رسامة سكندرية لها جمهور كبير يتابعها عبر موقع التواصل الاجتماعي "فيس بوك"، لُقبت بـ"ذات الشعر الأحمر"، يشبه شعرها موج البحر، تمتلك وجهة نظر فيما يتعلق بالمركزية التي يعاني منها كثيرون في محافظات خارج القاهرة، إضافة إلى العديد من الأمور الأخرى التي شاركتنا الحديث عنها، وكان لنا هذا الحوار مع الفنانة سيمون سمير.

- عرفينا بنفسك أكتر.

أنا سيمون سمير، رسامة وvisual artist من كامب شيزار، اللي هي تعتبر نوعا ما في وسط البلد، عندي 26 سنة، خريجة هندسة إسكندرية قسم عمارة، بس ماشتغلتش ولا يوم في مجال دراستي.

- امتى بدأتي ترسمي في العموم؟ ومين شجعك؟ وامتي خدتي القرار إنك ترسمي كاريكاتير وبورتريهات؟

هو أنا مش مصنفة رسمي كاريكاتير وبورتريهات قوي الصراحة، لأن معظم شغلي "illustrations"، وده عبارة عن رسومات لايت مضحكة، وبورتريهاتي كلها كارتون، ده غير الفن التجريدي doodling.

أنا برسم من صغري تقريبا من وأنا أقل من 4 سنين، وكان لينا جار سوداني رسام كان شايف فيا الموهبة، وهو أول واحد اشترى لي أول علبة ألوان في حياتي.

وأهلي طبعا كانوا بيشجعوني وقتها، وبيعلقوا لي اللي برسمه على حيطة معينة في البيت، بس في سنين المدرسة كلها بطلت أرسم تماما، وطبعا ده بسبب مدرسين الرسم المعقدين، ورجعت تاني وأنا في ثانوية عامة لما المدرس بتاعي، "كان معماري بالمناسبة"، شاف إني موهوبة وأنفع معمارية أو رسامة.

- البنات اللي بترسم قليلة في مصر، هل قابلتي صعوبات في مجال الرسم، خاصة إن أغلبيته رجالة؟

يمكن فى الأول بس، لما كنت لسه مش معروفة، وبحاول أدخل مسابقات، كان معظم اللي بيقدم فيها رجالة، وكنت البنت الوحيدة في مكان شغلي، بس بعد فترة لما بدأت أتعرِف ويبقى ليا استايل معين، موضوع إني بنت ده ساعدني أتشهر أكتر، لأن الناس دايما بيلفت نظرها الحاجة اللي بتكسر القاعدة.

- الرسمة بتاخد منك وقت أد إيه، عشان تبقى جاهزة تطلع للناس؟
الرسمة ممكن تفضل تلف في دماغي بالأسابيع وأحيانا بالشهور، لكن أول ما بمسك القلم والورقة أو التابلت، لازم الرسمة تخلص في يومها.

- هل في مكان معين في إسكندرية بتحبي ترسمي فيه؟

لا أنا ما أعرفش هنا أماكن معينة، ممكن الواحد يرسم فيها للأسف، فبرسم في البيت. 

- يا تري في جرايد رسمتي فيها أو مجلات كوميكس سواء في إسكندرية أو القاهرة؟

شغلي اتنشر مرة واحدة في مجلة فنية مستقلة اسمها "زمبليطة"، لكن غير كده لأ.

- يُقال إن إسكندرية مظلومة ومحدش بيبص على الفنانين اللي فيها، رغم إنها بلد الفن، هل ده حقيقي؟ وتفتكري إيه حل المشكلة دي؟
طبعا مظلومة، لأن الفنانين موجودين والأماكن الثقافية موجودة، لكن مافيش معارض وفعاليات فنية وورش زي ما في القاهرة، وده حله إن الناس في القاهرة يبتدوا يكسروا هما المركزية بتاعتهم، ويجوا يعملوا معارضهم وورشهم هنا، وللأمانة ده بيحصل ساعات لكن على فترات متباعدة جدا فبيفقد تأثيره.

كمان إحنا محتاجين نعرف بعض أكتر هنا كفنانين ونتجمع أكتر، لو كان في إسكندرية نص فرص معارض وفعاليات القاهرة مكانش حد ساب إسكندرية ومشي.

- ممكن تسيبي إسكندرية عشان تشتغلي في القاهرة؟

أنا بالنسبة لي صعب أسيب إسكندرية دلوقتي لظروف كتير، وبحاول أستفيد من ده وأثبت للناس إن الفنان مش لازم يتعرف لمجرد إنه في القاهرة، وده عكس مهن تانية كتير، ده غير إن السوشيال ميديا سهلت وصولنا لكل الناس، وأنا فعلا اشتغلت في كذا مكان في القاهرة أونلاين، والموضوع مكانش صعب، ده غير إني مقتنعة إن أسلوب الحياة في إسكندرية أحسن كتير للفنان، ومفيهاش ضغط وخنقة زي القاهرة.

- مين أطلق عليكي ذات الشعر الأحمر؟

أنا لاقيت اللقب انتشر على صوري على "فيس بوك"، ودي حاجة مفرحاني، وطبعا كبنت أنا لونته علشان يكون ليا استايل معين أعرف أميز به الـself portraits بتاعتي.

- مين أكتر الرسامين اللي بتحبيهم؟

في مصر محيي الدين اللباد طبعا، وعالميا، بحب فان جوخ وسيلفادور دالي وجارسيا.

- إيه أكتر حاجة حاليا شايفة إنها مهمة وتستاهل تترسم؟

السؤال ده صعب، ومش عارفة أرد عليه.

- بره الرسم ليكي هوايات تانية؟

معظم هواياتي فنية برضه، يعني مثلا بحب أشتغل بإيدي وأعمل حاجات يدوية وأخيط كانافا وأصوّر، وهوايتي الوحيدة اللي مش فنية هي القراءة.

- تفتكري الكاريكاتير والكوميكس فرق في توصيل الأفكار للناس مؤخرا؟

طبعا! فن الكاريكاتير بيخلي الناس تضحك على واقعهم المؤلم، فبتلفت نظرهم للواقع ده بدل ما بيتجاهلوه، وبالتالي بيتحولوا من حال لحال بسبب رسمة بسيطة أو كوميك، والحمد لله معظم رسامين الكاريكاتير المشهورين حاليا على درجة عالية من النضج الفكري، وبيعرفوا يعبروا برسمهم عن فئة كبيرة قوي من المجتمع، للأسف مبقيتش بتقدر تعبر عن أفكارها.

- إيه اللي بتحلمي به على مستوى الرسم والمجال اللي اختارتيه؟

أنا بحلم أجرب كل أنواع الفنون البصرية، وأرسم كل حاجة "أبستراكت، سيراليزم... إلخ"، بس أكتر حاجتين فعلا نفسي أحققهم أني أتخصص في مجال الرسم للأطفال، لأن ده مناسب جدا لاستايلي وشخصيتي، ولأن المجال ده مفيش أي اهتمام به في مصر، ونفسي أرسم doodling كتير سواء على الحيطان أو على منتجات الناس بتستخدمها، لأن الرسومات دي مليانة تفاصيل حلوة بتبسطني في رسمها، وبتبسط اللي بيشوفها بعد كده وبتبهره.