"المياو لا دين له".. هكذا قال أعضاء الفرقة التي تقدم رؤية جديدة للعديد من الأغاني، وتقدم وجبة من البهجة يمكنك سماعها وقت الضيق، لتعود طفل مرة أخرى، وتجد صوت ضحكتك يتصاعد عند سماعك لهم وهو يضحكون وسط التسجيل والغناء، "مياو مياو" فرقة وصفت نفسها: 

"من نحن؟ .. إلى المستمع العادي: إحنا بنحبك.. وخايفين عليك.. وعشان خايفين عليك.. عملنالك (مياو مياو)، إلى المستمع الموسيقي: إحنا بنحبك.. بس خايفين منك.. وعشان خايفين منك.. ابعتلنا مقترحاتك".. رفض أعضاء تلك المجموعة إجراء حوارات صحفية عدة،  حتي إن البعض ظل يتحدث إليهم عام بأكلمه، دون أي إجابة منهم، إضافة إلي رفضهم للظهور بشخصهم، وحفاظهم علي هويتهم الـ "أندرجراوند"، ونظرا لانتشارهم بشكل كبير وتأثير تراكاتهم على الكثير من مستخدمي مواقع التواصل الاجتماعي أجرينا معهم الحوار التالي..

- ليه سميتوا فرقتكم "مياو مياو"؟

عشان اسم جميل وبيعبر عننا كقطط.

- امتي اتأسست الفرقة بالظبط؟

من سنة وشوية.

استمع إلى "عملوها الرجالة"

- انتوا كام فرد؟

إحنا أربع قطط، وللأسف القطط في بلدنا مهدور حقها خالص.

- أعماركم من كام لـ كام؟

إحنا قطط في منتصف العشرينيات بشكل عام.

- دارسين ايه؟

في مدرسة الحياة اتعلمنا حاجات كتير، شفنا اللي عاش أمير وفي الآخر مات فقير، الحمد لله رب العالمين.

استمع إلى البراجيل

- ازاي بتختاروا التراك اللي بتشتغلوا عليه؟

التراك هو الي بيختارنا مش العكس، يعني مثلا ممكن القط مننا يكون بيدندن أغنية فجأة قط تاني يكمل في أغنية تانية خالص من غير ما نحس باختلاف تماما، وممكن نكون بنسمع الراديو مثلا ويحصل نفس الموضوع، وساعات بتطلع أغنية جديدة بتستفزنا فبنحفر وراها لحد ما نجيب هي منحوتة منين.

- بتسجلوا فين؟

في العربية بتاعت صاحبنا، بنخش جواها ونقفل كويس وبنسجل بموبيل كنا لاقيناه مرة مرمي جمب شجرة في الزمالك.

استمع إلى مياوة الأجيال

- فاكرين رد الفعل على أول تراك عملتوه؟

أولا اسمها "مياوة" مش تراك.. وكانت مفاجأة بالنسبة لنا، كانت مياوة "الأجيال" كنا حابينها جدا وكانت بتضحك أي حد يسمعها من القطط أصحابنا، عشان كدة توقعنا إنها تنجح لكن مش بالشكل الكبير اللي حققته ده، وكمان كانت تعليقات البني آدميين جميلة ومشجعة جدا.  

الشارموفرز

- ايه السلبيات اللي بتيجي في التعليقات وايه الإيجابيات؟ وهل فادتكم في كل تراك جديد بتعملوه؟

بتيجي تعليقات سلبية زي إننا تافهيين ودة طبعا على أساس أن الي سايب حياته وقاعد على السوند كلاود أو فيس بوك ده عالم ذرة، عشان كدة الناس دي غالبا بنرد عليهم ونزعلهم خالص، وأحلى التعليقات الإيجابية هي لما حد بيكتبلنا إن المياوات بتاعتنا بتبسطه أو بتغير مود يومه وبتخليه نفسيا أحسن، ودة بيحسسنا بمسؤولية أكبر وبيخلينا نستمر عشان كدة بنعمل تراكات جديدة.

شاي العروسة

- ليه بتقولوا إنكم بتخافوا من المستمع اللي بيسمع مزيكا كويس؟

إحنا مش بنخاف من المستمع العادي، إحنا بنخاف من المستمع الموسيقي= musician، عشان لو فتح في النقد الهدام والتنظير الفاندام مش هنخلص.. إحنا قطط وعمرنا قصير خلقة.

- في حد قالكم قبل كده إن اللي بتقدموه عمله هشام عفيفي قبل كده؟

اه أكيد، لكن ده في البدايات بعد كدة رؤية المياوة وصلت، اللي بيجمعنا مع هشام هي إيفيكت الصوت وليس اكثر.. وغير كدة هو بني آدم وإحنا قطط!

رمضان

- التقنية اللي بتحولوا بها الأصوات بالشكل ده اسمها ايه؟ وهل سهل أي حد يقدر يتعامل معها؟

ده أيفيكت من أدوات برنامج adobe audition، الموضوع مش محتاج متخصص، كمان في طرق أسهل في تحويل الصوت زي الـ mobile applications.

- مياو مياو ناوية تكمل ولا الأمر مجرد تسلية وممكن نصحي ما نلاقيش تراكات تاني ونسمع أرشيف؟

إحنا ناويين نكمل طول ما عندنا حاجة نقدمها، ولحد لما نخلص كل أغاني العالم وندخلها في بعض ونثبت أن المياو لا دين له، وانتظروا كمان مفاجآت جديدة ممكن  في يوم تحضروا حفلة لمياو مياو.

بشرة خير

- "صليل الصوارم" ردود فعل الناس عليها كانت عامله ازاي؟ وإيه اللي دفعكم تعملوا "المياوة" دي؟

كانت ردود فعل حلوة جدا سمعها 70 ألف مستمع، بس طبعا مقدرتش توصل لمياوة "بشرة وخير" اللي اتسمعت من أكتر من نص مليون مستمع، والدافع ورا المياوة دي إنها استفزتنا زي أي مياوة بنقرر نعملها.

صليل المياو ..