مش لاقية مغارَة أستخبى فيها من موظفين التسويق التليفونى.. الموظفين اللى بيطاردوك ليل نهار في التليفون عشان يدفَّعوك فلوس مش معاك أصلاً.. تِخلَص من تليفونات البنوك اللي بتطاردك بالقروض تطلَع لك الشركات اللي بتطاردك بالتأمين.. تخلص منهم يطاردك بتوع مستحضرات التجميل.. تخلص منهم يطاردك بتوع فلاتر الميَّة.

وهكذا وهكذا وكأنهم بيسلموك لبعض واحد بعد التاني.. ولو الموضوع مجرد تليفون بيسألك "عايز"؟ فترد عليه "مش عايز" وخلِصنا كان يبقى "بيس" ومقدور عليه.. لكن المشكلة إن المندوب مُبَرمَج على كورس كلام لازم يسمعهولك بغض النظر عن ردَّك عليه.. وحاكتفى هنا بمثالين من وِش القَفَص عشان تِفهَم قصدي

(1)

-ألو.. الأستاذة أميرة أحمد فؤاد؟

-أيوة.

-معاكي "سالي" يا فندم من شركة *** لفلاتِر الميَّة.

-ميرسي مش عايزة فلاتر.

-عندنا عرض يا فندم لو أخدتي 2 فلتر بنديكي الـ..

-بقول لحضرتك ميرسي مش عايزة.

-بنديكي التاني بخصم 20% و..

-بقول لحضرتك مش عايزة.

-والتركيب مجاناً يا فندم و..

- هو أنا بكلم نفسي وإلا إيه؟ يا ستي مش عايزة

-وضمان لمدة سنتين و..

-والنعمة ما عايزة فلاتر.. والخِتمة الشريفة ما عايزة فلاتر.. إن شالله أعدَمكُم يا شيخة ما عايزة فلاتر.. (تيت تيت تيت).

(2)

- ألو.. الأستاذة أميرة معايا.

- أيوة.

- معاكى يا فندم "وائل" من شركة *** للتأمين على الحياة.

- أهلاً.

- أستاذة أميرة ممكن آخد من وقت حضرتك 5 دقايق.

- معلش أنا آسفة بس الوقت مش مناسب.

- حضرتك إحنا عندنا 3 أنواع من التأمين بتبدأ.

- أستاذ "وائل" أنا بجد مشغولة دلوقتي ومش حاقدر أسمعَك.

- ما أنا مش حاخد أكتر من 5 دقايق.

- ما أنا بقول لحضرتك إني ماعنديش 5 دقايق.

- حاشرح لك بس أهمية التأمين ضد مخاطِر المهنة؟

- أهو ده بالذات نوع التأمين اللي لازم تحتفظ بيه لنفسك.

- ليه يا فندم؟.

- عشان لو ماقفلتِش السِكَّة حالاً أنت اللي هاتحتاجُه أوى على فكرة... (تيت تيت تيت).

لو كان الموضوع على قد المكاملة اللي المندوب بيصَمِّم فيها يتكلم غَصب عنك.. كان الواحد ممكن يقنع جهازه العصبي بالصبر والاحتمال.. لكن دي سلسلة تليفونات يومية من نفس المؤسسات اللى بيعرضوا نفس البضاعة اللي أنت كل يوم بتقول لهم مش عايزها.. زى ما يكونوا بيدخلوا في تحدي مع الزبون الرافِض ويحلِفوا ينَدِّموه على اليوم اللى رد عليهم فيه.. أو واخدين تعليمات إن الزبون بيجى بالإلحاح والغَتاتة.

حا تقول لى إعملي بلوك لأرقام تليفوناتهم؟!.. حاقول لك أنا بقيت عاملة بلوك لـ 365 رقَم ولغاية النهاردة لسة عندهم أرقام تانية!!