قال الفنان محمد جمعة الشهير بشخصية “عم ضياء” وصاحب مقولة "كله رايح"، أعتقد إنى عكس شخصية عم ضياء تماما لان فى الطبيعى متفائل جدا وليس متشائم والدليل على كده إنى مكنتش هاقدر اصبر على وضع الشغل السنين دى.

وتابع: كان ممكن أيأس وأسافر واترك المهنة لان فى تعب ومفيش منها مردود فنى، فأنا شخصيا طول الوقت عندى أمل، فبقول طلاما انا مخلص للموضوع اكيد ربنا هيكرمنى، ومفيش إنسان مفيش فى حياته كآبة وبحس بحالات اكتئاب أكيد فى أوقات ولكن مش طول الوقت

وأشار جمعة، إلى أنه لم يمتهن أى مهنة غير التمثيل، وأنه بعد مرور مرحلة الثانوية العامة إلتحق بمعهد فنون مسرحية ثم تخرج منه ليمارس مهنة التمثيل.

وأكد ان الإنسان لا يخلو من العيوب والكمال لله وحده سبحانه وتعالى قائلا، لدى عيب ولكنى أحاول التقليل منه وهو إن شخصيتى خجولة جدا، لدرجة أن تعرضت لموقف كان المخرج أحمد توفيق عضو لجنة تحكيم فى مشروع تخرجى، وقال لى كلمنى لما تعرف إنى بعمل حاجة جديدة، وطبعا أحرجت من حاجة زى كده.

وأضاف: قابلنى بعدها بسنتين، وقالى مكلمتنيش ليه لما عرفت انى داخل مسلسل، فقلتله انا اتكسفت بصراحة، فقالى لما تعرف انى داخل فى عمل تانى انا اللى بقولك اتصل بيا، ويمكن الخجل ده كان سبب تأخرى شوية فى الظهور كممثل.

أما عن فترة الطفولة قال، وانا صغير كانوا بيدلعونى بأسم جمعة او ميدو، وكان مصروفى وقتها 5 قروش بشترى بيهم حاجة ساقعة وساندوتشات، وطبعا العملة دى دلوقتى الجيل اللى موجود ميعرفش عنها حاجة أصلا.

وأختتم حديثه، اتمنى ان الناس اللى شافتنى  فى مسلسل "الوصية" فى شخصية عم ضياء، يكونوا اتعلموا الدرس لانه كان مهم جدا ، وضياء اختصر الموضوع كله فى كلمة واحدة "كله رايح".

يذكر ان الفنان محمد جمعة، ظهر بشكل كبير فى موسم رمضان 2018، من خلال 3 أعمال درامية هم، مسلسل "ضد مجهول" للفنانة غادة عبد الرازق، مسلسل "أبو عمرى المصرى"، وأخيرا مسلسل "الوصية" الذى أشتهر من خلال بشخصية عم ضياء صاحب مقولة "كله رايح".