<p>من أكتر الناس اللي بتحيَّرني البيَّاع المصري.. شُغلِتُه الوحيدة إنه يبيع البضاعة اللي واقف عليها، ومع ذلك تلاقيه متبِّت في البضاعة وراسُه وألف سيف ما تِطلَع من باب المحل...<span style="color:#FF0000;"> إزاى؟</span></p><p><span style="color:#FF0000;">أولاً: </span>دايماً مشغول عن بضاعتُه بالرغّي في التليفون أو الفرجة على التلفزيون أو اللَّت والعَجن مع زمايلُه البياعين.</p><p><span style="color:#FF0000;">ثانيا:</span> بيبيع بضاعة مايعرفش عنها أي حاجة من أول استخداماتها لغاية ما إذا كانت موجودة فى المخزن ولا لأ.</p><p><span style="color:#FF0000;">ثالثا:</span> لو ربنا فتح عليه بأى معلومة تكتشف إنها فتىّ مالوش أى موقع فى كتالوج البضاعة اللى بيبيعها.</p><p><span style="color:#FF0000;">رابعاً:</span> فنان في اللَّوع ولا يمكن يجيب من الآخر ويقول لك اعتبرنى مش هنا أصلاً وشوف لك محل تاني.. باختصار يعني تحس أن البياع المصري كارِه شُغلُه وواقِف على بضاعة مش عايز يبيعها.</p><p>دخلت محل من المحلات الضخمة اللى بتبيع كل حاجة عشان أشتري شاحِن لابتوب... بياعين قسم الإلكترونيات واقفين كلهم مع بعض فى رُكن يتبادلوا أطراف الحديث والقَفشات.. ولا ليهم دعوة بالزباين ولا بيفكروا يسألوا مين عايز إيه أصلاً.. ناديت لواحد فيهم:<br />- لو سمحت...<br />- أؤمرى يا فندم<br />- عايزة شاحِن لابتوب ماركة **** موديل ***<br />-  (ينادي على زميله)... "محماااد" عندنا شاحِن لابتوب ماركة **** موديل ***؟<br />-  ...(محمد ينادي على زميل آخر)... "جماااال" عندنا شاحِن لابتوب ماركة **** موديل ***؟<br />- ...(أخيراً توصَل المعلومة بالسلامة)... فيه ماركة **** بس تقريباً بضِعف التَمن. <br />-  ليه؟ إيه الفَرق بين الماركتين؟<br />-  مافيش فَرق. <br />-  لا والله؟! مافيش فَرق وضِعف التَمن؟!!<br />-  ده شاحن وده شاحن... يعنى حايكون إيه الفرق؟ <br />-  بتسألني أنا؟<br />-  عموماً دي الماركة الوحيدة الموجودة عندنا دلوقتى.<br />-  طيب دي بتركب على موديل اللابتوب ده؟<br />-  ماتركَبش ليه؟<br />-   بتسألنى أنا بردو؟<br />-   مش متأكد والله... "محمااااد" الشاحن ده بيركب على اللابتوب ده؟<br />-  ("محمد" ينادي لـ"جمال" تانى)... "جماااال" الشاحن ده بيركب على اللابتوب ده؟<br />-  ...(البياع ومحمد وجمال فى حالة ارتباك). <br />- طيب فيه تعليمات على العلبة ممكن نقراها؟.<br />-  أصل ده آخر شاحن والعلبة فى المَخزن.<br />-  فيه لابتوب نفس الموديل بتاعى نجرب عليه الشاحن؟<br />-  مش متأكِد أصل ده قسم تانى مش تَبَعى.<br />-  فيه الماركة اللى عايزاها فى أى فَرع تانى من فروعكم؟<br />-  ماعنديش فكرة والله.<br />-  طيب فيه تار بينك وبين صاحب المحل؟؟!!<br />-  يعني إيه؟<br />-   يعني يا أخي ده أنت لو شُغلِتِك تطَفِّش الزبون مش حاترُد الردود دي والله.<br />-  يعني حضرتك عايزة الشاحن ده ولا لأ؟<br />-    لأ مايهونش عليّا ضميرك يأنِّبَك لو بِعت حاجة النهاردة!!!</p><p>إحساس البيّاع بالرضا والسعادة إن الزبون ماشي من غير ما يشتري بينعِكِس على كل تقاطيع وِشُه... وتلاقيه فرَد بوزُه وابتَسَم لأول مرة من ساعِة ما دَخَلت عليه.. ويقول لك بكل ثِقَة وموَّدَة: "نوَّرتِنا يا فندم"!!</p><p> </p>