مش كفاية إنك تقدم أعمال عظيمة، علشان الناس تحفظ اسمك، ويرددوه، ويكرموك في كل المناسبات، وأحيانا من غير مناسبة، ياما ناس عملت معجزات، وفضل اسمها مجهول، بالظبط زي عباس كامل كده.

وللأسف اليومين اللي فاتوا، ظهر شخص اسمه عباس كامل ارتبط اسمه بـ أمور سياسية زودت صعوبة إنك تشيل الركام عن عباس كامل بتاعنا.

عباس كامل الفنان، عباس كامل رسام الكاريكاتير المؤلف السيناريست كاتب الأغاني والمخرج كمان، عباس كامل صاحب المجوهرات اللي هـ نتكلم عن كتير منها، واللي نبدأ منها بـ الفيلم الرهيب اللي اسمه "ابن حميدو".

لسبب ما، اشتهر إن اللي كاتب الفيلم ده هو أبو السعود الإبياري، يمكن علشان الدويتو اللي كان بين إسماعيل ياسين والإبياري، ويمكن علشان خفة دم الفيلم مش ممكن تطلع غير من أسطورة، ويمكن ويمكن، بس ناس كتير فاكرة كده. بس الإبياري، مع قدراته المذهلة، مالوش علاقة خالص، الفيلم خالص مخلص من إبداعات عباس كامل، اللي هو أخو المخرج حسين فوزي (مخرج فيلم التمر حنة)، والمخرج أحمد جلال (أبو نادر جلال)، أيون عباس كامل وحسين فوزي وأحمد جلال إخوات.

بس ده ما يمنعش إن فكرة ابن حميدو ليها قصة. والحكاية إن فريد شوقي عمل فيلم سنة 1953، اسمه "حميدو". فيلم شوقي في أجواء تشبه "رصيف نمرة 5" صياد وعصابة تهريب مخدرات وأكشن خمسيناتي، وبطل بـ يقضي ع العصابة وينتصر للخير ع الشر وهكذا.

فيلم "حميدو" ده نجح وكسر الدنيا، فـ فطين عبد الوهاب راح لـ عباس كامل، وقال له: عايزين نعمل النسخة الكوميدي من "حميدو" ونسميه "ابن حميدو". كلنا عارفين طبعا المخرج فطين عبد الوهاب، وبالمناسبة فطين عبد الوهاب أخو سراج منير.

عباس كامل كتب "ابن حميدو" بـ روح رسام الكاريكاتير، أكتر منها روح السيناريست وصانع الأفلام، وده مش معناه نقص في السيناريو، بس الفكرة هنا إن الخيال مكنش في القصة، اللي هي عادية ومتداولة وقتها، وأصلا هي بارودي (محاكاة ساخرة) لـ فيلم تاني، فـ مفيش فرصة إنك تشتغل في المنطقة دي. الشغل، كل الشغل، كان في الكاركترات اللي شفناها.

لو حبيت تختار مشهد أو شخصية من "ابن حميدو" هـ تتعب جدا في فيلم 94 دقيقة، تقريبا مفيش دقيقة منهم عدت من غير ما تبقى إيفيه خالد ارتبط بيه المصريين، وبقى رمز لـ حاجة أو تفصيلة حياتية.

يعني مثلا الدويتو اللي كان بين عبد الفتاح القصري والعظيمة سعاد أحمد، وهو كل شوية ياخد قرار، فـ هي تكتفي بـ كلمة واحدة: حنفي!، فـ هو يطلع وينزل ويتشال ويتهبد: لا ممكن كلمتي تنزل الأرض أبدا. وهي بـ إصرار إمبراطورة تفضل على نغمة: حنفي! فـ يضطر في الآخر إنه يتراجع، فـ هو يقول لها: "خلاص، هـ تنزل المرة دي، إنما المرة الجاية.

وسعاد أحمد برضه للأسف اسمها مش معروف، مع إنها ممثلة كبيرة، وغير ابن حميدو، عملت دور تاني أكيد هـ نتكلم عنه بـ التفصيل، هو دورها في فيلم "شمشون ولبلب" الشهير بـ اسم "عنت ولبلب". واشتغلت كتير في منطقة الأم والحماة، بس بشكل مختلف خالص عن ماري منيب في "حماتي ملاك" مثلا.

العلاقة بين حنفي ومراته كانت من بدايات حفر فطين عبد الوهاب في منطقة المرأة، وكسر صورة "سي السيد" المهيمن الغضنفر، بـ منتهى السلاسة والنعومة، مش عن طريق الهجوم على الصورة دي، ولكن السخرية منها.

خلينا نفتكر مثلا مشهد في "إشاعة حب"، اللي كان بعد "ابن حميدو" بـ كام سنة، لما عادل هيكل رفع المسدس على عمر الشريف ويوسف وهبي وعبمنعم إبراهيم، وكانوا ميتين في جلدهم، ودخلت سعاد حسني، ما خافتش ولا اتهزت، بالعكس هي اللي شخطت في عادل هيكل، وخضته.

بس الواحد زعل برضه من فطين عبوهاب وعباس كامل في ابن حميدو، ليه؟

نشوف بكرة بقى