في اليوم العالمي للجاز تحدثنا مع المؤلف والموزع الموسيقي فتحي سلامة، الحاصل على جائزة "الجرامي" الدولية، حول هوية هذا النوع من الفن ونشأته، فكان حوارنا معه كالآتي.

- كلمنا شوية عن نشأة الجاز

هو فن أمريكي، وأمريكا تكونت من اللي كانوا بيسموهم "العبيد" اللي جم من إفريقيا، والمهاجرين اللي جم من أوروبا من جنسيات مختلفة، ولغاية عام 1863، كان العبيد "النيجرز" موجودين، والرئيس الأمريكي أصدر قانونا بإلغاء الرق والعبودية.

وكان العبيد وقتها بيقدموا موسيقتهم الخاصة اللي توارثوها من أهاليهم كل يوم حد "يوم إجازتهم"، في ميدان اسمه ميدان "كونجو" وفي الحقول، وتلا الأمر تكوينهم لفرق باسم "مارشينج باندز" زي فرق الجيش، اللي كانت مرتبطة بنوع رقص معين للسُمر، وبدأ النوع ده من الفن يتقنن وتنتشر الفرق، ويعتبر "جيلي رول مورتن" تاريخيا هو بداية الجاز عام 1905 تقريبا.

- هل في مراحل معينة مر بها الجاز؟

طبعا، مراحل كتير وأنواع مختلفة مع مرور الوقت، والأول منها كان اسمه "راك تايم" زي "سكوت جوكلين"، وهي موسيقى مرتبطة بالبيانو، وكانت البداية حفلات في البيوت بيقدمها بيانيست لوحده.

واتطور الأمر، وظهرت أنواع تانية في العشرينيات، وبقى في "سوينج" في التلاتينيات، والـ"بي بوب" اللي اشترك فيها شارل باركر وباب باول، وناس تانية كتير، لغاية الخمسينيات، خاصة 1950، كان الجاز مرتبط بالرقص، لكن الموسيقيين كانوا مش حابين ده، ومحتاجين إن الموسيقى تتسمع أكثر، فظهر الـcool school.

لحد ما بقت الموسيقى أكثر تعقيدا، وبقى في تواصل بين موسيقى الجاز والكلاسيك، وفي الستينيات ظهر نوع تاني أكثر تعقيدا، وفي السبعينيات ظهر الـ"فيوجن"، وهو مخلوط شوية بالجاز، وما زال في تطور.

- إيه بيميز موسيقى الجاز عن غيرها؟

موسيقى الجاز منفتحة جدا، ومرتبطة بحضارات كتير، لأن أمريكا فيها ناس كتير من حضارات مختلفة فكل واحد جاب موسيقاه وثقافته معاه، لدرجة إن "لويس أرمسترونج" في تسجيلات له في الخمسينيات كان بيستخدم حاجة يُقال إنها "صاجات"، إضافة إلى أن اللي بيميز الجاز إن محدش يقدر يلعب النوع ده، إلا لو كان دارس موسيقى كويس، وعنده قدر كبير من الخبرة.

استمع إلى موسيقى فتحي سلامة

- اوصف لنا علاقتك بـ"الجاز".

أنا محب لأنواع كتيرة من الموسيقى نظرا لنشأتي، ولعبت أنواع كتيرة منها الشرقي المصري، الروك، الفيوجن، واتعلمت في أمريكا مع ناس فاهمين في النوع ده من الموسيقى، لكن أنا بلعب "فيوجن" بمعنى إن كل اللي اتعملته من معلومات عن الجاز بستعملها في الموسيقى الشرقي.

- هل في فرق بتقدم موسيقى الجاز في مصر؟

من أوائل الفرق اللي عاصرتها فرقتنا أنا ويحيى خليل في 1970، وإحنا مش أول ناس تعمل ده، لأن ببساطة لو بصينا على الأفلام المصرية القديمة، محمد فوزي كان له محاولات، وحتى إسماعيل ياسين في بعض المونولوجات موجود فيها حاجة مش شرط تكون بالظبط جاز، وحاليا في فرق بتحاول تقدم النوع ده من الموسيقى، لكن فرق الشباب أغلبها بعيدة عن الجاز ومرتبطة أكثر بالموسيقى الريفية الأمريكية Country music.

- هل في احتفاليات باليوم العالمي للجاز في مصر؟

في مكان لازم نتكلم عنه وهو "كايرو جاز كلوب"، اللي أغلب الفرق اللي بتقدم الجاز بتلعب فيه، والقائمين عليه قدموا امبارح احتفالية باليوم العالمي للجاز، كان فيها 3 فرق بتلعب جاز.