هاجم الإعلامي جابر القرموطي، اليوم الثلاثاء، محافظ الإسكندرية، الدكتور هاني المسيري، بسبب انتشار القمامة بالشوارع وعدم حل مشكلات المواطنين، قائلا "إسكندرية الآن محافظة مستقلة وبعيدة عن حل مشكلة المواطن وليس لها قلب تشتكي إليه"، مضيفا "الطريقة اللي إنت بتشتغل بيها مش هتنفع وفشلك ذريع في فهم شخصية المواطن المصري".

وأضاف القرموطي، عبر برنامجه "مانشيت" على شاشة "أون تي في"، أنه منذ تولي المسيري محافظا للإسكندرية تواصله مع الإعلام وحل المشاكل "صفر"، موجها التساءل للمهندس إبراهيم محلب، رئيس الوزراء "إنت بتضيع في الوقت، ومش عارف ساكت عليه ليه؟ ".

واستطرد القرموطي "لا المحافظ عارفين ناخد منه حق ولا باطل، ولا عارفين نتواصل مع حد من المحافظة، ده محافظ الإسكندرية السابق طارق المهدي كان بيحترم المواطن، إنتوا بتحتقرونا ليه، المحافظ مش سبسبة الشعر والتاتو، وحضرتك أمريكاني على نفسك، لازم تتواصل مع الإعلام، العظمة لله يا جدع إنت، ماتجنوناش بقى".

وختم القرموطي "يا عم عيّن لنا واحد من المحافظة يرد على الإعلام، بيقولك المحافظ أنا زاهد في الاعلام، يا عم إنت حر إنما إحنا لازم حد يعبرنا من المحافظة، محافظ الإسكندرية بيقولك كلمني على الواتس آب، يا عم مش هكلمك على الواتس آب، أنا معنديش واتس آب ولا بحبه".