70 % من أسباب زحمة شوارع المحروسة ناتِج عن عدم قدرتنا على إننا نقول كلمة "ماعرَفش"..  غالباً اللي يدوَّر في تلافيف مُخِّنا مش حيلاقي الكلمة دي موجودة فيها أصلاً.

وعشان كده من المستحيل إنك تسأل حد على عنوان ويقول لك ماعرَفش... ومن مستحيل المستحيلات إنك تكون رايح مكان حَد وصَف لك توصَل له إزاي وتطلَع الوَصفَة صَح.. لازم تلاقي نفسك بتدور في دواير وتكتشف في النهاية إنك رجِعت لنقطة البداية من تاني.. وعشان كده الناس بتقضي معظم اليوم في الشوراع تايهة وعاجنَة المرور بتوّهانها.

بعد يوم طويل من التجوال في القُرى والنجوع.. سألت السواق:

- حاتِعرَف تِطلَع على الطريق ولا أخلّي حَد يمشي قُدَّامك؟

- طبعاً يا فندم معقولة حانتوه فى بلدنا؟

- أنا بتوه فيها عادي على فكرة.

- ماتقلقيش خاااالص... ده إحنا اللى الشوارع خَدِت منِّنا راقات.

- خلاص أوكي إتكِّل على الله.

- هو إحنا مش لسة معَديين من الشارع ده؟

- لأ أبداً أصل بيوت الريف كلها شَبَه بعض.

- إيه ده؟ أنا متأكدة إننا مشينا قدام محل الكاويتش ده من شوية؟

- ياااه ده ما اكتَر من محلات الكاويتش هنا.

- غريبة أوي مش شايفة المنطقة مليانة عربيات يعني!!

- لأ ده عشان النقل اللي بيعدي برَّه على الطريق..

- بُص بأه دى تانى مرة أشوف الراجل أبو جلابية بُنى اللى قاعد قدَّام البيت ده....

- يا فندم ال....

- يا فندم إيه؟ البيوت شَكل بعضها والناس كمان شَكل بعضها؟؟!!!

- هو حضرتك قلقانة ليه بس؟

- عشان بقالنا ساعة إلا ربع بنلِّف فى قرية محيطها مايجيش 3 كم على فكرة.

- يا فندم كله تحت السيطرة... أنا ماشى على ال "جى بى إس" والله.

- "جى بى إس" هنا؟!!... طب أُقَف أُقَف

- وليه العَطَلة بس؟

- وبالنسبة للساعة إلا ربع اللى لَفيناها حوالين نفسنا دى تِطلَع إيه إن شاء الله؟...

- أُقَف اسأل حد نطلَع على الطريق ازاى؟

- يا فندم الطريق آخر الشارع ده...

- يا فندم الشارع ده بقالُه ساعة مش باين له آخر... اسأل الراجل اللى جنبك ده

- أسأل ده؟!! هو ده شكلُه فاهِم حاجة؟

- ليه؟... شايفُه بقالُه ساعة بيلِّف حوالين نفسه عشان مش عايز يسأل الطريق منين؟؟!!

- طب إسأل الولد اللى راكِب عجلة ده..

- حنسأل عيِّل على آخر الزمن؟

- ما هو العيِّل اللى على آخر الزمن ده مش تايه زى حالاتَك. 

بس يا سيدي.. ويشاء القَدَر بأه إن العيِّل، اللي السواق مستكبر يسألُه، هو اللي يوصَّلنا لأول الطريق في أقل من دقيقتين... هو صحيح مِشي قدّامنا بالعجلة... وصحيح قَعَد يزمَّر طول الطريق لما فرَّج علينا النَجع كلُه.. وصحيح كُل شوية يتلِفِت لنا ويضحك فى إشارة شماتة لا تخفى على أحد... لكن أهو بردو أهوَّن من الدوخة والفَرهَدة في صمت... مغزى القصة إيه؟..  قول "ماعرَفش" أحسن ما تتوه توّهان السنين وتضَحَّك عليك أصغَر عيِّل فى أصغَر شارِع في مصر!!