يرى الموسيقار فتحي سلامة أن الفنانتين جمالات شيحة، وخضرة محمد خضر هما اللتان تحملان الموسيقى المصرية الحقيقية على كتفيهما، وأمور أخرى تحدث حولها في الجزء الثاني من حوارنا معه، الذي سار كالتالي

هل اللي بيقدم فن بمختلف أنواعه بيخاطب به جمهور معين؟

لا أنا مش موافق على المعنى ده إطلاقا، لأن اللي فنان بجد، ولو بصينا علي التاريخ كله، هانلاقي إن الفنانين مكنوش بيخاطبوا أي جمهور، واللي بيخاطب جمهور معين وعايز جيوب الجمهور ده فهو "حرامي و نصاب" وعايز بس فلوس.

بمعنى؟

الفن بالظبط زي الفنان اللي بيرسم صورة، هو بيرسمها لأنه حابب يرسمها مش عشان يبيعها، البني آدم اللي بيعمل فن بيدقمه لأنه حابب يعمله، وده يأكد إن مفيش حاجه اسمها بنخاطب جمهور معين، وبالتالي مش لازم نخاطب أي حد، إحنا بنقدم فن عشان نرضي نفسنا قبل أي حد، بعد كده ممكن يعجب الجمهور أو مايعجبهوش.

استمع إلى جمالات شيحة 

ممكن تكلمنا عن جمالات شيحة وفترة التعاون بينكم في ألبوم شرقيات؟

أنا شايف إن جمالات شيحة، وخضرة محمد خضر، من المغنيين العظام جدا، ولغابة دلوقتي رغم إن سنها حاجة و70 سنة لسه بتغني، وهما بالنسبة لي ناس حقيقية مش كذب، بخلاف الخبرة اللي مروا بها طول السنين اللي فاتت، بداية من الموالد، وبالنسبة لي هما اللي شايلين على أكتافهم موسيقى مصر الحقيقية، ومازلت معجب جدا بـجمالات، ولازلت بروح موالد لأني بحب النوع ده من الموسيقى.

استمع إلى خضرة محمد خضر 

هل الفنون اللي بتقدم حاليا ومنها الأندرجراوند الجمهور مستوعبها؟

معتقدش، لأن اللي بيقدموها بيروحوا حفلاتهم يلاقوا ناس عددهم خلينا نقول 5 آلاف أو 4 آلاف بني آدم، فبيحسوا إنهم حققوا نجاح، لكن الحقيقة إن مصر 90 مليون، فوقت لما يعملوا أغنية الناس اللي في الشارع تعرف تغنيها نقدر نقول إنهم وصلوا للناس، وده لا ينكر على فكرة انتشار بعضهم خاصة بعد ثورة يناير، لأن الناس بشكل عام بعدها بقى عندهم اهتمام بكل ما يتعلق بحقوق الإنسان.

 بس الحقيقة إن فكرة استرزاق الفنانين من الثورة هتموت خالص قريب.

متوقع إيه للفن خلال الـ5 سنين الجاية؟

مش شايف بصراحة إن الوضع الحالي هيتغيير خالص، وعلى فكرة أنا مش ضد الشباب، أنا ضد اللي بيعملوه الشباب.

اللي هو إيه؟

يعني أنا شايف إن كتير منهم عندهم أفكار، لكنهم مش قادرين يفهموا إن تطوير الفكرة محتاج تعليم، للآلات والمقامات الموسيقية، وأنا من خلال الورش اللي بنظمها لاحظت إن الشباب متسرعين جدا، مهتمين بالشهرة والفلوس، أكتر من اهتمامهم بالتعليم.. ولأن الشباب جزء من المجتمع واللي حاصل فيه فده يقول إن إحنا في مشكلة مستمرة وبالتالي معتقدش إن في تغيير قريب، لكن أكيد إن لما البلد تنهض كل حاجه هتنهض وتتطور.

إيه الجديد عند فتحي سلامة السنة دي؟

عندي حفلة في مارس اللي جاي، وشغال على مشاريع جديدة، لكن لسه مفيش ألبوم.

استمع إلى موسيقى فتحي سلامة 

حضرتك بتعزف آلة تانية غير البيانو؟

 لأ بيانو فقط، لأنه بيعتبر في معاهد الموسيقى لازم الجميع يتعلم البيانو، لأنه الأصل في تأليف الموسيقى، بالظبط زي القانون أو العود في الموسيقى الشرقية، حتى لو في عازف متخصص في العزف على آلة بعنيها لازم يتعلم بيانو حتى لو بمستوى معين، ويبقي عنده معلومات من الآلات وإمكانياتها، وبالتالي مش شرط إن الفنان يلعب الآلة لكن لازم يكون عنده معلومة عنها.

إيه الفرق بين تذوق الغرب والمصريين للموسيقى؟

الغرب للأسف منفتح أكتر بكتير عننا، لأن حتى معلوماتنا عن الموسيقى التجارية ضعيفة جدا، وهنا أخص الشباب بشكل واضح، لأن لما حد فيهم بيقول مثلا إنه بيسمع الجاز، فهو بيسمع التجاري البحت عن الجاز مش أكتر، إنما في الغرب بيبقوا عايزين يعرفوا كل أنواع الموسيقى في الجزائر وفي تونس وهكذا، لكن لو سألنا حد في مصر حتى من المهتمين عن موسيقى أو الموسيقيين الصغيريين "الحقيبة" مش هيعرف وهي مزيكا سودانية قديمة قوية جدا ولا تزال مستمرة، ولو سألنا حد يعرف إيه عن موسيقى السودان هانلاقي الإجابة زيرو، طب نسأل هل يعرفوا عن الموسيقى الأمريكاني برضه مش هيعرفوا كل اللي يعرفوه هي "الكاونتري ميوزيك" اللي بيستخدمها بعض الفنانين مش عارف ليه الحقيقة.