"كبانيه الفنانين" عبارة عن عربة كبده وسجق معروفة باسم "كبانيه" نسبة إلى وجود مرحاض عمومى خلف العربة، لم يمنع هذا الاسم من أن يتردد الفنانين عليه عند تصوير مشاهد من فيلم معين أو مسلسل ما فى منطقة القلعة أو الحطابة.

وييقول محمود الشهير بـ"كبانيه"، "الفنانين عارفين انى اسم العربية كبانيه، وبيطلبوا من بتوع الانتاج بالاسم عيزين ناكل من عند محمود كبانيه، والاستاذ احمد السقا بيحب السجق المشطشط  ودايما بيوصى على الشطة مع اللى بيجى، والسجق الحامى معظم الفنانين والزباين بيحبوه ".

وتابع، "أن سر خلطة السجق فى النفس نفسه بتاع اللى بيعمله، بنجيب السجق ونقطعه ونكون مجهزنله الصوص بتاعه اللى هو خل وميه وشطا وصلصة وبهارات وفلفل رومى وطماطم وحبة بقدونس".

وأردف، "فى فنانين كتير بيجوا عندنا لما بيصوروا فى منطقة الحطابة زى الاستاذ باسم سمرة وهانى سلامة ومصطفى شعبان وهيفاء وهبى، معظمهم بيحبوا السجق المشطشط الحامى لان بطبيعتنا معظمنا بيحب الحاجة الحامية".

واستكمل، "الكبدة طريقتها سر والخيار المخلل الزبون بيجيله مخصوص لأنه عندنا مبيدبلش وطعمه مبتغيرش فى الصبف وبيفتح الشهية، وبننصح الزبون انه ميحطش طحينة على سندوتش الكبده عشان الكبدة طعمها بيمرر من الطحينة وبيسمعوا الكلام".