تحدث الكاتب الصحفى خالد صلاح، رئيس مجلس إدارة ورئيس تحرير "دوت مصر"، عن سيرة "ابن هشام" لصاحبها محمد إسحاق، وما تضمنته من قصص وروايات إسرائيلية وأساطير.

 

وقال خالد صلاح، خلال برنامجه الإذاعى "صالون مصر"، على إذاعات راديو النيل والتى تضم "ميجا FM، وهيتس، وشعبى FM، ونغم FM" : "أنا وأنت بنسمع سيرة الرسول صلى الله عليه وسلم، من سيرة مشهورة جدا اسمها سيرة ابن هشام، طبعًا هى مش معروف أوى سميت بابن هشام ليه لأن اللى كاتبها محمد بن إسحاق، الأغرب إن محمد ابن إسحاق اتولد سنة 703 ميلادى، وبدأ يجمع فى الأحاديث وتوفى سنة 768 ميلادى، يعنى ما بينه وبين الرسول عليه الصلاة والسلام، حوالى  120 سنة قعد محمد بن إسحاق يجمع فى الروايات الشفوية اللى حصلت من 120 سنة، روايات تتجمع شفوى، ومش هكلمك عن الصفاء الذهنى للرواية، وإذا كان محمد بن اسحاق قدر يلاقى فعلا ناس حافظة الروايات متسلسلة بالعنعنة عبر 120، لكن أنا هكلمك عن حاجة أخطر، إنك لما تقرأ سيرة ابن هشام هتلاقى  فيها أساطير كتير جدا حصلت فى جزيرة العرب قبل الإسلام، زى ناس تدخل من النار وتطلع من الناحية التانية، وناس بتشفى، وناس بتحيي الموتى، وناس تدخل مغارة وتدخل فيها لـ600 سنة.. أساطير ما أنزل الله بها من سلطان.. 120 سنة امتلأت بالخرافات".

 

وواصل: "لكن برضه أنا لسه معاك إن مش دا الأخطر.. لكن الأخطر إن محمد بن إسحاق فى سيرة ابن هشام يعتمد على جمل خطيرة جدًا، ويقول "أهل العلم الأول".. نعم يا فندم.. يعنى إيه أهل العلم الأول؟.. ويتكرر كثيرًا.. وهو يقصد اليهود والمسيحيين اللى كانوا موجودين فى بغداد إثناء قيامة بجمع هذه السيرة فى عهد أبو جعفر المنصور الخليفة العباسى أو فى مناطق أخرى فى العالم الإسلامى آنذاك، ولأن الراجل دا جاء إسكندرية وقعد مع ناس كتير جدًا فى الإسكندرية.. يعنى إيه أهل العلم الأول يا سيدى محمد بن اسحق؟.. يعنى كتب اليهود ورواياتهم، وروايات والمسيحيين آنذاك أصحاب الكتاب عن الرسالات السماوية وغيرها".

 

وذكر خالد صلاح:  "كان فيه ناس من أهل الكتاب من اليهود والمسيحيين وكانوا من المسلمين اللى دخلوا الإسلام حديثى العهد به، مثل كعب الأحبار فى اليمن، ووهب ابن منبه، وعبد الله بن سلام، وأبى يعقوب فى تدمر، وكل هؤلاء اعتبرهم السيد محمد ابن إسحاق أهل العلم الأول.. وخد كل الروايات الإسرائيلية القديمة عن الخلق ونشأت الخلق والأنساب وأساطير الجزيرة العربية واليهود.. وخدها من بنى إسرائيل والروايات الإسرائيلية.. يعنى حضرتك كل هذا الكتاب مليء بقصص بالروايات الإسرائيلية المسجلة رسميًا والمعترف بها من محمد ابن إسحاق.. يعنى إحنا بنقرأ سيرة مر على صاحبها 120 سنة ونقلت شفوى، وصاحب السيرة يعترف أنه واخد من كتب أهل العلم الأول، وضم أساطير فيها قصص ما أنزل الله بها من سلطان".

 

وتابع الكاتب الصحفى خالد صلاح، قائلًا : "120 سنة يا جماعة شفوى وأساطير مليئة فى كتب التاريخ.. وكل ده ونقول نراجع ونشوف الصح والغلط إيه.. وإيه الى يتطابق مع القرآن وإيه اللى لا يتطابق.. إيه اللى مزروع لنا لغم فى التاريخ مبوظ حياتنا وبوظ أجيال كثيرة وبيرميها فى العنف محدش بيرضى يصدقنا.. ياخسارة.. شوفوا الأساطير اللى عندنا قد إيه عشان متقولوش على الأساطير إنها دين ونفضل نعبد ربنا بالغلط.. ونفضل نفتكر إن الصحابة كانوا بيعملوا حاجة وهما عمرهم ما عملوها.. ليه بنخلى الجهل دين؟.. حرام عليكم ارجعوا للتاريخ وهتندهشوا لما تقروا ابن هشام".