علشان متبقاش زي خلف الدهشوري..حاجات لازم تعرفها ف اول يوم ليك في الجامعة 

الجامعة خلاص ابتدت ..عزيزي الطالب عزيزتي الطالبة.. عشان أول يوم يعدي بسلام ومتبقاش عامل زي خلف الدهشوري خلف تعالوا أقولكم هتتعاملوا إزاي:

البنت التنكة:

بصي بقى ياست البنات عشان الدفعة بتاعتك تكون حباكي ومش شايلة ف قلبها حاجة من ناحيتك.. اتعاملي مع كل الدفعة كويس ومتبصيش لحد نظرة تناكة.. لأنهم لو لاحظوا ده مش هايتعاملوا معاكي.

عم العضلات:

أما أنت بقى ياتيتو لو كنت بتروح الجيم مخصوص من فترة عشان تنفخ الباي بتاعك.. عشان لما تدخل الجامعة تبقى الواد صاحب الفورمة انسى الكلام دا خالص لازم تعرف إن الجيم رياضة مش بلطجة.

حمادة عسلية: 

حمادة عسلية.. بص بقى يابرنس إلبس زي الناس.. يعني بلاش جو البناطيل الضيقة بزيادة والخلخال اللي في الرجلين وشغل السرسجية ده.. خليك إنسان طبيعي لابس تيشرته وبنطلونه وجزمته ولابس شنطته كأي إنسان طبيعي وحاول متبقاش اوفر ف كلامك عشان تبين وتستعرض قد ايه انتا واد خلاصة لاصة ومية مية..خليك عاقل ورزين ولو معرفتش مثل انك عاقل ورزين..مش عيب..مع الوقت هتتعود.

سوزي انتكة:

نيجي بقى عند سوزي.. إنتي من دلوقتي بتفكري تلبسي إيه صح؟.. معلش اسمحيلي انا أختارلك لبسك ده.. عشان متبقيش زي سوزي انتكة في الجامعة.. بصي بقى كل ما بقيتي بسيطة  كل ما ده بقى حلو ومريح نفسيًا ليكي.. مش معنى إنك داخلة الجامعة يبقى لازم تلبسي حاجات بتلمع.. لأ خالص على فكرة الحاجات اللي بتلمع ليها مناسبتها.. وأكيد مش مناسباتها الجماعة..مش منظر ابدا تروحي الجامعة بتلمعي وملعلطة ف الشمس الصبح..هيبقى اسمك الحركي مابين الطلبة "أم ترتر" علاطول..ف خلي بالك.

الواد اللي مقطع السمكة وديلها:

إنت بقى يا عم البرنس طبعاً بتفكر إنك توقع كل بنات الجامعة في حبك و بعد كدة تخلع.. أحب أقولك اهدى على نفسك كده..لما تقول لبنت بحبك يبقى تكون عارف إن الكلمة ديه بعديها جواز ف لو مش قدها سيبها في حالها مش لازم تبقى مقطع السمكة يعني عيب عليك والله..ثم انتا لو كل واحدة هتشوفها حلوة ف الجامعة هتروح تقولها بحبك يبقى مش هتخلص ثم خلي بالك البنات بيحكوا لبعض كل حاجة ف هينتهي بيك الامر لفضيحة وهيتعلم عليك وهتبقى قرموط وحداني بعد ماكنت بتقطع السمك بديله صاحي..ثم انتا ف الاساس رايح الجماعة تتعلم ياحبيبي مش تشقط ف بنات ياخويا.

البنت الواقعة:

تلاقيكي دلوقتي بتفكري إزاي أطلع من أول يوم بقصة حب.. قبل ما تطلعي خليني أقولك إن ده هيخليكي تبقى مدلوقة على أي راجل تشوفيه.. وخدي بالك أنهم بيحسوا بده.. ف خليكي صاينة كرامتك وعندك عزة نفس وساعتها هتحسي بمين بيحبك فعلاً.. فاهماني طبعاً..ثم انتي رايحة الجماعة تتعلمي ولا تحبي..كدة هتسقطي يافالحة..هتسقطي..هتسقطي ياختي.

************************************

كان معكم الأسطى:

إسلام ناصر..نصر الدين طالبية عريش

لو عجبك الموضوع دة وحابب تقرا زيه او احسن خش هنا..

قط بلدي