاد المصري للمصارعة الحرة.. فكرته بدأت من مدينة القرين في محافظة الشرقية..  اللي جاتله الفكرة وأسسه اسمه "أشرف كابونجا"، حاجة كده هَجمة طول بعرض والبيج شو نفسه ميجيش جنبه حاجة..  الراجل ده تعب أوي قبل ما يأسس الاتحاد.. ساب كل شغلانة كان فيها عشان يتمرن على اللعبة.. في الأصل هو كان لاعب كونجوفو.. وبعدين بقى مدرب فيها.. وساعتها استوهته فكرة إنه يتعلم ويبقى لاعب مصارعة حرة محترف.. وهنا حاول نشر اللعبة في كل الجيمات اللي راحها وبين كل الشباب الرياضيين اللي يعرفهم.. لكن طبعا خد جرعات إحباط كتير وتريقة أكتر.. لأن فيه اللي شايف أنها لعبة مينفعش تتلعب في مصر.. وفيه اللي اصلا ميعرفش اللعبة.. وفيه اللي عارفها لكن مش معتبرها رياضة أصلا.. غير اللي فاكرين إن المصارعين ممثلين ومش بتوع قتال حقيقي ..

المهم كابونجا فضل ورا حلمه وميأسش.. وفتح مصنع أأ.. قصدي كون مجموعة كبيرة من الشباب اللي بيحبوا المصارعة الحرة وعاوزين يبقوا أبطال فيها.. ونجح إنه يأسس أول اتحاد مصري للمصارعة الحرة.. وسماه "EWR" لأنه شايف إنه ممكن ينافس الاتحاد العالمي.. أو حتى يحقق صدى كبير زي "WWE".. وبدأ فعلا يعمل ماتشات على الأد وبالمجان في الشرقية.. وبعدها بدأت تكون بفلوس رمزية عشان بس يقدر يصرف على اللعبة.. والعروض زادت والفلوس كترت في إيد الراجل.. وبدأ يوجه شوية من العائد لصالح صندوق "تحيا مصر".. وباقي الفلوس فكر إنه يعمل بيها عروض خاصة ضخمة تعمل صدى أكبر ويتكلم عنها الناس وتتناول أخبارها الصحافة والفضائيات.. وبدأ بأهم عرض في طريق حلمه عشان يكبر "EWR"..

عرض الأحلام.. عمله في مدينة القرين بمحافظة الشرقية اللي كابونجا منها أصلا.. شارك فيه 30 مصارع من كل المحافظات.. وأعمارهم بين 19 و40 سنة.. وكان فيه كل أنواع الماتشات من زوجي "تاج تيم" ومصارعة نسائية "ديفا".. وكان واضح جدا في العرض ده التمرين الشاق للشباب والتدريب الصح.. وبالأخص اللاعبات آية ديدي وفاطمة بيبو اللي تألقوا جدا في العرض ده وكانوا واجهة كويسة جدا لأول حدث من EWR ..

حاول كابونجا كمان إنه يواكب في "EWR" شكل الحلبة المناسب وكمان طريقة التصوير زي الدبليو دبليو إي بالظبط.. وهو شايف إن ده مش تقليد لكنه محاولة للوصول للعالمية وأفضل شكل ممكن للعروض بتاعته.. وبينزل الفيديوهات على الموقع بتاع الاتحاد وصفحته على الفيس بوك.. اللي عملهم بالجهود الذاتية.. يعني بـ"رجل حمار" زي ما بيقولوا..

كابونجا بيعمل كمان معسكرات تدريبية عشان لاعيبة "EWR" يجهزوا ويظبطوا لياقتهم البدنية.. ومنها مكان هو واخده في مركز شباب العقادة بالإسماعيلية وده اللي عمل بعده عرض الأحلام الأخير بتاعه.. اللي لفت انتباه السوشيال ميديا وخلى الناس تشير الصور والفيديوهات بتاعته..

في كلامنا مع كابونجا كشفلنا إنه اتعرض عليه من راجل أعمال قطري تقيل إنه يرعى اتحادEWR  ويمثل اسمه في الولايات المتحدة.. وكمان راجل أعمال تاني بيقول إن إسرائيلي عرض عليه الرعاية وحملة إعلانية كمان.. وكابونجا طبعا راجل أصيل وكويس ورفض كل الكلام ده..

وبيقول: "رفضت عروض كتير عشان فيه منها مشبوه.. وفيه اللي مش هيفيد بلدي في حاجة.. وأنا مش عاوز مكسب شخصي أقسم بالله.. وعاوز بلدي تستفيد من الرياضة دي بأكبر شكل ممكن.. لكن للأسف لما روحت وزارة الشباب والرياضة عشان أقابل أي مسئول محدش رضي يقابلني ونفضولي تماما.. وكل اللي بيحبوا المصارعة بيعانوا من التجاهل والإهمال.. وده بيخلينا محبطين ومالناش نفس نعمل حاجة".

وفي الآخر كابونجا بيبعت رسالة للمسئولين وهو مضايق جدا - وحقه الصراحة - وبيقول: "نفسي وزارة الشباب والرياضة تدعم مجهودي وتدعم اللعبة.. شيباب كتير جدا بيحبوها ودي حاجة كويسة لأنها رياضة وليها تدريبات شاقة ومفيدة.. وكمان هتفيد في دعم السياحة.. من خلال العروض الكتير اللي هنظمها في محافظات مصر كلها.. وكل حلمي إني أكون اتحاد مصارعة عالمي أقدر أنافس بيه WWE.. إحنا مش أقل منهم في حاجة.. وعندنا الإمكانيات والمهارات زيهم وأحسن"..

كولكشن من مباريات الاتحاد.. وخصوصا من عرض الأحلام الأخير

ماتش حريمي كامل من الاتحاد.. دلع يادلع

ماتش رهيب بين اللاعب "بوب" و"كابونجا" بذات نفسه

لو عجبك الموضوع ده وعاوز تقرا مواضيع زيه أو أحسن خش هنا

قط بلدي

حلمك تجيب "آيفون 8"؟.. خش يمكن تغير رأيك