في الجزء الأخير من حوارنا معه، أوضح لنا الموسيقار فتحي سلامة فكرة التوزيع الموسيقي، وضرورة أن يستزيد الفنان دائما ويستمر في التعلم، وتطرق إلى القضايا التي رفعها ضد مستخدمي موسيقاه دون إذنه، كما خص "دوت مصر" بعزف مقطوعة موسيقية من تأليفه بعنوان "نهاوند" على البيانو داخل الاستوديو الخاص به، وكان الحوار كالتالي

حضرتك قدمت موسيقى تصويرية لأكتر من فيلم مش كده؟

على سبيل المثال عملت موسيقى تصويرية لفيلم "المسافر" بطولة عمر الشريف، وإخراج أحمد ماهر، والفيلم دخل مهرجان فينسيا ودا مهرجان مهم جدا، وفي حفلة في الأوبرا في نوفمبر 2014، استعملت جزء من موسيقى المسافر لكن بطريقة مختلفة، وهنا بتظهر فكرة التعليم وتطوير المزيكا.

وإيه الاختلاف بين اللحن الأول واللحن التاني؟

الآلات اللي بتلعب مختلفة، والعازفين مختلفين، وده بيعتبر اتجاه تاني غير الموسيقى الأولى.

حضرتك رافع أكتر من قضية عن الملكية الفكرية ممكن تكلمنا عن تفاصيلها؟

أنا رافع 4 قضايا ملكية فكرية، لأن في كتير في مصر محطات تليفزيون، وإعلانات وبرامج توك شو، بيستخدموا مزيكا، بدون إذن من أصحابها، وهما فاكرين إن ده عادي لكن ده مش صحيح، لأنهم لازم ياخدوا إذن كتابي من صاحب الموسيقي، الأربع قضايا بقالهم 4 أو 5 سنين لأن الموضوع بطيئ عندنا جدا.

شاهد محمد شاهين يغني بلد الأهرام في الحفل الأخير بستار أكاديمي

وعلي فكرة آخر قضية لسه مرفعتهاش هتكون على المطرب المصري  "محمد شاهين" اللي فاز بها في  ستار أكاديمي، وغني أغنية "بلد الأهرام" اللي غنتها جمالات شيحة سنة 1991، عمل كده بدون ما ياخد إذني ولا أداني ولا مليم، وعلي فكرة هو مرفوع عليه قضية زمان على ام بي سي مع رزان مغربي، وهي لاتزال في القضاء.

استمع إلى جاية من بلد الأهرام بصوت جمالات شيحة