"سمعت عنها قبل كده؟".. تعرف على فوائد وأضرار المياه القلوية
الإثنين، 18 سبتمبر 2017 01:45 م
المياه القلوية بقت موجودة دلوقتي في أغلب السوبر ماركت وحتى الأكشاك، وسعرها يتراوح ما بين 10 إلى 40 جنيهًا.
ناس كتير إشترتها وجربتها.. وفي ناس كتير بتسأل هي عبارة عن إيه؟
- بمنتهى البساطة المياه القلوية مياه عادية جدا بس بتختلف في طريقة تحضيرها عن المياه اللي انت متعود عليها.. اللي هي أصلا متعادلة لا حمضية ولا قلوية.. دي مختلفة في تركيبها وطريقة تصنيعها.
طيب ليه ممكن نشتري المياه دي كسيدات وبنات وحوامل؟ المياه دي هتساعدك علي التخلص من الاحساس بالحموضة وارتجاع الطعام والاحساس بالغثيان الصباحي وبتعالج القىء الحاد.
المياه دي هتساعدك علي تجديد النشاط، لأنها تحفز الدورة الدموية عن طريق التخلص من زيادة نسبة الحموضة في الدم.
أيضا تساعدك علي تجديد الخلايا، وتحميك من التجاعيد، وعلامات التقدم في السن، بالمواظبة عليها.
كمان بتساعد علي "الديتوكس".. يعني التخلص من كل سموم الجسم والقولون.
طيب دي مميزات المياه القلوية، لكن بما إنها مش مياه عادية أكيد هيكون ليها آثار جانبية:
شربها الكتير بيعرضك أن دمك يكون قلوي جدا.. وده خطر علي حياتك في كل لحظة.
لو بتعاني من عسر هضم يبقي أصلًا حموضة المعدة قليلة فمينفعش نشربها.
لو كنت من مرضى الضغط أو السكر أو القلب، فمنصحكش تشرب مياه قلوية، لأنها هتأثر علي أدويتك، وكمان نسب المعادن فيها مش زي المياه العادية.
لو كان عندك أي حاجة ليها علاقة بالأعصاب، أو بتخدي دواء لعلاج أمراضها.
كمان متنفعش للأطفال لحد ما يتم استشارة الطبيب، وكمان إخصائي تغذية.
فيها كالسيوم كتير ولازم تقللي جرعة الكالسيوم لو كنتي بتاخديه في مكمل غذائي، عشان كتره في الدم غلط .
المياه القلوية مش معمولة للارتواء يعني ممكن متقضيش على العطش، لكن شربها بيحافظ على رطوبة جسمك لوقت طويل.
وممكن تشرب منها قبل ممارسة الرياضة أو الخروج في حر شديد، لكن مش وإنت عطشان.
لكن الخبر السعيد أننا ممكن نطبخ بيها ونعمل حلويات، وبيقولوا إنها بتدي طعم حلو أوي للأكل، بس بصراحة مجربتهاش في الطبخ.
وأخيرا جرعتها اليومية هي وزنك مقسوم على 2، يعني لو وزنك 60 كيلو يبقى لازم تشرب 30 فلويد أونس، يعني 870 ملي، لكن طبعا إحنا مش هنعمل كده.
بنصحك إنك تشرب منها كوباية كاملة كل يوم الصبح، عشان تخلصك من السموم، وتديك طاقة، وتمنع عنك علامات التقدم في السن.
وكمان بنصحك تستشير طبيب تغذية عشان يحلل نسب حموضة الدم والفيتامينات و المعادن، ويديك الجرعة المناسبة من المياه القلوية.
اقرأ أيضا ..
"وجهان لعملة واحدة".. كيف تزرع التفاؤل لتشعر بالسعادة
دراسة: لهذا السبب يجب أن تتناول 2.5 لتر ماء يوميا
