كان خبر وفاة مجدي عبدالملك صاحب كافيه ريش، أمس السبت، محل اهتمام عدد كبير من مستخدمي موقع التواصل الاجتماعي "فيس بوك"، فمنهم من حكى عن ذكرياته مع المكان، ومنهم من اتهم صاحب الكافيه بالعنصرية وأنه كان يختار رواد المقهى وفقا لأهوائه.

قال الدكتور شريف يونس عبر حسابه: " مع اعتذاري لأصدقائي من محبي ريش وصاحب ريش المتوفي، ريش كان بالنسبة لغير الأجانب وأصدقاء صاحب المطعم-القهوة، ومن يبدو عليهم الثراء، تجربة قذرة مهينة، تتراوح بين الطرد لشباب كان شكلهم مش أد كدا بالنسبة لصاحب القهوة، لأوسخ وسائل التطفيش اللي كان بيمارسها سفرجيته بسفالة باردة".

واختلفت منى فتح الباب مع شريف يونس، قائلة:" أنا عمري ما حصل دا معايا خالص بالعكس كل ييقابلنى بابتسامة لطيفة وكنت بلاقى معاملة شيك من العمال هناك".

واتفق هاني إبراهيم مع رأي شريف يونس، مؤكدا أن صاحب المكان كان يتفحص الزبائن من فوق لتحت علشان يعاين بنفس المنطق اللي بيتعامل به دقدق المراكبي".

وأضاف مودي يوسف ردا على "شريف يونس": أنا كنت باروح ريش في السبعينات، وكنت أصغر رواد المقهى، ما حصلّيش أي موقف سخيف.. بالعكس، كنت دايما محل ترحيب من الكل من مجدي لعم ميلاد الله يرحمه لعم فلفل وحتى الراجل اللى بيلمع الجزم".

وتابع الكاتب محمد خير عبر حسابه الشخصي علي "فيس بوك"، كلمتين عن "ريش" في كل الدنيا هتلاقي ناس متهمهاش المشكلة طالما لم تطولهم شخصيا، حتى لو كانت المشكلة دي عبارة عن أداء عنصري وضيع، ومافيش حاجة اسمها "من حقه ينقي الرواد" لإن ده مكان عام مش خاص، وإلا توافق إنك تدخل تشتري حاجة من محل فيقولك مش هبيع لك لإني مش ببيع لمحجبات مثلا أو لحد مطول شعره .

وأضاف خير: "اعتقد أن مثقفين كتير محتاجين يفهموا يعني إيه "عنصرية"، بالمناسبة كل العنصريين في العالم عندهم مبررات، وقريت لناس بيقولوا إن السيد مجدي كان عنده مودة وترحيب بالناس! فإما بيتكلموا عن مجدي آخر أو عندهم مشكلة كبيرة قوي في المعنى اللغوي لكلمة "ناس".

وعلق حمدي رضا على ما كتبه الكاتب محمد خير، قائلا: "أنا حصل معايا نفس موقف الغدا في الفطار، وكنت بعد ما دخلت أنا وصحبتي فرحانين بإعادة افتتاح ريش تقريبا سنة 96 أو 97 سابونا واهتموا بفوج أجنبي دخل المطعم بعدنا، وجابلهم فطار، وبعدين قالوا لنا ميعاد الفطار خلص".

وقالت الصحفية سلمى خطاب "مش عايزة أعلق على موضوع "ريش" ده من الصبح احتراما لمشاعر أصدقاء كانوا بيحبوا المكان، بس ريش بالنسبة لي مكنش أكثر من مكان عنصري.