شن الإعلامي جابر القرموطي، اليوم الثلاثاء، هجوما ضاريا على الناشطة اليمنية توكل كرمان، بعد مدحها للجيش المصري، اليوم الثلاثاء، عبر صفحتها بموقع التواصل الاجتماعي فيس بوك، قائلا "نخلي بالنا من الحفر اللي بيعملها أعداء الجيش المصري، ومن كانوا يتمنون هدمه في السابق ويسبونه، قائلين جيش المكرونة والكحك".

وأضاف القرموطي، خلال برنامجه مانشيت على شاشة أون تي في، "النهارده فيه احتفاء بالأخت توكل كرمان مش عارف على إيه.. مستنين إيه من واحدة شغالة بالمقايضة وبالدفع المالي، مستنين واحدة زي دي عشان تتعاطفوا معاها وياما كتبت عن دولتنا وعن جيشنا، وتهللوا".

وواصل القرموطي حديثه "إحنا شعب غريب جدا وطيب أوي، هو أنت مش مقتنع من جواك إن جيشك هو حائط الصد الأول ليك، وعندك جيش محترم عليه بعض الأثقال والهموم وشايل كتير عن الأمة العربية، ومستنين واحدة زي دي، مش ممكن".

واستطرد قائلا "واحدة ملهاش أي صفة، بتشكر في الجيش المصري، ده فخ والله ومنصوب للجيش المصري.. إحنا لا محتاجين ليها ولا خرفان ولا ترتان ولا خلفان ولا سليمان حتى".

وختم القرموطي "مش هفرح عشان واحدة كانت ضد بلدي بنسبة مليون في المية، وكانت بتشتم وبتجرح في البلد، وتيجي تشكر في الجيش دلوقتي، نخلي بالنا يا سيادة الرئيس من الأفخاخ المنصوبة لينا".