بدأ الإعلامي جابر القرموطي، اليوم الأربعاء، حلقة برنامجه "مانشيت"، وهو بداخل ثلاجة، تعبيرا منه عن درجة حرارة الجو المرتفعة التي تعاني منها مصر.

وقال القرموطي عبر البرنامج، الذي يعرض على فضائية أون تي في، "إحنا والله مش مأفورين ولا حاجة، بس النهارده يوم استثنائي لدينا، اسمه اليوم المناخي، حاولنا نثبت الموضوع في أذهاننا، حيث وصلت درجات الحرارة إلى 50 درجة مئوية، وممكن الناس تفتكر اليوم، وتقولك شوفت القرموطي لما كان في الثلاجة".

وأضاف "قمت بأخذ حمام قبل النزول من البيت، وقبل دخول البرنامج، وممكن عقب البرنامج، الواحد ماشي في الشارع حاسس أنه عايز يهرش في وشه، بسبب التراب الشديد، وأنا جبت لوح الثلج النهارده، يساعدني على الوصول للإحساس ببرودة الجو".

وتابع القرموطي "حبينا نعمل حاجة نسخر بيها من حرارة الجو، وممكن ده ميعجبش ناس أو يعجب ناس، لكن ده تم من غير إسفاف، وأنا جايب لوح تلج عشان أوريكم أن الناس نفسها تمسك لوح تلج وتحضنه، ومفروض اللي رايح لخطيبته ياخدلها لوح تلج أو تلاجة، واللي خلف النهارده يسمي بنته تلاجة أو له ابن يبقى لوح تلج".