بعد إعلان وزارة التموين والتجارة الداخلية، فتح باب تقديم التظلمات للمستبعدين من بطاقات التموين، "هنقولك تقدم طلبك فين ومين بيتعامل معاه وإيه اللى بيتم من خلال الفيديو التالى:

- 1 قدم التظلم لمكتب التموين اللى فى المنطقة بتاعتك، ومرفق بالمستندات المطلوبة الدالة على صحة البيانات.

- 2 المستندات المطلوبة بتكون على حسب نوع التظلم

- 3 لو مستبعد عشان مرتبك أو معاشك كبير بتجيب بيان مفرادات مرتب من جهة العمل أو التأمينات.

- 4 لو مستبعد عشان عندك سيارة أو أكتر بتجيب شهادة من المرور معتمدة تفيد امتلاكك لسيارة موديلها ايه أو لا تمتلك.

- 5 لو مستبعد عشان استهلاك كهرباء عالى فأنت محتاج بيان معتمد من شركة الكهرباء يفيد بمتوسط استهلاكك الشهرى.

- 6 لو مستبعد عشان فاتورة محمول عالية فأنت محتاج فواتير معتمدة من شركة المحمول بمعدل استهلاكك الشهرى

- 7 لو مستبعد عشان عندك أرض زراعية بتجيب شهادة معتمدة من الجمعية الزراعية التابعة ليك تفيد امتلاكك لأرض مساحتها كام أو لا تمتلك.

- 8 لو مستبعد عشان مصاريف مدارس ولادك عالية محتاج شهادة معتمدة من مدرسة أولادك تفيد بقيمة المصاريف السنوية المدفوعة.

- 9 لو مستبعد عشان جمارك عالية فأنت محتاج شهادة من مصلحة الجمارك تفيد بقيمة الجمارك المدفوعة .

- 10 لو مستبعد عشان ضرائب عالية فأنت محتاج شهادة معتمدة من مصلحة الضرائب تفيد قيمة الضرائب المدفوعة سنوياً.

-  11 المستندات بيتم إرفاقها بصورة البطاقة التموينية المراد تفعيلها .

- 12 بعد ما يستلم مكتب التموين التظلمات المقدمة من المواطنين بيسجلها على موقع تموين دعم مصر.

- 13 التظلم المسجل بيتم فيه توضيح "الرقم القومى ورقم المحمول، نوع التظلم، رقم البطاقة الذكية".

- 14 بعد ما يسجل مكتب التموين التظلم بيرسل الكشوف المعتمدة من رئيس المكتب إلى مديريات التموين ثم يتم إرسالها إلى الوزارة.