خلينا نتفق ان حلقة Game of thrones الجديدة كانت صدمة.. سواء بسبب الأحداث أو بسبب تسريبها على النت بالصدفة البحتة.. إحنا عشنا أسبوع مرعب واحنا بنتفرج على الحلقة وعارفين إننا مش هنلاقي حلقة جديدة لمدة أسبوعين.. ياما مسكنا أعصابنا وقلنا مش هنتفرج على التسريب مع إن صحابنا كلهم اتفرجو عليها وممكن يحرقوها.

الحلقة كانت على مستوى الأحداث رائعة مشكلتها الوحيدة التايم لاين ونقطة تانية هنتكلم فيها بعدين.. الحلقة كانت المهمة الانتحارية بتاعة فريق جون سنو .. ازاي تصطاد زومبي.. باعتبار إن دة دليل لويستروس كلها إن الوايت ووكرز كائنات حقيقية مش أساطير.. المشكلة إنك لو كنت من فريق عمل Game of thrones لازم تعمل خطة منطقية ازاي توصل الفريق دة لطابور وايت ووكرز من غير ما يموتوا.. طبعا مشهد قتل الوايت ووكرز اللي اتسبب بقتل كل الزومبي اللي معاه باعتبار إنه هو اللي حولهم ما عدا زومبي واحد بس!

كانت صدفة بحتة أجمل من إنها تكون منطقية.. لكن في سبيل وقت الحلقة هنعديها.. لكن المشكلة بالنسبالي هي اللوجيك.. بنجن ستارك ميقدرش يعدي السور عشان السحر هيختفي ويموت لكن جيش الزومبي ممكن يعدي من غير ما .. يموتوا تاني!!

على مستوى الساسبنس مفيش اعتراض.. كلنا اتوترنا وأعصابنا اتحرقت.. لكن في مشكلة برضه في التايم لاين.. امتى جون سنو لحق يوصل السور ويدور على جيش الزومبي ويدخل معركة؟.. وفي نفس الوقت يبعت جيندري برسالة لدنيريس وهي تلحق تطير وتوصله وكل دة في حلقة واحدة؟!.

لكن التوتر العالي فعلا كان في وينترفيل.. ليتل فينجر نجح فعلا إنه يوقع بين آريا وسانسا.. مشهد سانسا وهي بتفتش الشنطة عشان تلاقي ورقة.. لكن تلاقي بدل الورقة وشوش ناس.. كمان طريقة كلام آريا تخوف.. وأختها بقت مقتنعة إنها بقت تهديد ليها.. وأنت كمشاهد بتبقى للحظة متخيل إن هيبقى في دم.. المشكلة إن دة بيقرب سانسا أكتر من ليتل فينجر.. ومش مستبعد إنها ممكن تخون جون سنو ولو على سبيل انقاذ نفسها لأنها ممكن كمان تبقى حاسة إن حتى بريان اللي أقسمت على حمايتهم ممكن تختار آريا على حسابها.

نيجي للمعركة الأخيرة.. المشاهد كانت تخليك على أعصابك وخصوصا إن درجة اليأس فيها كانت تشبه كتير الحلقة التاسعة في الموسم السادس.. يعني Game of thrones عمل نفس القلق بس غير العدو من رامزي بولتون للزومبي.

لكن في المعركة دي ومع وصول دنيريس الموضوع بتحصل فيه مشكلة .. المشكلة الأكبر في الحلقة.. فاكر في الموسم الأول.. وباقي المواسم لما كل واحد كان يتكلم عن قتل الوايت ووكرز بالنار وأنها السلاح المؤكد ضدهم

طيب ليه دنيريس مضربتش على طول في النايت كينج بعد ما وصلت وأنقذت فرقة جون سنو.. هي معاها 3 تنانين.. 3 وكلهم بيضربو في نفس النقطة.. صعب جدا إنك تتخيل إنها تقدرش تبص يمين شوية وتضرب مرة واحدة.. لكن إحنا عارفين السبب.. إذا النايت كينج مات.. يبقى Game of thrones مات.. لأن هو دة العقدة اللي لازم تتحل.

لا المشهد استمر لمرحلة إننا نشوف المشهد الذي أبكى الملايين.. تنين بيموت.. المشهد اللي يزعل أكتر من موت أي شخصية في المسلسل مهما كانت بشاعة الموتة.. طبعا برضه هنلاقي تبرير الموضوع دة بأن لازم الشرير .. النايت كينج.. يبان مرعب.

ودة معناة إنه يبقى معاه سلاح أقوى أو يساوي السلاح اللي مع فريق الطيبين.. لكن دة معناة برضه حاجة .. إن السور ملوش لازمة..متنساش إن التنين بعد ما رجع تاني .. تنين زومبي.. لكن لسه بيطير.

والمشهد دة يدمر برضه نظرية قديمة عند الفانز.. وهي نظرية 3 تنانين بـ3 أبطال.. جون ودنيريس وتيريون.. وأنهم هما التلاتة هيركبو التنانين.. لكن دلوقتي فضل اتنين معناه إيه الكلام دة.. تيريون برة معادلة السوبرهيروز.

أخر الحلقة طبعا .. كان لازم تشوف رد فعل دنيريس بعد ما التنين مات.. هي بتقول إن التنانين دي أولادها.. لكن أنا مشوفتش انفعال حقيقي على موت فيزاريون.. تقريبا كانت حزينة على جون سنو أكتر.. احنا عارفين خلاص إنهم بيحبوا بعض لكن فين الريأكشن.. دي كانت بتصرخ في الموسم التاني لما اتسرقت التنانين وهنا فضلت ساكتة تماما.. أنا شوفت صدمة على وش تورموند أكتر من دنيريس.

عموما في انتظار الحلقة الأخيرة.. واللي إعلانها بيقول إن فيه لقاء بين معظم شخصيات المسلسل.. عندي احساس بخيانة قريبة.. خلينا نشوف

لو عجبك الموضوع دة وحبيت تشوف زيه ويمكن أحسن خش هنا

قط بلدي